ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

توقايەۆ جاڭا زاڭعا قول قويدى: قازاق ءتىلى مەن تاريحىن بىلمەيتىندەر قازاقستان ازاماتتىعىن الا المايدى

17 مامىر 2024 355

مەملەكەت باسشىسى “قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە قىلمىستىق-اتقارۋ جۇيەسى سالالارىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى” قازاقستان رەسپۋبليكاسىنىڭ زاڭىنا قول قويدى.

 زاڭدا:

• قىلمىستىق-اتقارۋ جۇيەسى مەكەمەلەرىندەگى، تەرگەۋ يزولياتورلارىنداعى جانە ۋاقىتشا ۇستاۋ يزولياتورلارىنداعى بەينەباقىلاۋ جۇيەلەرىن بۇلدىرگەنى ءۇشىن قىلمىستىق جاۋاپكەرشىلىك بەلگىلەنگەن؛
• ۇكىمەت ايقىنداعان وڭىرلەرگە قونىس اۋداراتىن ادامدار ءۇشىن شارۋا نەمەسە فەرمەر قوجالىعىنا جەر ۋچاسكەلەرىن بەرۋ كوزدەلگەن؛
• قونىس اۋدارۋشىلارعا جانە ولاردىڭ وتباسى مۇشەلەرىنە مەملەكەتتىك قولداۋ رەتىندە كوشۋگە سۋبسيديا، تۇرعىن ءۇي جالداۋ، كوممۋنالدىق قىزمەت تولەمدەرىنىڭ شىعىندارىنا وتەماقى، سونداي-اق ەكونوميكالىق موبيلدىلىك سەرتيفيكاتتارى سەكىلدى ماتەريالدىق كومەك كورسەتۋ كوزدەلگەن؛
• قازاقستان ازاماتتىعىن بەرۋدەن جانە قالپىنا كەلتىرۋدەن باس تارتۋ ءۇشىن كامەلەتكە تولماعانداردىڭ جىنىستىق تيىسپەۋشىلىگىنە قارسى قىلمىستار جاساۋ، قاراپايىم دەڭگەيدە مەملەكەتتىك ءتىلدى بىلمەۋ، قازاقستان كونستيتۋسياسىنىڭ نەگىزدەرىنەن، عىلىم جانە جوعارى ءبىلىم سالاسىنداعى ۋاكىلەتتى ورگان ايقىندايتىن دەڭگەيدە ءتول تاريحىمىزدان حاباردار بولماۋ سەكىلدى قوسىمشا نەگىزدەر قاراستىرىلعان؛
• قازاقستاندا تۇراقتى تۇرۋعا رۇقسات الۋ قۇقىعىن بەرەتىن ينۆەستورلارعا ارنالعان كوپرەتتىك ۆيزا جانە سۇرانىسقا يە كاسىپ يەلەرى ءۇشىن ۆيزا ەنگىزىلگەن؛
• ەكسترەميستىك نەمەسە تەرروريستىك ۇيىمعا قاتىسى بار، قايتادان قىلمىس جاساعان، ۇيىمداسقان توپتىڭ (قىلمىستىق ۇيىمنىڭ) “سەركەسى” سانالاتىن، كامەلەتكە تولماعانداردىڭ جىنىستىق تيىسپەۋشىلىگىنە قارسى قىلمىستار جاساعان، سونداي-اق قازاقستاندا اۋىر نەمەسە اسا اۋىر قىلمىس جاساعان جانە حالىقارالىق شارتتار نەگىزىندە ءوز ازاماتتىعى بار ەلگە بەرىلگەن ادامداردىڭ ەلىمىزگە كىرۋىنە تىيىم سالىنعان.
• سونىمەن قاتار زاڭدا حالىقتىڭ كوشى-قونىنا قاتىستى زاڭنامانى ودان ءارى جەتىلدىرۋگە باعىتتالعان باسقا دا تۇزەتۋلەر كوزدەلگەن.

بۇل ماقالا تۋرالى نە ويلايسىز؟