ەرەۋىلدەر مەن نارازىلىقتار جيىلەگەن قازاقستاننىڭ باتىسىنداعى جاڭاوزەن قالاسىندا پوليسيا "بيلىكتى سىناپ، ۆيدەو جاريالاعان" بەلسەندىنى تەرگەگەن. بەلسەندى باۋىرجان دوستانوۆتىڭ ازاتتىققا ايتۋىنشا، اۋەلى ونى پوليسيا باسقارماسىنا "وزگە سەبەپپەن شاقىرعان".
– ماعان 19 مامىردا تۇسكە قاراي پوليسيا قىزمەتكەرى كەلىپ شاقىرتۋ قاعازىن بەردى. ايتۋىنشا “مەن كەشە كولىگىممەن بىرەۋدى قاعىپ كەتە جازداپپىن”. بۇل جالعان. سەبەبى مەنىڭ كولىگىمنىڭ جۇرمەي تۇرعانىنا ءبىر جەتىدەن استى. ءبىراق شاقىرعان سوڭ ساعات 17-دە پوليسيا باسقارماسىنا باردىم،- دەيدى ول.
باۋىرجان دوستانوۆ وزىنە پوليسيا وكىلدەرىنىڭ “نەگە پرەزيدەنتتى، بيلىكتى، ۇكىمەتتى ءجيى سىناعان ۆيدەولار جاريالايسىز؟”، “پوليسيا قىزمەتكەرلەرىن نەگە جاعىمسىز قىلىپ كورسەتەسىز؟” ءتارىزدى سۇراقتار قويعانىن ايتادى. ول ءوزىن فورماداعى پوليسيا وكىلىنەن بولەك قاراپايىم كيىنگەن ادامداردىڭ دا جاۋاپ الۋعا قاتىسقانىن، ولاردىڭ ۇستەلدى ۇرعىلاپ، جەكىرىپ، ءوزىن قورقىتپاق بولعانىن دا ايتىپ بەردى.
– مەن ءوز ويىمدى ايتۋعا قۇقىم بار ەكەنىن، بيلىكتى سىناۋدى دوعارمايتىنىمدى ايتتىم. “قاڭتار مەن جاڭاوزەن وقيعاسىنىڭ شىندىعىنىڭ اشىلۋىن تالاپ ەتۋدى جالعاستىرامىن، ەشتەڭەدەن قورىقپايمىن” دەپ جاۋاپ بەردىم، - دەيدى ول.
بەلسەندى كەشكى ساعات بەستەن تۇنگى توعىزعا دەيىن تەرگەۋدە بولعانىن ايتتى.
ماڭعىستاۋ وبلىستىق پوليسيا دەپارتامەنتىنىڭ باسپا ءسوز قىزمەتى ازىرگە وقيعاعا قاتىستى تۇسىنىكتەمە بەرمەدى.
56 جاستاعى باۋىرجان دوستانوۆ “وزەنمۇنايسەرۆيس” مەكەمەسىندە ماشينيست بولىپ جۇمىس ىستەيدى. ول بيىلعى قاڭتارداعى اۆتوگاز باعاسىنىڭ قىمباتتاۋىنا قارسى ون كۇنگە سوزىلعان نارازىلىق ميتينگىسىنە دە بەلسەنە قاتىسقان. ينتەرنەتتە ءوزىنىڭ جەكە ارناسىن جۇرگىزىپ، وندا بيلىك پەن دەپۋتاتتاردىڭ ارەكەتىن ءجيى سىنعا الادى. سوڭعى ۆيدەولارىنىڭ بىرىندە ول كۇشتىك قۇرىلىم وكىلدەرىنىڭ ارەكەتىن سىناعان.
قازاقستاندا الەۋمەتتىك جەلىدەگى جازبالارعا بيلىك مونيتورينگ جاساپ، قۇقىق قورعاۋ ورگاندارى ءجيى ءىس قوزعاپ جاتادى. بىلتىر قۇرىلتايشىسى بۇرىنعى ۇقك وتستاۆكاداعى قىزمەتكەرى بولعان “ار-بەدەل” قوعامدىق قورى دا ونداعان بەلسەندىنىڭ ۇستىنەن شاعىم ءتۇسىرىپ” پرەزيدەنت قاسىم-جومارت توقايەۆ پەن بۇرىنعى پرەزيدەنت نۇرسۇلتان نازاربايەۆتىڭ ار- وجدانىنا ءتيدى”، “قوعامدا الاۋىزدىق تۋدىردى” دەپ ايىپتاپ سوتقا بەرگەن. سوت كەيىن ءىستى قىسقارتقان.
