ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"ۇكىمدى وزگەرتۋگە توقايەۆتىڭ قۇزىرەتى جوق: ماسىموۆكە راقىمشىلىق جاسالا ما؟

17 ماۋسىم 2024 269
بەلگىلى جۋرناليست گۇلنارا باجكەنوۆا كارىم ءماسىموۆتىڭ پرەزيدەنتتەن كەشىرىم سۇراپ، راقىمشىلىق جاساۋىن وتىنگەنى جايىندا ءوز ويىن ايتتى دەپ حابارلايدى Alash.kz سايتى   Dalanews.kz سايتىنا سىلتەپ.

"مەن ءماسىموۆ پرەزيدەنتتەن كەشىرىم سۇراعانىن ەستىگەن كەزىمدە، ونىڭ بوستاندىققا شىعۋى قانشالىق مۇمكىن ەكەنىن ەمەس، نە ءۇشىن كەشىرىم سۇراعانىن ويلاي باستادىم. ول وقىعان، ءبىلىمدى ادام بولا تۇرا كەشىرىم سۇراعانى قالاي دەپ ويلادىم. سەبەبى راقىمشىلىق ول كوبىنە ءولىم جازاسىنا قاتىستى بەرىلەدى. قازاقستاندا دا، الەم ەلدەرىندە دە پرەزيدەنتتەر ءولىم جازاسىنا كەسىلگەن ادامعا راقىمشىلىق جاساي الادى. ءولىم جازاسىنا كەسىلەردەن 1 مينۋت بۇرىن كەشىرگەن كەزدەر دە بولعان. مۇنى پرەزيدەنت جانىنداعى كوميسسيا دا شەشەدى. قازاقستاندا ءولىم جازاسى الىنىپ تاستالدى. سوندىقتان بۇل جەردە راقىمشىلىقتىڭ نە قاتىسى بار؟ پرەزيدەنت سوتتىڭ ۇكىمىن وزگەرتە المايدى.

كارىم ءماسىموۆ 18 جىلعا باس بوستاندىعىنان ايىرىلدى. وسى 18 جىل دەگەن ۇكىمدى وزگەرتۋگە پرەزيدەنت توقايەۆتىڭ قۇزىرەتى جوق. ەلدەگى سوت – تاۋەلسىز، ءبىر ادام ايتتى ەكەن دەپ شەشىمدى وزگەرتە سالمايدى. قايداعى راقىمشىلىق؟ كارىم ءماسىموۆ پرەزيدەنتتەن ۇكىمنىڭ كۇشىن جويۋدى نەمەسە جازاسىن جەڭىلدەتۋدى سۇراپ وتىر ما؟ نەگە پرەزيدەنتتەن سۇراپ وتىر؟ سەبەبى ول پرەزيدەنت ۇكىمدى وزگەرتە المايتىنىن ءبىلىپ وتىر عوي. راقىمشىلىقتى جايدان جاي سۇراعان جوق قوي. ول بۇل ىستە جايدان جاي پايدا بولا سالماعان ادام عوي، ول زاڭدى بىلەدى، ادۆوكاتتارى دا زاڭنان حاباردار. سوندىقتان مەن ءۇشىن، ەڭ الدىمەن، نە بولىپ جاتقانى تۇسىنىكسىز. راقىمشىلىق تۋرالى اقپارات نە ءۇشىن تاراپ كەتتى؟ قانداي بولجام بار؟ دەمەك شىن مانىندە ءبىر نارسە شەشىلىپ جاتىر دەگەن ءسوز. ەگەر اقپارات تاراپ كەتكەن بولسا، حالىقتىڭ رەاكسياسىن كۇتىپ وتىرعان شىعار؟ ولار مۇنى قالاي قابىلدايدى، قالاي تالقىعا تۇسەدى دەگەندەي. ءبىراق تاعى دا قايتالاپ ايتامىن، راقىمشىلىق بەرىلۋى - زاڭسىز. پرەزيدەنت سوت شەشىمىن وزگەرتە المايدى، سەبەبى ءماسىموۆ ءولىم جازاسىنا كەسىلگەن جوق"، - دەيدى باجكەنوۆا Orda.kz-كە بەرگەن سۇحباتىندا.

بۇل ماقالا تۋرالى نە ويلايسىز؟