ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ۋكراينا اسكەرى سيريادا سوعىسقا قاتىسقان رەسەيلىك مايوردىڭ كوزىن جويدى

31 ناۋرىز 2022 81
 



ۋكراينا اسكەرى توسك گارنيزونى ورتالىق اسكەري وكرۋگىنىڭ (ورىنبور وبلىسى) بارلاۋ تانك ديۆيزياسى باتالونىنىڭ كومانديرى بولعان 32 جاستاعى سەرگەي الەكساندروۆيچ پانوۆتى ولتىرگەنى تۋرالى حابارلادى.

بۇل تۋرالى Telegram-ارناسىندا ۋكراينا ىشكى ىستەر مينيسترلىگى باسشىسىنىڭ كەڭەسشىسى انتون گەراششەنكو مالىمدەدى. وندا ۋكراينا قارۋلى كۇشتەرى قانداي جاعدايدا پانوۆتى ولتىرگەنى ايتىلمايدى.
«گۆارديا مايورى 200ء-شى اسكەرگە ۋكراينادان ورىنبور وبلىسىنا اتتاندى» دەلىنگەن حابارلامادا.

پانوۆ بۇعان دەيىن «رەسەي فەدەراسياسىنىڭ بىتىمگەرشىلىك كۇشتەرى» (رەسەي قارۋلى كۇشتەرى) قۇرامىندا سيرياداعى سوعىسقا قاتىسىپ، سيريا پرەزيدەنتى باشار اسادتىڭ رەجيمىن قولداعانى بەلگىلى.

ەسكە سالساق، رەسەي پرەزيدەنتى ۆلاديمير پۋتين دونباس رەسپۋبليكالارى باسشىلارىنىڭ ۇندەۋىنە جاۋاپ رەتىندە ارنايى اسكەري وپەراسيا جۇرگىزۋ تۋرالى شەشىم قابىلداپ، ۋكرايناعا قارسى سوعىس جاريالادى. الايدا رەسەي باسشىسى ماسكەۋ جوسپارىندا ۋكراينا اۋماقتارىن باسىپ الۋ جوق ەكەنىن ايتقان بولاتىن.

2 ناۋرىز كۇنى تاڭەرتەڭگى جاعداي بويىنشا رەسەي اسكەرى 5840 ادامنان ايىرىلدى. سونداي-اق 60-تان استام ۇشاق پەن تىكۇشاق، 862 برونەترانسپورتەر، 85 ارتيللەريالىق جۇيە جانە باسقا دا كوپتەگەن تەحنيكا جويىلدى. 28 اقپانداعى جاعداي بويىنشا 352 بەيبىت تۇرعىن، ونىڭ ىشىندە 16 بالا قازا تاۋىپ، 2040 ادام جاراقات الدى.

ۋكراينا پرەزيدەنتى ۆلاديمير زەلەنسكيي رەسەي اسكەرىنىڭ شابۋىلدىڭ العاشقى ساعاتتارىنان باستاپ ازاماتتىق ينفراقۇرىلىمعا سوققى بەرىپ جاتقانىن ايتتى. پرەزيدەنتتىڭ ايتۋىنشا، رەسەي باسقىنشى اسكەرلەرىنىڭ ۋكرايناداعى ارەكەتتەرىندە گەنوسيد بەلگىلەرى بار.

27 اقپاندا ۋكراينا «باسقىنشىلىقتى اقتاۋ ماقساتىندا گەنوسيد ۇعىمىن بۇرمالاعانى ءۇشىن رەسەيدى جاۋاپقا تارتۋدى» تالاپ ەتىپ، حالىقارالىق سوتقا رەسەيگە قارسى شاعىم ءتۇسىردى. رەسەيدىڭ ۋكرايناعا باسىپ كىرۋىنە قاتىستى تەرگەۋدى حالىقارالىق قىلمىستىق سوتتىڭ پروكۋرورى كارىم حاننىڭ ءوزى باستادى.





دەرەككوز
بۇل ماقالا تۋرالى نە ويلايسىز؟