ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"ۋكراينا جاساسىن!". ۋكراينا-رەسەي سوعىسىنا قاتىستى اشىق پىكىر بىلدىرگەن زەينەتكەر 2 جىلعا سوتتالدى

25 مامىر 2024 738

سۋديا ماديار ءابدىراسيلوۆ 63 جاستاعى قاليما جاپاروۆانىڭ قوعامدىق ورىنداردا ءوزىنىڭ ساياسي كوزقاراسىن اشىق بىلدىرگەنىن ايىپتاپ، قىلمىستىق كودەكستىڭ "الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرۋ" بابىمەن (174-باپ) كىنالى دەپ تانىدى. جاپاروۆا رەسەيدىڭ ۋكرايناعا قارسى باسقىنشىلىعىنا قاتىستى ءوزىنىڭ ازاماتتىق پىكىرىن بىلدىرگەن. كەشە 7 ايدان بەرى قاماۋدا جاتقان زەينەتكەر سوت زالىنان بوساتىلدى، دەپ حابارلايدى Alash.KZ ۇلتتىق پورتالى. 

23 مامىردا سوت وتىرىسىنداعى جارىسسوزدە پروكۋرور قاليما جاپاروۆا 2020 جانە 2023 جىلدارى شىمكەنتتە قوعامدىق كولىكتە ورىس ۇلتىنىڭ وكىلدەرىنە "ارازدىقتى قوزدىراتىن ءسوز ايتقانىن" جەتكىزگەن. جاپاروۆا رەسەيدىڭ ۋكرايناعا شابۋىلىن ايىپتاعاندا ءوزىنىڭ پىكىرىن ايتىپ، "فاشيستەر" دەگەن سياقتى تىركەستەر قولدانعان.

ونىڭ قاماۋدا جاتقان ءبىر كۇنى جازا مەرزىمىنىڭ ەكى كۇنىنە ەسەپتەلىندى. سۋديا جازا تاعايىنداۋ كەزىندە سوتتالۋشىنىڭ جاسى مەن دەنساۋلىعى ەسكەرىلگەنىن اتاپ ءوتتى.

"ازاتتىقتىڭ" حابارلاۋىنشا، سوتتا زەينەتكەر جاپاروۆا “ۋكراينا جاساسىن!” دەپ ايعايلاعان.

ناقتىلاي كەتەيىك، ءىس وربىگەندە ادا ليپينسكايا ەسىمدى ازامات پوليسياعا ارىزدانعان. ايعاق رەتىندە وقيعا كەزىندە تۇسىرىلگەن ۆيدەوجازباسىن دا ۇسىنعان. ءبىراق كەيىن ول ايىپتالۋشىعا كەشىرىم بەرىپ، ءىستىڭ قىسقارۋىنا قارسى ەمەس ەكەنىن جەتكىزگەن.

تەرگەۋشى وقيعانىڭ جاي-جاپسارىن انىقتاۋ بارىسىندا جاپاروۆاعا باسقا دا ايىپتاردى تەلدى. "2020 جىلى دا ءدال وسىلاي ۇلت ارازدىعىن قوزدىراتىن زاڭبۇزۋشىلىققا باردى" دەگەن ايعاق تاۋىپ، ىسكە قوسادى. پروكۋرور زەينەتكەردى سول ايعاق نەگىزىندە 4 جىل باس بوستاندىعىنان ايىرۋدى سۇرادى.

“قىلمىستىق كودەكستىڭ "الەۋمەتتىك، ۇلتتىق، رۋلىق، ناسىلدىك، تەكتىك-توپتىق نەمەسە ءدىني الاۋىزدىقتى قوزدىرۋ" بابىمەن قوزعالعان قىلمىستىق ءىس ەكسترەميستىك قىلمىسقا جاتادى. زاڭ بويىنشا سوت تەرگەۋى جابىرلەنۋشىنىڭ ارىزىنسىز تەرگەلەدى”، – دەدى سۋديا ءابدىراسيلوۆ سوت ۇكىمىن تۇسىندىرگەندە.

قاليما جاپاروۆا جارىسسوزدە تاعىلعان ايىپتى مويىندامايتىنىن، تەك "رەسەي وككۋپانتتارىنىڭ ۋكرايناعا شابۋىلىن ايىپتاعانىن" جەتكىزگەن. ول سوتتان ءوزىن اقتاپ، سوت زالىنان بوساتۋدى سۇراعان.

ەستەرىڭىزگە سالا كەتەيىك، 63 جاستاعى قاليما جاپاروۆا 2023 جىلدىڭ قاراشا ايىندا قاماۋعا الىنعان. قازاقستاندىق قۇقىققورعاۋشىلار ونى سوت سانكسياسىمەن قاماۋدا جاتقاندا “ساياسي تۇتقىندار” تىزىمىنە قوسقان. 

بۇل ماقالا تۋرالى نە ويلايسىز؟