Premer-mınıstrdiń orynbasary Qanat Bozymbaev birqatar orman qoryqtary órt kesapatyna daıyn emestigin aıtty. Bul týraly ol órt qaýipti kezeńge daıyndyq máseleleri jónindegi keńeste málim etti.
Ekologıa jáne tabıǵı resýrstar mınıstrligi 158 memlekettik orman ıelenýshilerdi tekserdi.
«Buzýshylyqtardyń ishinde janar-jaǵarmaı materıaldarynyń satyp alynbaýy jáne qorynyń joqtyǵy, orman órt sóndirý beketteri ǵımarattarynyń apatty jaǵdaıy nemese olardyń bolmaýy, órt sóndirý munaralarynyń joqtyǵy, arnaıy tehnıkanyń tozýy anyqtaldy. Sondaı-aq jıi kezdesetin buzýshylyqtar: rasıalardyń bolmaýy jáne qorǵanys kıimderiniń bolmaýy» delingen habarlamada.
«Abaı jáne Qostanaı oblystarynda oryn alǵan iri tabıǵı órtterdiń saldary jaqsy esimizde. Árbir qyzmetkerdi órt sóndirý tehnıkasymen, rasıamen jáne qajetti qural-jabdyqtarmen mindetti túrde qamtamasyz etýge erekshe nazar aýdarǵym keledi» dedi Qanat Bozymbaev.
Otyrys qorytyndysy boıynsha premer-mınıstrdiń orynbasary oblys ákimdikterine bir apta ishinde dala órtiniń qaýpin azaıtý boıynsha óńirlik is-sharalar josparyn ázirlep, bekitýdi tapsyrdy.
«Oblys ákimderi óńirlik jospardyń is-sharalarynyń oryndalýyna jeke jaýapkershilikte bolady» dep eske aldy Qanat Bozymbaev.
Sondaı-aq Tótenshe jaǵdaılar mınıstrligine bir apta ishinde aerovızýaldy baqylaý jáne órtti sóndirý úshin kórsetiletin tikushaq qyzmetteriniń kólemin ulǵaıtý boıynsha usynystar engizý tapsyryldy.
«Ekologıa mınıstrligine orman qoryndaǵy órtterdi erte anyqtaý júıelerin ornatý jáne orman sharýashylyǵy men tabıǵatty qorǵaý mekemelerin materıaldyq-tehnıkalyq jaǵynan jańartý boıynsha jumysty kúsheıtý tapsyryldy. Sonymen qatar, órt qaýpi joǵary kezeńde İshki ister mınıstrligi men ákimdikter orman qorynda jeke tulǵalardyń bolýyn boldyrmaý, onyń ishinde múmkin bolatyn órtke jol bermeý sharalaryn qabyldaıdy. Mundaı faktiler anyqtalsa, azamattar zańǵa sáıkes jaýapkershilikke tartylady» dedi úkimet.
Úkimettiń málimetinshe, búginde Tótenshe jaǵdaılar mınıstrliginde 441 órt sóndirý bólimi jumys isteıdi.
«Óńirlerde 230 erikti jasaq, sondaı-aq jergilikti atqarýshy organdardyń 709 laýazymy quryldy. Vıse-premer memlekettik órt sóndirý qyzmeti joq taǵy 49 órt sóndirý beketin qurýdy jedeldetýdi tapsyrdy. Órt qaýpi kezeńine daıyndyq aıasynda 272,5 mıllıon gektar aýmaqta ǵaryshtyq monıtorıń júrgizilýde. Degenmen, spýtnıkterden alynǵan derekter Tótenshe jaǵdaılar mınıstrliginiń stansasyna el aýmaǵynan tolyq ushyp ótkennen keıin birneshe saǵat ótken soń júkteledi. Búgingi tańda sıfrlyq damý, ınovasıalar jáne aeroǵarysh ónerkásibi mınıstrligi vırtýaldy stansıa qurýmen aınalysýda, ol órtti anyqtaý men spýtnıktik sýretti júkteý arasyndaǵy ýaqytty 20-40 mınýtqa deıin qysqartady» dep tolyqtyrdy mınıstrler kabıneti.
