بالابييەۆتىڭ ايتۋىنشا، جامبىل وبلىسى اعىن سۋدى ترانسشەكارالىق وزەندەردەن الادى. ونىڭ 82 پايىزى قىرعىز رەسپۋبليكاسىنان كەلەدى. وسى جىلدىڭ شىلدە-تامىز ايلارىندا قىرعىزستاننان بەرىلەتىن 3،5 ملن تەكشە مەتر سۋدىڭ تاۋسىلۋىنا بايلانىستى بەرىلگەن سۋ توقتاتىلعانى بەلگىلى. وسىعان بايلانىستى شىلدە-تامىز ايلارىندا جامبىل وبلىسىنىڭ التى اۋدانىندا اعىن سۋ تاپشىلىعى ورىن الىپ، 9 مىڭ گەكتار القاپتاعى ەگىس زارداپ شەككەن. شىعىن كولەمى 3،6 ملرد تەڭگە. جامبىل مەن تۇركىستان وبلىسىندا سۋارمالى جەرلەر 300-500 مىڭ گەكتارعا جەرگە دەيىن جەتەدى.
«بۇل وبلىستىڭ ءبارى ترانسشەكارالىق اۋىل شارۋاشىلىعى ءوڭىرى بولعاندىقتان سۋ ءار ۋاقىتتا قاجەت. ءوزىڭىز جامبىل وبلىسىن باسقارعان تۇستا شارۋالاردى سۋدان تارىقتىرىپ الدىڭىز. سۋ سالاسىنىڭ ءمينيسترى بولىپ جۇرگەن كەزدە ماقتاشىلارعا سۋ جەتكىزە المادىڭىز. كۇنگەيدەگى شارۋالاردىڭ شىرىلداپ جۇرگەندە كۇز دە ءوتىپ كەتتى. ءبىزدىڭ ەلىمىزدە بەرىلەتىن ترانسشەكارالىق وزەن سۋلارىن ارتتىرۋ ماسەلەسى قاراستىرىلا ما؟ ماسەلەنى قانداي جولدارمەن شەشپەكسىزدەر؟ قاشانعى كىسىدەگىنىڭ كىلتى اسپاندا دەمەكشى كورشىلەردىڭ كوڭىلىنە قارايمىز؟ كىرىپتارلىقتان قۇتىلاتىن كۇن بار ما؟ بيىلعى قۇرعاقشىلىقتىڭ كەلەشەكتە قايتالانباۋىنا قانداي كەپىلدىكتەر بار؟» - دەپ سۇرادى مينيستردەن دەپۋتات.
بۇل سۇراققا جاۋاپ بەرگەن مينيستر نۇرجىگىتوۆ راسىندا دا، بيىل جامبىل وبلىسىندا سۋ تاپشىلىعىنا بايلانىستى شارۋا قوجالىقتار زارداپ شەككەنىن ايتادى. بۇل جالپى «جىلدىڭ جامبىل وبلىسىنداعى تالاس پەن شۋ وزەنى بويىنشا سۋلىعىنا بايلانىستى بولدى» دەيدى. سەبەبى قىرعىزستاندا سۋ مولشەرى سونداي دەڭگەيدە بولدى دەپ تۇسىندىرەدى.
«ال ەندى ترانسشەكارالىق وزەندەر بويىنشا كەلىسىمدى قالاي جۇرگىزەمىز؟ قىرعىزستانمەن مىسالى 2000 جىلى ەكىجاقتى ترانسشەكارالىق وزەندەردى پايدالانۋ جاعىنان كەلىسىمدەرىمىز بار. سول كەلىسىمشارتقا بايلانىستى تالاس وزەنى 50/50 مولشەرىندە، ال شۋ وزەنى 42/58 پايىز بولىنگەن. سوندىقتان، ءار جىلدىڭ ءوزىنىڭ سۋلىلىعىنا بايلانىستى سۋ كولەمى بولىنەدى. ءبىزدىڭ تاراپتان ونى كوتەرۋ ماسەلەسىن ءبىز قاراستىرىپ جاتقان جوقپىز. سەبەبى ناقتى پايىزدىق مولشەرى بار»، - دەيدى ول.
ءمينيستردىڭ سوزىنشە، ورتالىق ازياداعى بەس مەملەكەت 1992 جىلى تۋرا سونداي كەلىسىم جاساعان. سول كەلىسىمدە بۇرىنعى كەڭەس وداعىنداعى سۋ قالاي بولىنەدى – تۋرا سونداي كولەم راستالعان.
«اتاپ ايتقاندا، سىرداريا وزەنىندە سۋ كوپ بولسا، بىزگە قازاقستانعا 12 تەكشە شاقىرىم سۋ بەرىلەدى. سوندىقتان، بۇل جۇمىستار تەك كەلىسسوزدەر ارقاسىندا اتقارىلىپ جاتىر»، - دەيدى نۇرجىگىتوۆ.
ەسكە سالا كەتەيىك، نۇرجان نۇرجىگىتوۆ سۋ رەسۋرستارى جانە يرريگاسيا ءمينيسترى قىزمەتىنە بيىل قىركۇيەكتە تاعايىندالعان ەدى.
