Úkimet basshysy qyzmetinen ketken Álıhan Smaıylov qazaqstandyqtarǵa úndeý jasady.
Ol kópshilikke úndeýin áleýmettik jelidegi paraqshasynda jazdy.
Qurmetti qazaqstandyqtar!
Búgin Memleket basshysy Qazaqstan Respýblıkasy Úkimetiniń ornynan túsýin qabyldady.
Eń aldymen, Prezıdent Qasym-Jomart Kemeluly Toqaevqa syndarly ýaqytta Qazaqstan Respýblıkasynyń Úkimetin basqarýǵa senim bildirgeni úshin zor alǵysymdy bildiremin.
Ótken eki jyl qoǵam úshin sheshýshi kezeń boldy. Memleket basshysy jańa Ádiletti Qazaqstandy qurýǵa baǵyttalǵan asa mańyzdy saıası jáne ekonomıkalyq reformalarǵa bastamashylyq jasady.
Úkimet osy reformalardy iske asyrý jáne elimizdiń turaqty áleýmettik-ekonomıkalyq damýyn qamtamasyz etý úshin qyzmet etti. Úkimet pen jergilikti atqarýshy organdardyń birlesken jumysynyń arqasynda birqatar nátıjelerge qol jetkizildi.
Ótken jyldyń qorytyndysy boıynsha ekonomıkanyń ósýi 5,1%-ti qurady. Barlyq negizgi sektorlar oń damý dınamıkasyn kórsetti. Inflásıa eki esege tómendetildi. Elimizge tartylǵan tikeleı sheteldik ınvestısıalar kólemi eki jyl qatarynan sońǵy onjyldyqtaǵy eń joǵary kórsetkishterdiń biri boldy. Onyń jyldyq kólemi 26-28 mlrd dollardy qurady.
Ulttyq qordyń aktıvteri byltyr 4 mlrd dollarǵa ósip, 60 mlrd dollardan asty. Reıtıńtik agenttikter ulttyq ekonomıkanyń táýelsiz reıtıńi men ınvestısıalyq senimdiligin rastady. Úkimettegi barlyq áriptesterime, sondaı-aq depýtattyq korpýsqa birlesken jáne nátıjeli jumys úshin shyn júrekten rızashylyǵymdy bildiremin.
Sonymen qatar elimizdiń damýyna adal eńbegimen úles qosyp júrgen árbir qazaqstandyqqa alǵys aıtamyn, – dep jazdy Á.Smaıylov.
Eske salsaq, keshe memleket basshysy Úkimetti taratý týraly Jarlyqqa qol qoıdy. Al 7 aqpanda prezıdenttiń tóraǵalyǵymen Úkimettiń keńeıtilgen otyrysy ótedi.
Foto: Álıhan Smaıylovtyń feızbýktegi resmı paraqshasynan
