رەسەي پرەزيدەنتى ماسكەۋدە جاسالعان شابۋىلدى ۋكراينامەن بايلانىستىردى. ول مۇنى 25 ناۋرىزدا وتكەن جيىندا ايتتى. ءپۋتيننىڭ سوزىنشە، تەرگەۋ تارابىندا بۇل نۇسقانى راستايتىن دالەل جوق.
"بۇل قىلمىستى راديكال يسلامشىلدار جاساعانىن بىلەمىز... ءبىراق وعان قوسا، اقش-تىڭ ءوز سەرىكتەستەرى مەن الەمنىڭ باسقا ەلدەرىن ماسكەۋدەگى شابۋىلعا كييەۆتىڭ قاتىسى جوق دەپ، قاندى شابۋىلدى رەسەيدە تىيىم سالىنعان يم ۇيىمىنىڭ (ءوزىن ءوزى "يسلام مەملەكەتى" دەپ اتايتىن تەررورلىق ۇيىم - رەد.) مۇشەلەرى جاسادى دەگەنگە سەندىرۋگە تىرىسىپ جاتقانىن كورىپ وتىرمىز. رەسەي مەن ونىڭ حالقىنا قارسى بۇل زۇلىمدىقتى كىم جاساعانىن بىلەمىز. ءبىز بۇعان تاپسىرىس بەرگەن كىم ەكەنىن بىلگىمىز كەلەدى"، – دەدى پۋتين.
ول وسى شابۋىلدى رەسەيمەن "كييەۆتەگى نەوناسيستىك رەجيمنىڭ قولىمەن" سوعىسىپ جاتقانداردىڭ تىزبەكتى شابۋىلدارىنىڭ "ءبىر بولىگى عانا" دەپ سيپاتتادى. پۋتين كىمدى مەڭزەگەنىن اشىپ ايتقان جوق. بۇدان بۇرىن ول ۋكرايناداعى سوعىستى تۇتاتتى دەپ "ۇجىمدىق باتىستى" ايىپتاعان بولاتىن.
رەسەي باسشىسى قىلمىسقا تاپسىرىس بەرۋشىلەر تۋرالى سۇراققا جاۋاپتى تەرگەۋ بەرۋگە ءتيىس دەپ مالىمدەدى. بۇعان قوسا پۋتين راديكال يسلاميستەردىڭ رەسەيگە شابۋىل جاساۋعا مۇددەلى بولۋ سەبەبىن جانە ولارعا "كۇللى مۇسىلمان ءۇشىن قاسيەتتى رامازان ايىندا اسقان ايۋاندىق پەن قىلمىس جاساۋعا نە سەبەپ بولعانىن" انىقتاۋدى تاپسىردى.
