استانا سوتىندا بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ پەن ونىڭ تۋىسى باقىتجان بايجانوۆقا قاتىستى قىلمىستىق ءىس قارالىپ جاتىر.
22 ساۋىردە ءوتىپ جاتقان سوت وتىرىسىندا بيشىمبايەۆتىڭ ادۆوكاتى ەرلان عازىمجانوۆ تەلەفوندا ايىپتالۋشىنىڭ كىناسىز ەكەنىن كورسەتەتىن دالەل بار ەكەنىن ايتتى. دەي تۇرعانمەن قورعاۋ تاراپى تەلەفوننىڭ ءقۇپياسوزىن سۋدياعا ايتۋعا كەلىسپەدى.
سوتتالۋشى تەلەفوندا قاساقانا اسا قاتىگەزدىكپەن ادام ءولتىرۋ جانە قيناۋ ايىپتاۋىن جوققا شىعاراتىن دالەلدەر بار ەكەنىن ايتتى. ءبىز ءقۇپياسوزدى سوتقا بەرسەك، قانداي دا ءبىر تۇزەتۋ مەن وزگەرىس ەنگىزىلەدى دەپ سەسكەنەمىز. سوعان بايلانىستى بيشىمبايەۆتىڭ تەلەفونىن ءوزىمىز اشىپ، ءىس ماتەريالدارى زەرتتەلگەن سوڭ ءقۇپياسوزدى سوتقا بەرە الامىز، - دەدى ادۆوكات عازىمجانوۆ .
الايدا جابىرلەنۋشى تاراپ پەن ايىپتاۋ تاراپى بۇل ءوتىنىشحاتقا قارسى بولدى. سۋديا ايجان قۇلبايەۆا قورعاۋ تاراپىنىڭ بۇل ءوتىنىشحاتىن قاناعاتتاندىرمادى.
ايتا كەتەيىك، 18 ساۋىردەگى سوت وتىرىسىندا قۋاندىق بيشىمبايەۆ سۋدياعا ۇيالى تەلەفونىنىڭ ءپارولىن بەرۋدەن باس تارتقان.
«تەلەفونىڭىزدىڭ ءقۇپياسوزىن قانداي ماقساتتا بەرگىڭىز كەلمەيدى؟»، - دەپ سۇرادى سۋديا ايجان قۇلبايەۆا.
«مەن ءوز قورعاۋشىما بەرۋگە دايىنمىن. وسى ىسكە قاتىستى مالىمەتتىڭ، اقپاراتتىڭ ءبارىن بەردىم. ول جەردە باسقا اقپارات كوپ...»، - دەدى بيشىمبايەۆ.
سۋديا تەلەفونداعى دەرەكتەردىڭ تاعىلعان ايىپقا قاتىستى تۇسى عانا زەرتتەلەتىنىن ايتتى.
«باسقا جەكە اڭگىمەلەرىڭىزدىڭ تاعىلعان ايىپقا قاتىسى جوق. (...) پروسەسس بارىسىندا بىرنەشە رەت تەلەفونىڭىزدىڭ ءقۇپياسوزىن بەرەتىنىڭىزدى، سالتانات ەكەۋىڭىزدىڭ اڭگىمەڭىزدى ءبارى كورەتىنىن، بۇل قىلمىستىق قۇقىق بۇزۋشىلىقتى جاساماعانىڭىزدى ايتتىڭىز. ەندى بۇل ارەكەتىڭىزگە قاراپ ۇستانىمىڭىزدى وزگەرتىپ، سۋدياعا تەلەفونىڭىزداعى دەرەكتەردى كورۋگە رۇقسات بەرمەي وتىرسىز، دۇرىس پا؟»، - دەپ ناقتىلادى سۋديا.
«جوق، مەن ءقۇپياسوزدى تەك قورعاۋشىما ايتامىن، ول تەلەفوندى اشقان سوڭ، ىشىندەگى دەرەكتەردى قاراي الاسىز»، - دەپ جاۋاپ بەردى بيشىمبايەۆ.
سۋديا قۇلبايەۆا ءقۇپياسوز سۋدياعا حابارلانۋعا ءتيىس ەكەنىن جانە ونىڭ قىلمىستىق ءىس ماتەريالدارىنا قوسىلاتىنىن ايتتى. سونداي-اق سوتتالۋشىنىڭ تەلەفوننىڭ ءقۇپياسوزىن بەرۋدەن باس تارتقانىنا بايلانىستى سوت تەرگەۋىنىڭ كەلەسى كەزەڭىنە وتەتىنىن جەتكىزدى.
