دۇيسەنبى، 18 ساۋىرگە قاراعان ءتۇنى تۇركيا اسكەرى يراكتىڭ سولتۇستىگىندە كۇردىستان جۇمىسشى پارتياسىنىڭ (كجپ) قارۋلى توپتارىنا قارسى جاڭا وپەراسيا باستادى. بۇل تۋرالى تۇركيانىڭ قورعانىس مينيسترلىگى حابارلادى.
الدىمەن تۇركيانىڭ اسكەري ۇشاقتارى مەن ارتيللەرياسى كجپ-عا تيەسىلى نىسانالارعا شابۋىل جاساعان، ودان كەيىن شەكارا تۇبىندەگى اۋماققا جاياۋ اسكەر كىرگەن. بۇل تۋرالى تۇركيا قورعانىس ءمينيسترى حۋلۋسي اكار مالىمدەدى.
اكاردىڭ سوزىنشە، تۇركيا اۋە كۇشتەرى كپج-عا تيەسىلى جاسىرىن ورىندار، بۋنكەرلەر، ۇڭگىرلەر، قارۋ-جاراق قويمالارى مەن شتاب-پاتەرگە "ءساتتى" شابۋىلداعان. ءبىراق ول بۇل وپەراسياعا قانشا سارباز بەن ۇشاق جۇمىلدىرىلعانىن ايتپادى. يراكتىڭ سولتۇستىك بولىگىندە ورنالاسقان كۇرد قارۋلى توپتارى ءالى ەشقانداي مالىمدەمە جاسامادى.
كەيىنگى ونداعان جىلدا تۇركيا كۇشتەرى كپج-عا قارسى اۋەدەن شابۋىلداپ، قۇرلىقتا ءبىرتالاي ترانسشەكارالىق وپەراسيا جۇرگىزگەن. تۇركيا قورعانىس ءمينيسترىنىڭ مالىمدەۋىنشە، وسى شابۋىل يراكتىڭ مەتينا، زاپ جانە اۆاشين-باسيان دەيتىن ءۇش اۋدانىن قامتىعان.
1984 جىلى كپج تۇركيانىڭ كۇردتەر كوپ تۇراتىن وڭتۇستىك-شىعىس بولىگىندە پارتيزاندىق ءىس-قيمىلدار باستاعاننان بەرى ونداعان مىڭ ادام قازا تاپتى. تۇركيا، اقش جانە ەۋروپاداعى ءبىرقاتار ەل كپج-نى تەررور ۇيىمى دەپ تانىعان.
