Memleket qarjysyna túsirilgen fılmder halyq suranysyna ıe emes. Bul týraly Májilis depýtaty Dáýlet Muqaev Mádenıet jáne aqparat mınıstri Aıda Balaevaǵa otandyq kınoındýstrıa máselesi boıynsha joldaǵan depýtattyq saýalynda aıtty, dep habarlaıdy alash.kz.

Onyń aıtýynsha, kıno túsirgisi kelgender kóbeıgenimen, olardyń deni óz qarajatyna túsirip jatyr.

«Memleket tarapynan bólingen qarjynyń kóbi óz aralarynda qalyp jatqandaı kórinedi. Óıtkeni Ulttyq kınony qoldaý ortalyǵynyń fılmderi ne suranysqa, ne halyq tarapynan qoldaýǵa ıe emes. Tipti halyq qazynasyndaǵy qarjyny mıllıardtap qumǵa quıyp jatqandaımyz», – dedi ol.

Depýtat ózin-ózi aqtamaǵan birqatar fılmderdi tizdi. Ol memleket tarapynan bólingen qarajatqa túsirilgen fılmderdi de halyqtyń kórip, qýanyp jatqany shamaly ekenin atap ótti.

«Mysaly, 2019-2023 jyldar aralyǵynda otandyq júz fılmge shamamen 23 mıllıard teńge bólingen. Eń qyzyǵy, onyń barlyǵy 100% ıgerilgen, esebi tapsyrylyp, kıno túsirilgen. Atlas Entertainment kompanıasy túsirgen «Vremá patrıotov» fılmine 1 mıllıard qarjy jumsalsa, onyń kasalyq jınaǵy nebári 10 mıllıon teńge bul jumsalǵan sommanyń 1%-y ǵana. Sondaı-aq Sataifilm túsirgen «Boksshy» fılmine 900 mıllıon teńge jumsalsa, kasalyq jınaǵy nebári 25 mıllıon teńge. Kıno óte sapasyz ári kórermenderge áser syılaı almady. Sondaı-aq Medetfilm túsirgen «Leto 41-go» otandyq kınosyna 700 mıllıon teńge bólinse, onyń 2 mıllıony ǵana qaıtarylǵan. Bul ketken sommadan 350 ese az. Al «Jızn» fılmine 500 mıllıon teńge ketse, nábári 650 myń teńgesi qaıtqan. Mysaly, orta eseppen kınoteatrdaǵy kınolardyń baǵasy 2 myń teńgeni qurasa, onda bul fılmdi 325 adam kóripti-mys», – dedi ol.

Sondaı-aq ol kıno óndirýshilerge qatysty problemalardy ashyp aıtty.

«Otandyq kıno óndirýshi uıymdardyń kınoteatrlarda fılmderdi kórsetýinde de ózindik problemalary bar. Ol jarnamanyń álsizdigi, oǵan arnaıy qarajattyń qarastyrylmaýy. Qanshama memleket qarajatyna túsirilgen fılmder shań basqan arhıvterde jatyr», – dedi Dáýlet Muqaev.

Onyń aıtýynsha, Táýelsizdikten beri memleket qarajysyna 600 fılm túsirilse, sonyń ishinde ózin-ózi aqtaǵany bireý ǵana, ol «Dos-Muqasan» fılmi. Depýtat Mádenıet jáne aqparat mınıstri Aıda Balaevaǵa saýalynda memlekttik kınony qoldaý mehanızmin jan-jaqty jetildirýdi usyndy.

Eske salaıyq, buǵan deıin belgili prodúser, shoýmen Nurlan Qoıanbaev keıbir rejıserdiń kıno túsirýine Úkimetten qarajat bólinýine qarsy ekenin aıtqan edi. Onyń aıtýynsha, keıbir rejıser Úkimetten qomaqty qarajat alyp, «bıznes» jasap jatyr.