وتكەن وكتيابر جۇلدىزىنىڭ 26-سىندا ترويسكىدەگى «رۋسسكو-تاتارسكايا شكولدىڭ» باس ۋچيتەلى لاتيفوللا مىرزا عابدۋلعازيزوۆ دۇنيەدەن قايتتى. 29-شى وكتيابردە، بەيسەنبى كۇنى جانازاسى وقىلىپ، اسا قادىر-قۇرمەتپەن جامباسى جەرگە ءتيدى. مارقۇم ەس ءبىلىپ ەرجەتكەننەن بەرى قاراي تاتار مىللەتىنە كوپ ەڭبەك سىڭىرگەن، ساقالسىز بالالار بىلاي تۇرسىن، كوپ ساقالدى بالالاردىڭ كوزىن اشقان، ترويسك شاھارىندە نە ءتۇرلى جاقسىلىق ىستەرگە سەبەپشى بولعان ءبىر كىسى ەدى.
سونىسىنا قاراي ءولىمى دە جۇرتقا ءقادىرلى بولدى. مەدرەسەلەردە دارىستەر (ساباقتار) توقتاتىلىپ، قايعىسىنا ورتاقتاستى. رۋحىنا قۇران حاتىم ايتتىرىلدى. جانازاسىنا جەر قايىسقان كىسى جيىلدى. باس ادامدارى ءقابىرىنىڭ قاسىندا مارقۇمنىڭ قىلىقتارىن سويلەپ، كوڭىل كوزدەرىنەن كۇيىكتى جاستار مونشاقتاتىپ، ۇمىتپايتىندىقتارىنا ۋاعدا ەتتى. مىنە، كوزدەرى اشىلىپ، كوڭىلدەرىنە ساۋلە كىرە باستاعان جۇرت بالالارىن وقىتۋشىنىڭ ءقادىرىن قالاي بىلەدى!
مۇنان ءبىر جۇما بۇرىن، 23 وكتيابردە قوستاناي ۋەزى، وباعان بولىسىنىڭ قازاعى جاماليددين مىرزا بەيسەنوۆ قازانعا اۋرۋىن قاراتا بارعاننان قايتىپ كەلە جاتىپ، ۇيىنە جەتە الماي، ترويسك شاھارىندە اپات بولدى. مارقۇم «رۋسسكو-كيرگيزسكايا شكولانىڭ» زاۆەدۋيۋششييى ەدى. قىرشىن جاس (جۇمىسى) جاقسى قازاق بالالارىنىڭ شكولعا كىرۋگە كوپ كومەگى تيگەن، قازاقشىلىق ىسىندە شىن مۇسىلمان ءبىر ادام بار ەدى. مۇنىڭ وپاتىن ترويسك قازاقتارىنىڭ كوبى بىلمەدى. مۇنىڭ ءولىمىنىڭ جاي قازاقتىڭ ولىمىنەن كوپ ايىرماسى بولمادى. بۇل ءبىزدىڭ قازاقتا وقىتۋشىنىڭ قۇنى نە دارەجەدە قىمبات ەكەنىن كورسەتەدى. بايقاڭىز، ءبىزدىڭ وقىتۋشىمىز قالاي كومىلدى، بىزبەن تۋىسقان، قاتارىمىز دەپ جۇرگەن تاتاردىڭ وقىتۋشىسى قالاي؟
ەردىڭ ەڭبەگىن ەل بىلەرلىك زامان بىزگە دە بولار ما ەكەن؟ ءبىزدىڭ ەڭبەكشىلەرىمىزگە دە سونداي كۇن تۋار-داعى! ءبىراق قاشان، قاشان؟ قايدا؟
