قازاقستان پرەزيدەنتى قاسىم-جومارت توقايەۆ قازاقستان حالقىن وتان قورعاۋشىلار كۇنىمەن قۇتتىقتادى. مەملەكەت باسشىسىنىڭ قۇتتىقتاۋىن اقوردا جاريالادى.
سىزدەردى وتان قورعاۋشى كۇنىمەن شىن جۇرەكتەن قۇتتىقتايمىن!
بۇل – باتىر بابالاردىڭ داڭقتى جولى مەن بۇگىنگى بۋىننىڭ تۋعان ەلگە قىزمەت ەتۋ ءداستۇرىن توعىستىراتىن مەرەكە.
وتان قورعاۋ – قاسيەتتى پارىز ءارى مارتەبەلى مىندەت. حالقىمىز انتىنا ادال، سەرتىنە بەرىك پەرزەنتتەرىن ەرەكشە قادىرلەيدى.
بيىل قازاقستان قارۋلى كۇشتەرىنىڭ قۇرىلعانىنا 30 جىل تولىپ وتىر. وسى كەزەڭدە ايبىندى ارميامىز قاستەرلى تاۋەلسىزدىگىمىزدىڭ جانە مەملەكەتتىلىگىمىزدىڭ مىزعىماس قورعانىنا اينالدى.
قورعانىس الەۋەتىمىزدى ارتتىرۋ، ساربازداردىڭ دايىندىعىن كۇشەيتىپ، ولارعا جان-جاقتى قولداۋ كورسەتۋ – مەملەكەتتىڭ باستى مىندەتتەرىنىڭ ءبىرى.
بەيبىت ءومىرىمىز بەن تىنىشتىعىمىزدى، جەرىمىزدىڭ تۇتاستىعىن ساقتاۋ ءۇشىن قىزمەت ەتىپ جۇرگەن ساردارلار مەن ساربازدارعا ريزاشىلىعىمدى بىلدىرەمىن.
ەرجۇرەك جاۋىنگەرلەرىمىز ەل سەنىمىن اقتايدى دەپ سەنەمىن!
بارشاڭىزعا باق-بەرەكە جانە تولاعاي تابىس تىلەيمىن!
