ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

تۋريزم ءمينيسترى بۋرابايداعى ءقوناقۇي ايەلىنە ءتان ەكەنىن ايتتى

14 مامىر 2024 235

تۋريزم جانە سپورت ءمينيسترى ەرمەك مارجىقپايەۆ بۋرابايدا ايەلىنىڭ قوناقۇيلەرى بارىن مويىندادى. مينيستر ءوز لاۋازىمى ايەلىنىڭ بيزنەسىنە ىقپالى بولمايدى دەپ ەسەپتەيدى، دەپ حابارلايدى alash.kz.

مارجىقپايەۆ نە دەيدى

ۇكىمەتتىڭ باسپا ءسوز ورتالىعىندا جۋرناليستەر مينيستردەن تۋعان-تۋىستارىنىڭ بيزنەسى جايلى سۇراق قويعان. بۇل ساۋال مارجىقپايەۆقا بۇرىن دا قويىلعان ەدى.

– بۇعان دەيىن مەنىڭ ول جايلى ايتقانىم بار. مەملەكەتتىك قىزمەتكە كەلگەن 2008 جىلعا دەيىن ءبىز بيزنەسپەن اينالىسقانبىز. ول كاسىپورىنعا بيىل 30 جىل بولادى. مەن مەملەكەتتىك قىزمەتكە كەلگەنگە دەيىن ول كاسىپ ورنى دامىدى، – دەدى ول.

جۋرناليستەر مينيستردەن بۇل تۇرعىدا مۇددەلەر قاقتىعىسى بولماي ما دەپ سۇراعان. 

– ول جاقتاعى شاعىن وتەلدەر مەن ءمينيستردىڭ جۇمىسىندا قانداي مۇددەلەر قايشىلىعى بولۋى مۇمكىن. ونى قالاي ەلەستەتەسىز. قالايشا؟ مەن ولاي ەسەپتەمەيمىن، – دەيدى مارجىقپايەۆ.

ايەلىنىڭ بيزنەسى جايلى

اڭگىمە بۇل جەردە “بەرەكە-بۋراباي” قوناقۇيلەر جەلىسى جايلى بولىپ وتىر دەپ جازادى Ulysmedia.kz.

"بەرەكە" ساناتوريي-كۋرورتتىق كەشەنىنىڭ ۇلكەن اۋماعى كوركەم ەكولوگيالىق كۋرورتتىق ايماقتا ورنالاسقان. باسقا قالالاردان كەلۋشىلەرگە تەمىرجول ۆوكزالىنان "بەرەكە" ساناتورييىنە دەيىن اۆتوموبيل جولى بار. قوناق ءۇيدىڭ جارناماسىندا جايلى بولمەلەر، جايلى ينتەرەر جانە قىزمەتكەرلەردىڭ ساپالى قىزمەتى جايلى جازىلادى. وندا بىرەگەي ەمدىك قاسيەتتەرى بار مينەرالدى سۋدا عانا جۇمىس ىستەيتىن سۋ ەمحاناسىنىڭ قىزمەتتەرى بارى دا ايتىلادى.

بۇعان دەيىن دە سۇراق قويىلعان

تۋريزم جانە سپورت ءمينيسترى ەرمەك مارجىقپايەۆ "تۋريزم سالاسىندا تۋىستارىڭىز جۇمىس ىستەي مە؟" دەگەن سۇراققا جاۋاپ بەرگەن ەدى. 

ەسكە سالا كەتەيىك، ءبىر جىل بۇرىن اقمولا وبلىسى اكىمى كەزىندە جۋرناليست اسحات نيازوۆقا بەرگەن سۇحباتىندا ەرمەك مارجىقپايەۆ تۋىستارىنىڭ اتىندا جەر بارىن، ولار شارۋاشىلىقپەن اينالىساتىنىن ايتقان ەدى. سول سۇحباتىندا مارجىقپايەۆ ايەلى دە بيزنەسپەن اينالىساتىنىن ءمالىم ەتكەن. “اگروبيزنەس تە بار” دەگەن ەدى ول.

بۇل ماقالا تۋرالى نە ويلايسىز؟