ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"سۋ تاسقىنىڭ ەكىنشى كەزەڭى باستالدى". باتىس قازاقستان وبلىسىنىڭ اكىمى ۇندەۋ جولدادى

06 ءساۋىر 2024 299
باتىس قازاقستان وبلىسىنىڭ اكىمى ناريمان تورەعالييەۆ ءوڭىر تۇرعىندارىنا سۋ تاسقىنىنا قاتىستى قالىپتاسقان جاعداي بويىنشا ۇندەۋ جولدادى، دەپ حابارلايدى Alash.KZ ۇلتتىق پورتالى. 
«قۇرمەتتى باتىس قازاقستاندىقتار! قازىرگى ۋاقىتتا وزدەرىڭىزگە بەلگىلى وڭىرىمىزدە سۋ تاسقىنى ءقاۋپى ءالى دە سەيىلگەن جوق. تاسقىن سۋدىڭ سالدارىنان ءوڭىرىمىزدىڭ 5 اۋدانىندا جانە ورال قالاسىندا بىرنەشە تۇرعىن ۇيلەردى سۋ باسقان بولاتىن. بۇدان بولەك، ورال قالاسى ماڭىنداعى ساياجايلارعا دا سۋ كىردى.
جالپى وبلىس بويىنشا 7 مىڭعا جۋىق ادام ءقاۋىپسىز جەرگە كوشىرىلدى، ونىڭ 3 مىڭنان استامى بالالار. ەۆاكۋاسيالىق پۋنكتتەردە قاجەتتى جاعدايلار جاسالىپ جاتىر. سۋ تاسقىنىنان زارداپ شەككەندەرگە مىڭداعان ەرىكتىلەر كومەك كورسەتۋدە. تۇرعىندارعا ازىق-تۇلىك، دارى-دارمەك پەن كيىم-كەشەكتەر جەتكىزىلۋدە. كەزەكشىلىكتەر ۇيىمداستىرىلىپ، وقۋشى بالالارعا وقۋ پروسەستەرى ونلاين فورماتتا ءوتىپ جاتىر. ءبىز ءوز تاراپىمىزدان تۇرعىنداردىڭ قاجەتتىلىكتەرىن ەسكەرىپ، بارلىق قاجەتتى جاعدايلاردى جاسايتىن بولامىز، - دەدى اكىم.

سونىمەن قاتار، بقو اكىمى ايماققا رەسەيدىڭ ساراتوۆ جانە ورىنبور وبلىستارىنداعى سۋ قويمالارىنان كوپ مولشەردە سۋ جىبەرىلىپ جاتقانىن ايتتى. بۇل 30 جىل بۇرىن بولعان جاعدايدان دا كۇردەلى ەكەنىن مالىمدەدى:

اتاپ ايتقاندا، ساراتوۆ وبلىسىنداعى پريۋزەن سۋ قويماسىنان قاراوزەنگە سەكۋندىنا 431 تەكشەمەتر سۋ تۇسۋدە. قازىرگى ۋاقىتتا سۋ تاسقىنىڭ ەكىنشى كەزەڭى باستالدى. وزدەرىڭىزگە بەلگىلى، كەشە رەسەيدىڭ ورسك قالاسىندا دامبا بۇزىلىپ، ەلدى مەكەندەر مەن تۇرعىن ۇيلەر زارداپ شەكتى. بۇل ءبىزدىڭ وبلىسقا دا ءقاۋىپ ءتوندىرۋى مۇمكىن. ويتكەنى، ورىنبوردىڭ يريكلينسك سۋ قويماسىنان سەكۋندىنا 2170 تەكشەمەتر سۋ جىبەرىلۋدە. بۇل سۋلار جاقىن ۋاقىتتا وبلىسىمىزدىڭ جايىق وزەنى ارقىلى ءوتىپ، كاسپييگە بەت الادى. قازىرگى ۋاقىتتا جايىقتاعى سۋ دەڭگەيى 7 مەترگە جۋىق كوتەرىلدى. بۇل ءقاۋىپتى مولشەرگە جاقىنداي ءتۇستى. وسىلايشا، وزەن سۋى ارناسىنان تاسىپ، ورالداعى 1ء-شى، 2ء-شى، 3ء-شى ساياجايلارعا سۋ كىرىپ جاتىر. سوندىقتان قالا تۇرعىندارىنىڭ تۇسىنىستىك تانىتۋلارىن سۇرايمىز... سونداي-اق، سۋ تاسقىنى بويىنشا قالىپتاسقان جاعداي بويىنشا بارشا تۇرعىندار مەن ب ا ق وكىلدەرىنىڭ تەك رەسمي اقپارات كوزدەرىنە سەنۋلەرىن سۇرايمىن! -دەدى باتىس قازاقستان وبلىسىنىڭ اكىمى.

بۇل ماقالا تۋرالى نە ويلايسىز؟