ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"زاڭ شىقتى دەپ نەشە جىل وتاسقان كۇيەۋلەرىنە كۇيە جاعىپ جاتقان ايەلدەردى قۇداي كەشىرسىن" - ايتىسكەر اقىن

20 ماۋسىم 2024 582

ەلگە بەلگىلى ايتىسكەر اقىن سارا توقتامىسوۆا تۇرمىستىق زورلىق-زومبىلىققا قارسى زاڭ جوباسىنا قاتىستى پىكىر ءبىلدىردى.اقىن ءوز سوزىندە زاڭ شىقتى ەكەن دەپ كۇيەۋلەرىنە جالا جاباتىن ايەلدەر دە بوي كورسەتىپ جاتقانىن ايتتى. بولعان جايتتى جۇرتقا جايىپ، ءجونسىز-جوباسىز كۇيەۋىنە قارا كۇيەنى جاعىپ، ءوزى سۇتتەن اق، سۋدان تازا بولاتىن ايەلدەر ارەكەتىنىڭ دۇرىس ەمەس ەكەندىگىن جەتكىزدى، دەپ حابارلايدى Alash.KZ ۇلتتىق پورتالى. 

ايتىسكەر اقىن جۇبايلىق ءومىردىڭ ءتۇرلى ساتتەرىنىڭ ءبارىن ينستاگرامعا سالا بەرۋگە قارسى:

ءقازىر بىزگە بىرەۋدىڭ ءومىرى وتە قىزىق. 24 ساعاتتىڭ 18 ساعاتىندا «ايەلى بىلاي دەپتى»، «كۇيەۋى نە جاۋاپ بەردى ەكەن» بوتەن وتباسىنىڭ پاراقشاسىن اڭدۋمەن وتىرامىز . جۇبايلىق ءومىردىڭ ءتۇرلى ساتتەرى بولادى عوي. سونىڭ ءبارىن ينستاگرامعا سالا بەرۋگە قارسىمىن ءوز باسىم. ءقازىر الەۋمەتتىك جەلىدە وتباسىلىق ءومىردى تالقىلاۋ جەلدەي ەسىپ كەتتى.
مەن زورلىق-زومبىلىق، ۇرىپ-سوعۋ دەگەنگە تۇبەگەيلى قارسىمىن. «قارسى ەمەسپىن» دەيتىن ايەل جوق شىعار. قيسىق قابىرعاڭنان جاراتىلعان جاندى ءوز الەمىڭە ساي ەتىپ تۇزەپ الام دەۋ ەڭ اقىماق ەركەكتىڭ قاعيداسى. ونى ۇرىپ-سوعىپ تاربيەلەي المايسىڭ. ەگەر ايەلىڭ كوزىڭە جىن بوپ كورىنسە، باسقا جولىن تاپ. ودان با بوساتا سال. ۇرىپ-سوعىپ، اكە-شەشەسىنەن بوقتاپ جونگە سالۋ دەگەن بوس اۋرەشىلىك. ايەلگە قولىن تيگىزىپ، اكە-شەشەسىنەن بوقتاعان كۇنى ەركەك ءوزىنىڭ «ەركەك» دەگەن قۇنىن ءتۇسىرىپ الادى. وسىنى ويلاڭدار، ازاماتتار.

سارا توقتامىسوۆا ءوز جازباسىندا زاڭدى ارقالانىپ پالەن جىل وتاسقان كۇيەۋلەرىن حالىق جاۋى قۇساتىپ ۇستاپ بەرىپ جاتقان ايەلدەردىڭ دە بوي كورسەتىپ جاتقانىنا قىنجىلىس ءبىلدىردى: 

مۇنىڭ ەكىنشى جاعى بار. قازاقستاندا زاڭ شىقتى ەكەن دەپ پالەن جىل وتاسقان كۇيەۋلەرىن حالىق جاۋى قۇساتىپ ۇستاپ بەرىپ جاتقان ايەلدەر دە شىعىپ جاتىر. ءبىزدىڭ، ايەلدەردىڭ، ءتىلىمىز وتە ۇزىن. «قوي» دەگەندە قويا سالماي كەي جىگىتتىڭ ءتىلىن شىعارامىز.

سوندىقتان بولعان جايتتى جۇرتقا جايىپ، ءجونسىز-جوباسىز كۇيەۋىنە قارا كۇيەنى جاعىپ، ءوزى سۇتتەن اق، سۋدان تازا بولاتىن ايەلدەردى قۇداي كەشىرسىن. ەشقاشان تەك ءبىر جاق كىنالى بولمايدى، سونى ساراپقا سالىپ ويلانۋ كەرەك دەپ ويلايمىن.
بىرەۋدىڭ ومىرىنە ارالاسىپ، پىكىر جازىپ ۋاقىتىڭدى بوس كەتىرمەي، وزىڭمە اينالىس،وزىڭە ارنا ۋاقىتتى، - دەپ جازدى ايتىسكەر.  

بۇل ماقالا تۋرالى نە ويلايسىز؟