جاڭادان قۇرىلىپ جاتقان ۇلىتاۋ وبلىسىنا جەزقازعان، قاراجال، ساتبايەۆ قالالارى، جاڭاارقا مەن ۇلىتاۋ اۋداندارىن ەنگىزۋ ۇسىنىلدى. وبلىس ورتالىعى جەزقازعان قالاسى بولادى. ال قاراعاندى وبلىسىنىڭ قۇرامىندا قاراعاندى، بالقاش، ساران، تەمىرتاۋ، شاحتينسك، پريوزورسك قالالارى، بۇعان قوسا جەتى اۋدان: اباي، اقتوعاي، بۇقار جىراۋ، قارقارالى، نۇرا، وساكاروۆ جانە شەت اۋداندارى قالادى. بۇل جونىندە قاراعاندى وبلىسى اكىمدىگىنىڭ رەسمي سايتى حابارلادى.
وبلىستىق ءماسليحاتتىڭ كەزەكتەن تىس سەسسياسىندا وبلىستىڭ جاڭا اكىمشىلىك-تەرريتوريالىق ءبولىنىسى تالقىلانعان.
اقپاراتقا قاراعاندا، عىلىمي ساراپتاما جۇرگىزىلىپ، عالىمدار وبلىستى ءبولۋدىڭ دۇرىس شەشىم ەكەنىن راستاعان. ءقازىر "ەكونوميكالىق ەسەپتەۋلەر جۇرگىزىلىپ جاتىر". ۇكىمەتكە قاراعاندى وبلىسىنىڭ شەكاراسىن وزگەرتۋ ۇسىنىلادى. سحەمالىق كارتا جوباسى ازىرلەنگەن.
پرەزيدەنت قاسىم-جومارت توقايەۆتىڭ ناۋرىز ورتاسىنداعى حالىققا جولداۋىنان كەيىن قازاقستاندا تاعى ءۇش وبلىس پايدا بولاتىنى بەلگىلى بولعان: شىعىس قازاقستان وبلىسىنىڭ سەمەي ايماعىندا – اباي وبلىسى، قاراعاندى وبلىسىنىڭ جەزقازعان وڭىرىندە – ۇلىتاۋ، الماتى وبلىسى اۋماعىندا جەتىسۋ وبلىسى قۇرىلادى.
بۇعان دەيىن ءۇش وبلىس ماۋسىم ايىنا دەيىن قۇرىلۋى مۇمكىن ەكەنى حابارلانعان.
