Tiri bolsam, qazaqqa qyzmet etpeı qoımaımyn!

Álıhan Bókeıhan

Altynbekter amanat arqalaǵan kún

12 qyrkúıek 2022 56


Memleketshil tulǵa Altynbek Sársenbaıuly 2006 jyly saıası qastandyqtyń qurbany bolmaǵanda bıyl 60 jasqa tolar edi. Saıasatkerdiń týǵan-týystary, dostary, áriptesteri as berip, quran baǵyshtady.

Ótken senbide Almaty oblysynyń Raıymbek aýdanyndaǵy Saryjaz aýylynyń mektebine Altynbek Sársenbaıulynyń atyn berýge qatysty sharalar ótti.

A.Sársenbaıuly atyndaǵy mektep.

Foto: Asylhan Ábdiraıymuly

Almaty oblysynyń máslıhaty halyqtyń bul usynysyn qoldap, memleketshil tulǵanyń atyn mektepke berý týraly sheshimdi Respýblıkalyq onomastıkalyq komıtetke joldady.

A.Sársenbaıulynyń jary Saltanat Atýsheva.

Sol kúni fýtboldan, voleıboldan aýdan kóleminde jarys ótip, sportshylar baq synasty. Saıasatkermen mektepte birge oqyǵan jora-joldastary as berip, quran baǵyshtady. Eki kúnge sozylǵan is-sharada jurtshylyq altyn uldarynyń atyn ulyqtady.

Sharaǵa Altynbek aǵalarynyń esimin ıelengen alpystan astam jas jetkinshek arnaıy kelipti. Aralarynda dúnıege endi kelgen sábı Altynbekter de bar eken. Tipti búldirshinderdiń biriniń aty-jóni Altynbek Sársenbaı ekenine kýá boldyq.

– Altykenge qastandyq jasalǵan kezde «áli júz Altynbek, myń Altynbek ómirge keledi» dep edim. Sol sózim rasqa aınaldy. Búgin biz sonyń kýási bolyp otyrmyz. Kishkentaı Altynbekter taý tulǵaly aǵalary sıaqty ultyn, memleketin súıetin qaıratker bolsyn, – dedi Rysbek Sársenbaıuly.

R.Sársenbaı.

Kishkentaı Altynbek.





Al búgin – Altynbek Sársenbaıulynyń týǵan kúni. 2006 jyly saıası qastandyqtyń qurbany bolmaǵanda, 60 jasqa tolar edi. A.Sársenbaıulynyń týǵan-týystary men saıasattaǵy serikteri zırat basyna baryp, quran oqydy.

– Altynbek Sársenbaıulynyń orny oısyrap tur. Altekeń myqty ıdeolog, tamasha strateg edi. Ornyn eshkim toltyra alǵan joq. Sonyń saldarynan opozısıa tarap ketti. Bizdiń qoǵamǵa búgin Altynbekteı iri tulǵalar asa qajet, – dedi jýrnalıs, saıasatker Ermurat Bapı.

A.Sársenbaıulynyń mereıtoıyna qatysty sharalar aldaǵy ýaqytta da jalǵasatyn bolady.
Bul maqala týraly ne oılaısyz?