قازاقستان ۇكىمەتى قاڭتار وقيعاسى كەزىندە بۇلىنگەن الماتىداعى پرەزيدەنت رەزيدەنسياسىن بۇزۋعا 6 ملرد تەڭگە (قازىرگى دوللار باعامى بويىنشا 13 ملن دوللاردان استام) قاراجات بولەدى. بۇل جونىندە 7 ساۋىردە قارجى ۆيسە-مينيسترى تاتيانا ساۆەليەۆا حابارلادى.
قاڭتار وقيعاسى كەزىندە الماتىداعى پرەزيدەنت رەزيدەنسياسىن نارازىلار باسىپ العان. عيمارات ىشىندە ءورت بولعان. اقپاندا جەرگىلىكتى اقپارات قۇرالدارى پرەزيدەنت ىستەرى باسقارماسىنا سۇيەنە وتىرىپ، عيماراتتىڭ ءبىرىنشى قاباتىنا "بۇلىكشىلەر كولىك ايداپ كىرىپ، جارعان، عيمارات ورتەنگەن" دەپ جازدى.
ناۋرىزدا بيلىك عيماراتتى بۇزۋ تۋرالى شەشىم شىعارعان. قايتا جوندەۋ جانە دامۋ جونىندەگى قازاقستاندىق كوپ سالالى ينستيتۋتتىڭ ديرەكتورى جۇماعۇل نۋگۋجينوۆ پرەزيدەنت تەلەراديوكەشەنى جاريالاعان فيلمدە عيمارات ايرىقشا بەلگىسىنەن ايىرىلعاندىقتان ونى تولىق ءسۇرۋ قاجەتتىگىن ايتقان.
قارجى ۆيسە-مينيسترى تاتيانا ساۆەليەۆا 7 ساۋىردە "2022-2024 جىلدارعا ارنالعان رەسپۋبليكالىق بيۋدجەت تۋرالى" زاڭعا ەنگىزىلەتىن تۇزەتۋلەردى تانىستىرۋ كەزىندە "قاڭتار وقيعاسىنىڭ سالدارىن جويۋعا" ۇكىمەت 31 ملرد تەڭگە قاراجات قاراستىرىپ وتىرعانىن ايتتى. 21 ميللياردى الماتى مەن وزگە وڭىرلەردەگى شاعىن جانە ورتا بيزنەس سۋبەكتىلەرىن قولداۋعا جۇمسالادى.
الماتىداعى نازاربايەۆ كوشەسىنىڭ بويىندا ورنالاسقان پرەزيدەنت رەزيدەنسياسى وسىعان دەيىن "قازاقستاننىڭ ءبىرىنشى پرەزيدەنتى – ەلباسىنىڭ رەزيدەنسياسى" رەتىندە رەسپۋبليكالىق ماڭىزى بار تاريحي جانە مادەني ەسكەرتكىشتەر تىزىمىندە بولعان. ناۋرىزدىڭ سوڭىندا ونىڭ تاريحي ەسكەرتكىشتەر تىزىمىنەن الىنعانى بەلگىلى بولدى.
