ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"زيراتتىڭ ورنىن ءوزىم تاڭداپ الدىم". اقتوبەلىك كاسىپكەر ولمەي تۇرىپ وزىنە مولا قازدىرىپ، ەسكەرتكىش قويدىرعان

14 مامىر 2024 2363

اقتوبەلىك كاسىپكەر قۋاندىق الىشيەۆ ەكى جىل بۇرىن قالا ىرگەسىندەگى قورىمنان ورىن الىپ، ەسكەرتكىش ءمۇسىنىن تۇرعىزىپ قويدى. ول مۇنى قاتتى اۋىرعان سوڭ ويلاستىرعانىن ايتادى، دەپ حابارلايدى alash.kz سايتى inbusiness.kz سايتىنىڭ تىلشىسىنە سىلتەمە جاساپ.

اقتوبە قالاسى كىرپىشتى تۇرعىن الابى ماڭىندا ۇلكەن قورىم بار. مۇندا قازاقتارمەن قاتار وزگە ەتنوس وكىلدەرى دە جەرلەنگەن. كىرەبەرىستىڭ سول جاق بولىگىندە ورنالاسقان ەسكەرتكىش ءمۇسىن 2022 جىلى سالىنعان. اكىمشىلىك زيراتتىڭ كاسىپكەر قۋاندىق الىشيەۆكە تيەسىلى ەكەنىن بىلەدى.

"2022 جىلدان باستاپ سالدى. ۇلكەن كىسى ەكەن. الدىن الا كورگىسى كەلگەن شىعار قانداي بولاتىنىن. بار بولعانى 2-3 ايدا سالىپ بولدى. تەك وزىنە عانا ارنالعان. گرانيت تاستى قولدانىپ تۇر. مۇندا بۇعان دەيىن ءدال وسىلاي دايىنداپ قويعان ادام بولدى. ءبىراق ول كىسى قايتىس بولىپ، جەرلەندى. نەگىزى مۇندايدى ۇلكەن كىسىلەر جاسايدى. ولارعا تىيىم سالا دا المايسىڭ. ورىن ساتىلمايدى"، - دەدى كىشپىشتى تۇرعىن الابىنداعى ورىس زيراتىنىڭ اكىمشىسى ءسابيت دۇيسەنوۆ.

ونىڭ ايتۋىنشا، نەگىزى ادامدار قايتىس بولعانى تۋرالى انىقتاما اكەلەدى. سودان كەيىن عانا ورىن بەرىلەدى. جەر تەگىن بەرىلگەنىمەن، مۇنداعى ءقابىر قازۋ قىزمەتى 90 مىڭ تەڭگە تۇرادى.

ءتىرى كەزىندە زيراتتان ورىن الىپ، بەيىتىن سالعان كاسىپكەر وڭ جاعىنا تاسقا قاشاتىپ "باقىتتى ءومىردىڭ بەلگىسى: ابىروي، بالا-ۇرپاقتارىڭ"، ال سول جاعىنا "تىنىمسىز ىزدەنۋ، مازاسىز تىرلىك - مۇراتىڭ" دەپ جازدىرعان.

 - مەن 86 جاستامىن. وسىدان ەكى جىل بۇرىن قاڭتاردا قۇلاپ، بەلىم سىنىپ قالىپ، جاتتىم. سول كەزدە ءوز بالالارىمداي بولعان باستىقتار كەلىپ، دەنساۋلىعىمدى سۇرادى. "اعالارىڭنىڭ ءولىپ قالاتىن ءتۇرى بار، جۇرە المايدى. الماتىدا بالالارىم، ىنىلەرىم، جاقىن دوستارىم كوپ. جەر بەرسەڭدەر، سولار بارلىعىن جاساپ بەرەدى" دەپ ايتتىم. ال زيراتتىڭ ورنىن قىردىڭ ۇستىنەن ءوزىم تاڭداپ الدىم. جەر بەرگەن كىسىلەردى كىنالايتىن ەشتەڭە جوق. سۇراعان مەن كىنالى. مەن سالدىم، - دەدى كاسىپكەر قۋاندىق الىشيەۆ.

ول بەيىتكە قوياتىن ەسكەرتكىش ءمۇسىننىڭ ۇلگىسىن ءوزى تاڭداپ، ءوزى بەكىتكەن.

ايتا كەتەيىك، قۋاندىق الىشيەۆ – اقتوبە وبلىسى تەمىر اۋدانىنىڭ تۋماسى. الماتى زووتەحنيكالىق-مال دارىگەرلىك ينستيتۋتىندا ءبىلىم الىپ، عىلىمي ەڭبەكتەر جازعان. قاراكول قويى قوزىسىنىڭ ەرەكشە ءتۇستى ەلتىرىسىن الۋ جولىن ۇسىنعان. ءتۇرلى جىلدارى سپيرت زاۋىتى، شوشقا فەرماسى، قۇس سەحى بولدى. قازىرگى كەزدە كوپقاباتتى ءۇي سالىپ جاتىر.

بۇل ماقالا تۋرالى نە ويلايسىز؟