ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ءتىلدىڭ جويىلىپ كەتۋىنە بايلانىستى وزگە تىلدەگى مۋلتفيلمدەرگە تىيىم سالىنۋى مۇمكىن

11 ءساۋىر 2024 377

قىرعىزستاندا ەندى وزگە تىلدەگى مۋلتفيلمدەر مەن باعدارلامالار كورسەتىلمەۋى مۇمكىن، دەپ حابارلايدى Alash.kz قازاقپاراتقا سىلتەمە جاساپ.

«قىرعىز رەسپۋبليكاسىنداعى حالال-يندۋستريا تۋرالى» زاڭ جوباسىن تالقىلاۋ بارىسىندا پارلامەنت سپيكەرى نۇرلانبەك شاكييەۆ ينتەرنەتتەگى شەت تىلىندەگى بارلىق مازمۇندى بۇعاتتاۋدى جانە قىرعىز ءتىلىن ساقتاۋ ماقساتىندا اراب اتاۋلارىنان باس تارتۋدى ۇسىندى.

نۇرلانبەك شاكييەۆ قىرعىز ءتىلى جويىلىپ بارادى، سوندىقتان قىرعىزداردىڭ پايداسىنا عالامتورداعى شەت تىلىندەگى بارلىق باعدارلامالار مەن مۋلتفيلمدەرگە تىيىم سالۋ كەرەك دەپ سانايدى.

«قۇرمەتتى دەپۋتاتتار، „حالال“ تەرمينىن قىرعىز تىلىندەگى „ادال“ دەپ اتاساق. قىرعىز سوزدەرىن ارابشالاپ، ارابشا اتاۋلار بەرىپ، كوپ نارسەنى ورىسشا دا اتايمىز. باقىت، تاالاي، ەلمۋرزا، ۇلىقبەك، بالباق، چولپون، جىلدىز، نۇربەك دەگەن قىرعىزدىڭ جاقسى ەسىمدەرى كوپ. نەگە ءبىز ولاردى قولدانباي، ارابشا، ورىسشا جانە باسقا تىلدەردە اتاۋ بەرەمىز؟ قىرعىزشا اتاۋلاردى قولدانباساق، ولار دا ءتىل سياقتى جويىلىپ كەتەدى. اۋىلداردا بالالار ورىسشا سويلەيدى، سەبەبى ينتەرنەتتەن ءورىستىلدى كونتەنتتى كورەدى. قىرعىز ءتىلى جويىلىپ بارادى. وسىعان بايلانىستى ۇكىمەت جاقىن ارادا مۋلتفيلمدەردى قىرعىز تىلىنە اۋدارۋى قاجەت. بارلىق باعدارلامالاردى، مۋلتفيلمدەردى جانە بالالار تەلەفوندا ينتەرنەتتە شەت تىلدەرىندە كورەتىن بارلىق مازمۇندى بۇعاتتاۋ كەرەك. ەگەر ءبىز قازىردەن باستاپ ءمان بەرمەسەك، ءتىلدى بۇگىننەن باستاپ ساقتاماساق، 5-10 جىلدان كەيىن ودان ايىرىلىپ قالامىز»، — دەدى سپيكەر.

دەپۋتات مارلەن ماماتالييەۆ زاڭ جوباسىندا قولدانىلعان «حالال» تەرمينى ISO حالىقارالىق ستاندارتتارىنا سايكەس كەلەتىنىن ءتۇسىندىردى.

«ەگەر زاڭ جوباسىندا قىرعىز تىلىندە „ادال“ قولدانىلسا، وندا قىرعىز ونىمدەرى حالىقارالىق ستاندارتقا ساي كەلمەيتىندىكتەن سىرتقى نارىققا شىعا المايدى. شەتەلدىك فرانشيزالار مەن برەندتەردى قىرعىز تىلىنە اۋدارۋ مۇمكىن ەمەس»، — دەدى ول.

بۇل ماقالا تۋرالى نە ويلايسىز؟