Tiri bolsam, qazaqqa qyzmet etpeı qoımaımyn!

Álıhan Bókeıhan

Altynbektaný baǵyty ashyldy

06 qazan 2022 67
6 qazanda Almatyda saıasatker, opozısıa qaıratkeri Altynbek Sársenbaıulynyń týǵanyna 60 jyl tolýyna arnalǵan ǵylymı konferensıa ótti. Ǵalymdar "opozısıa belsendisiniń saıası murasyn zertteý arqyly Altynbektanýdyń ǵylymı tuǵyryn jasap, sol arqyly qoǵamdyq-áleýmettik máselelerdi sheshý mańyzdylyǵyn" atap ótti.



– Tarıh, fılologıa, áleýmettaný, qoǵamtaný, saıasattaný, jýrnalısıka ǵylymynda Altynbektaný degen baǵytqa túren salyndy. Endi ǵylymı negizde saraptap, Altynbekteı tulǵanyń qalyptasýynyń negizi nede? Altynbektiń rýhy keıingi urpaqtarǵa juǵysty bolý úshin qaıtpek kerek? Qalaı zertteý kerek? Qaı baǵytta, qaı qyrynan alyp, saralaý kerek degen máseleler qozǵaldy, – deıdi konferensıa uıymdastyrýshylarynyń biri Saǵatbek Medeýbekuly.

Jıynda sovet dáýirinde tárbıelenip, Máskeýde bilim alsa da, "ultsyzdanbaǵan" saıasatkerdiń "bılik basynda júrip te, júıeniń qatelikterin kórip, sony durystaý úshin kúsh salǵany" aıtyldy. Saıasatkerdiń ómiri men saıası jolyn zertteý mańyzdylyǵy sóz boldy.

"Táýelsiz eldiń táýelsiz azamattary ózderi úshin jáne bolashaq urpaǵy úshin beıbit saıası kúresti búgin bastaımyn dese, Altynbek Sársenbaıulynyń saıası murasy temirqazyq bolýǵa daıyn" dedi baıandamasyn oqyǵan saıasattanýshy Shalqar Nurseıit.

Konferensıa barysynda Altynbek Sársenbaıulynyń jazbalary men ol týraly jazylǵan maqalalar toptastyrylǵan eki kitap tanystyryldy. Uıymdastyrýshylar úshinshi tomǵa osy konferensıa barysynda oqylǵan baıandamalar engiziletinin jetkizdi.

  • Altynbek Sársenbaıuly 1993-2001 jyldar aralyǵynda qoǵamdyq kelisim jáne aqparat mınıstrligin basqarǵan. Keıin Qaýipsizdik keńesiniń hatshysy, Qazaqstannyń Reseıdegi elshisi boldy. 2003 jyly opozısıaǵa ótip, bılikti synady.

  • 2006 jyldyń 11 aqpanynda Altynbek Sársenbaıuly men eki kómekshisin Ulttyq qaýipsizdik komıtetiniń "Arystan" arnaıy jasaǵynyń ofıserleri urlap áketip, eki kúnnen keıin úsheýiniń máıiti Talǵar aýdanyndaǵy Kóktóbe aýylynyń mańyndaǵy saıdan tabyldy. Qastandyqqa tapsyrys berýshi retinde áýeli Senat apparatyn basqarǵan Erjan Ótembaev aıypty dep tanyldy. Keıin bul qylmys eks-prezıdent Nursultan Nazarbaevtyń burynǵy kúıeýbalasy, marqum Rahat Álıev pen UQK-niń eks-tóraǵasy Álnur Musaevqa tańyldy.

  • Osyǵan deıin Almaty oblysynda saıasatker oqyǵan mektepke Altynbek Sársenbaıulynyń esimi berilgen.

Bul maqala týraly ne oılaısyz?