ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ۇلى ابايدىڭ اكەسى قۇنانباي وسكەنباي ۇلىنىڭ 220 جىلدىق مەرەيتويى اتالدى

16 ماۋسىم 2024 262
بيىل قازاق تاريحىندا ەلەۋلى ءىز قالدىرعان كورنەكتى تاريحي تۇلعا، ۇلى ابايدىڭ اكەسى، قارا قىلدى قاق جارعان بي، قوعام قايراتكەرى، ءۇش جۇزگە اتى ءمالىم قۇنانباي وسكەنباي ۇلىنىڭ تۋعانىنا 220 جىل تولدى. مەرەيتوي قازاق ادەبيەتىنىڭ الىبى اباي جۇرتشىلىعىندا، كيەلى قاراۋىلدا اتاپ ءوتىلدى، دەپ حابارلايدى Alash.KZ ۇلتتىق پورتالى. 
 
مەرەيتوي جىلىندا قاراۋىلدا اباي جۇرتشىلىعى باستاماشى بولىپ، ىسكەر ازاماتتار قارجىلىق قولداۋ جاساپ، قۇنانباي قاجى مەشىتى سالىندى. سونىمەن قاتار، ايبىنىن اسقاقتاتار ساۋلەتتى ەسكەرتكىش تۇرعىزىلدى. بۇگىندە قاسيەتتى اباي ەلىندە قۇنانباي بابا رۋحىنا ارناپ ايتۋلى اس بەرىلىپ جاتىر.

مەرەيتوي اياسىندا رەسپۋبليكالىق قولونەرشىلەر بايقاۋى، ات بايگەسى ۇيىمداستىرىلعان. ۇلتتىق كۇرەستەن ءدۇبىرلى سايىستار ءوتىپ جاتىر. قاراۋىلدا اقىندار قۇنانبايعا ارنالعان ولەڭ-جىرلارىن وقىدى. ال كورنەكتى تاريحشىلار مەن ادەبيەتشىلەر سەمەيدە باس قوسىپ، حالىقارالىق دەڭگەيدە قۇنانباي وسكەنباي ۇلىنىڭ تاريحي تۇلعاسىن، بەكزادا بولمىسىن تانىتىپ، ۇلىقتاۋ ۇستىندە. اباي وبلىسى اكىمىنىڭ ورىنباسارى ادىلبەك مۇسابايەۆ مەرەيتويعا قاتىستى: 

"بۇل تويدىڭ ەرەكشەلىگى – 500 بالانىڭ ءبىر ۋاقىتتا اشامايعا وتىرىپ، جەڭىمپازدارعا جۇلدە قورلارى قازاقى داستۇرمەن "ۇيىرىمەن ءۇش توعىز" بولىپ بەرىلۋىندە. ەندەشە، وسىناۋ مەرەيلى كۇنى قاسيەتتى اباي ەلىندە ۇلىلار رۋحىنا تاعزىم ەتىپ، دالا دانىشپانى قۇنانباي باباعا قۇرمەت پەن قوشەمەت كورسەتۋ – بارشامىزدىڭ ادامشىلىق بورىشىمىز دەپ بىلەمىز" - دەپ پىكىر ءبىلدىردى.  

ناقتىلاپ وتەيىك، مەرەيتوي قارساڭىندا سەمەيدە قۇنانباي وسكەنباي ۇلىنىڭ 220 جىلدىعىنا ارنالعان «قۇنانباي وسكەنباي ۇلى: تۇلعا، تاريح، فەنومەن» حالىقارالىق عىلىمي-تاجىريبەلىك كونفەرەنسياسى ءوتتى. عىلىمي جيىندى اباي وبلىسى اكىمدىگى، Shakarim University، اباي مۋزەيى بىرلەسە ۇيىمداستىردى.
بۇل ماقالا تۋرالى نە ويلايسىز؟