ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ۇلت كوسەمى: قازاقتىڭ وقىعان ازاماتتارى، قازاققا وسىندايدا قىزمەت ەتپەگەندە، قاشان قىزمەت ەتىپ، پايدامىزدى تيگىزەمىز؟

22 مامىر 2024 330

مايداندا ناۋقاستانعان جىگىتتەردى زەمسكي سويۋزدىڭ مايدانداعى اۋرۋحانالارىنا جىبەرەدى. وندا دوكتورلار، فەلدشەرلەر قازاقشا،اۋىرعان جىگىتتەر ورىسشا بىلمەيدى. درۋجيناداعى جىگىتتەردىڭ ءوز اراسىنان قويىلعان ءتىلماشتار ءجوندى ءتىل بىلمەگەن سوڭ، اۋرۋدىڭ جايىن جەتكىزىپ ايتا المايدى. بۇل جايدى جەتكىزگەن سوڭ، زەمسكي سويۋز بىزگە: "تەز وزدەرىڭ دوكتورلارىڭدى، فەلدشەرلەرىڭدى تاۋىپ بەرىڭدەر، ءبىز ولاردى وزدەرىڭنىڭ قازاقتارىنا قويالىق"،- دەيدى.

بەرەتىن ايلىق اقشاسى: دوكتورلارعا جالوۆانيە ايعا 300-350 سوم، كيىمگە 400 سوم (ءبىر رەت بەرىلەدى)، راسحودىنا 90 سوم، پاتەر سويۋزدان، جول ءجۇرىسى اقشاسىز.

فەلدشەرلەرگە جالوۆانيە 190 سوم، كيىمدىك 200 سوم، باسقا جاعى دوكتورلاردىكى سياقتى.

جوعارعى قىزمەتتەرگە بارۋعا تىلەگەن ازاماتتار عالي حانعا تەلەگرام بەرسىن: مينسك، زەمگورسويۋز، فرونت، بۋكەيحانوۆۋ.

ءبىزدىڭ ءوتىنىش قازاق دوكتورلار، فەلدشەرلەر وسىعان كەلۋى. ءبىز دوكتور، فەلدشەرلەردى شاقىرعالى، گازەتكە جازعالى ءبىرتالاي ۋاقىت بولدى، بۇل كۇنگە شەيىن كەلگەن، ياكي كەلەمىن دەگەن ءبىر كىسى بولماي تۇر.

قازاقتىڭ وقىعان ازاماتتارى، قازاققا وسىندايدا قىزمەت ەتپەگەندە، قاشان قىزمەت ەتىپ، پايدامىزدى تيگىزەمىز؟

كىسى تەز كەرەك. تالاپكەر پەريەۆودشيكتەر جوعارعى ادرەسكە ءھام "قازاق" باسقارماسىنا تەلەگرامم بەرسىن.

ءاليحان بوكەيحان

"قازاق" گازەتى، №221، 09.03.1917 جىل. مينسكى

دەرەككوز: بوكەيحان ءا. شىعارمالارى. IX توم.- استانا، 2018

Alash.kz ۇلتتىق پورتالى

بۇل ماقالا تۋرالى نە ويلايسىز؟