ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"سوت سۇراقتارىمىزدى نەگىزسىز الىپ تاستادى" - نۇكەنوۆانىڭ ادۆوكاتى

30 ناۋرىز 2024 221

كەشە بۇرىنعى ۇلتتىق ەكونوميكا ءمينيسترى قۋاندىق بيشىمبايەۆقا قاتىستى سوت وتىرىسى ءوتتى. سوت پروسەسى بارىسىندا جابىرلەنۋشى تاراپتىڭ وكىلى - مارقۇم سالتانات نۇكەنوۆانىڭ اعاسى ايتبەك امانگەلدى جانە كۋاگەرلەر ءسوز سويلەدى.

نۇكەنوۆتەردىڭ ادۆوكاتى جاننا ورازباقوۆا الەۋمەتتىك جەلىدە كەشەگى سوت وتىرىسى قالاي وتكەنىن جازدى.

ونىڭ سوزىنشە، كەيبىر تۇستا جابىرلەنۋشى تاراپتىڭ سۇراقتارى نەگىزسىز الىپ تاستالعان.

"وتە ۇزاق كۇن بولدى… سالتانات نۇكەنوۆانىڭ ولىمىنە قاتىستى ءىس بويىنشا سوت كۇنى بويىنا، از عانا ۋاقىت تۇسكى ۇزىلىسپەن ساعات 10.00-دەن 18.30-عا دەيىن سوزىلدى.

سوت ىسكە تىكەلەي قاتىسى بار سۇراقتارىمىزدى نەگىزسىز الىپ تاستادى. ءبىراق ءبىزدىڭ كليەنتىمىزدەن (ايتبەك امانگەلدىدەن - ەسك.) جاۋاپ الۋ كەزىندە ءبىز الىپ تاستاۋدى سۇراعان ورىنسىز سۇراقتار الىپ تاستالمادى.

ءبىز بۇكىل پروسەسس بويى جاۋاپ الىنعان ادامداردىڭ ارقاسىن كورىپ وتىردىق. ولارعا دۇرىستاپ قاراپ، سۇراقتار قويۋعا مۇمكىندىگىمىز بولمادى. القابيلەر دە ولاردىڭ ەموسياسىن كورە المادى، ويتكەنى ولار القابيلەرگە دە تەرىس قاراپ تۇردى.

پروسەستىڭ باسىندا ءبىز دۇرىستاپ جاۋاپ الۋ جانە جۇمىس ىستەۋ ءۇشىن تريبۋنانى جىلجىتۋدى سۇرادىق، ءبىراق اياقتالعانشا سولاي وتىردىق"، - دەيدى ول.

ايتا كەتەيىك، كەشەگى سوت وتىرىسىندا قىلمىس بولعان جەردە جۇمىس ىستەگەن قىزمەتكەر كۋاگەر رەتىندە جاۋاپ بەردى.

"ساعات 19.00 شاماسىندا بايجانوۆ تەلەفونىما حابارلاسىپ، BAU مەيرامحاناسىنا كوتەرىلۋىمدى سۇرادى. نە ءۇشىن ەكەنىن بىلمەيمىن. "تەز كوتەرىل" دەدى. مەن بىردەن سول جاققا باردىم. ليفتكە كىرسەم، جەدەل جاردەم بولدى. قۋاندىق ءۋاليحان ۇلى قولىنا پىشاق ۇستاپ ءجۇردى. ول دارەتحانا جاققا پىشاقپەن كىرىپ كەتتى. ءبىز قاتتى قورقىپ كەتتىك، ارتىنان ەردىك. ودان پىشاقتى الىپ، پوليسيا كەلگەنشە كۇتتىك. 15-20 مينۋتتا پوليسيا كەلدى"، - دەدى بارمەن.

ونىڭ سوزىنشە، بيشىمبايەۆتى كورگەن كەزدە قاسىندا تەك بايجانوۆ بولعان. 

"بيشىمبايەۆ ەشتەڭە ايتپادى. ساسقالاقتاپ تۇردى. جىلاپ تۇردى. "نە ءۇشىن ىستەدىم، نە بولدى؟" دەدى. كەيىن ءولىم بولعانىن بىلدىك. قارسىلاسپادى (پىشاقتى العاندا - ەسك.). ماس ەدى. ول "مەن ءولتىردىم بە؟" دەپ سۇرادى. ول وز-وزىنە قول جۇمساعىسى كەلگەن شىعار (پىشاقتى ۇستاۋداعى ماقساتى - ەسك.). ول دارەتحاناعا جالعىز كىرىپ، جاۋىپ الدى. ءبىز سۋيسيد جاساي ما دەپ قورقىپ كىردىك. پىشاقتى الىپ العان كەزدە اسحاناعا باسقا پىشاق الۋ ءۇشىن جۇگىرىپ كەتتى. قان، ەشتەڭە بولمادى"، - دەدى بارمەن.

27 ناۋرىزدا ەكس-مينيستر قۋاندىق بيشىمبايەۆتىڭ ءىسى بويىنشا القابيلەر تاڭدالعان ەدى. القابيلەر القاسىنا 12 ادام ىرىكتەلدى: 10 – نەگىزگى قۇرام، 2 – قوسالقى. سودان كەيىن اشىق سوت وتىرىستارى باستالدى.

كەيىن قۋاندىق بيشىمبايەۆ سوتتا سالتانات نۇكەنوۆانى اسا قاتىگەزدىكپەن ولتىرگەنىن مويىندامادى.

بۇل وقيعا 2023 جىلى 9 قاراشادا استانا قالاسىنداعى BAU مەيرامحاناسىندا بولدى.

بۇل ماقالا تۋرالى نە ويلايسىز؟