10 مامىردا قازاقستان پرەزيدەنتى قاسىم-جومارت توقايەۆ مەملەكەتتىك ساپارمەن تۇركياعا باردى. بۇل ونىڭ قازاقستان پرەزيدەنتى رەتىندە تۇركياعا جاساعان العاشقى ساپارى. 2019 جىلعى ناۋرىزدا پرەزيدەنتتىك قىزمەت وكىلەتىن مەرزىمىنەن بۇرىن دوعارىپ، ءوز ورنىنا توقايەۆتى قالدىرعان، قازاقستاندى وتىز جىلعا جۋىق باسقارعان نۇرسۇلتان نازاربايەۆتىڭ تۇسىندا تۇركيا مەن قازاقستان اراسىندا دوستىق قارىم-قاتىناس ورناعان ەدى.
اقوردانىڭ حابارلاۋىنشا، انكارا اۋەجايىندا توقايەۆتى تۇركيا ۆيسە-پرەزيدەنتى فۋات وقتاي مەن انكارا گۋبەرناتورى ءۋاسىپ شاحين كۇتىپ العان.
ەكى كۇندىك مەملەكەتتىك ساپار كەزىندە توقايەۆ تۇركيا پرەزيدەنتى رەجەپ تايىپ ەردوعانمەن كەلىسسوز وتكىزىپ، بيزنەس-فورۋمعا جانە تۇرىك كاسىپكەرلەرىمەن بىرنەشە كەزدەسۋگە قاتىسادى. توقايەۆ پەن ەردوعان بۇعان دەيىن ەكى ەلدىڭ قاتىسۋىمەن وتكەن بىرنەشە حالىقارالىق ۇيىمداردىڭ شارالارى اياسىندا كەزدەسكەن، ءبىراق بۇعان دەيىن ەكەۋارا كەلىسسوز وتكىزبەگوەن ەدى.
توقايەۆ رەسەيدىڭ ۋكرايناعا باسقىنشىلىعى كەزىندە تۇركياعا ساپارمەن بارىپ وتىر. انكارا بۇعان دەيىن ماسكەۋ مەن كييەۆ اراسىندا ارااعايىن بولۋعا ىقىلاس ءبىلدىرىپ، ناۋرىزدىڭ اياعىندا ستامبۇلدا رەسەي مەن ۋكراينا دەلەگاسيالارى كەلىسسوز وتكىزگەن. سول كەلىسسوزدەن كەيىن رەسەي ۋكراينا استاناسى كييەۆ ماڭىنان اسكەرىن اكەتكەن بولاتىن.
باقىلاۋشىلار مەن اسكەري ماماندار ماسكەۋ كييەۆ تۇبىندە بەتى قايتقاننان كەيىن اسكەرىن اكەتۋگە ءماجبۇر بولدى دەپ سانايدى. رەسەي اسكەرى شەگىنگەن سوڭ كييەۆ پەن باتىس ەلدەرى رەسەيدى سوعىس قىلمىستارىن جاسادى، بەيبىت حالىقتى ەشقانداي تەرگەۋسىز-سوتسىز جاپپاي ءولتىرىپ، زورلادى، تونادى دەپ ايىپتاعان. ماسكەۋ ونداي ايىپتاردى مويىنداعان جوق.
رەسەي اسكەرىن دونباسقا شوعىرلاندىرىپ، ءقازىر سول ايماقتا اۋىر قارۋ-جاراق پەن اسكەري ۇشاقتاردى پايدالانىپ، ۋكراينا ەلدىمەكەندەرىنە شابۋىللداپ جاتىر.
رەسەيمەن تىعىز ەكونلميكالىق بايلانىسى بار قازاقستان ماسكەۋدىڭ اسكەري اگرەسسياسىن ايىپتاعان جوق، ءبىراق ۋكراينا جەرىنىڭ تۇتاستىعىن قۇرمەتتەيتىنىن جانە ۋكراينانىڭ شىعىسىنداعى سەپاراتيستىك قۇرىلىمداردى (ماسكەۋ ولاردى تاۋەلسىز دەپ تانىعان) مويىندامايتىنىن مالىمدەگەن.
كەي ساراپشىلار تۇركيا ءۇشىن ءقازىر ورتالىق ازياداعى تۇركىتىلدەس ەلدەر – قازاقستان، قىرعىزستان، وزبەكستان جانە تۇركىمەنستانمەن بايلانىسىن نىعايتۋعا مۇمكىندىك تۋىپ تۇر دەيدى. ماسكەۋ بولسا ورتالىق ازيانى ءوزىنىڭ بۇرىننان ىقپال ايماعى سانايدى.
