ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

شقو "نازاربايەۆ رەزيدەنسياسىن" نە ءۇشىن ساتقالى جاتىر؟

21 ماۋسىم 2024 288

شىعىس قازاقستان وبلىسى اكىمدىگى رەسمي تۇردە "سول جاعالاۋ پروفيلاكتورييى" دەپ اتالاتىن نىساندى 1 ملرد 115 ميلليون تەڭگەگە ساۋداعا شىعاردى. شارت بويىنشا كەشەندى بولاشاق يەسى ءۇش جىل سەنىمگەرلىك باسقارۋعا الادى. كەيىن تولىق ساتىپ الۋعا قۇقىلى، - دەپ حابارلايدى Alash.kz Dalanews.kzكە سىلتەپ.

وبلىس اكىمدىگىنىڭ اقپاراتى بويىنشا ۋاقىتشا يەلىككە الاتىن ادام ءبىرىنشى جىلى 400 ملن تەڭگە، كەيىنگى ەكى جىلدا 200 ملن تەڭگەدەن ينۆەستيسيا قۇيۋى شارت. ينۆەستور عيماراتتارعا كۇردەلى جوندەۋ جۇرگىزىپ، نىساندى كونفەرەنس-زالى، جەكە كوۆوركينگتەر، قوناق ءۇي نومىرلەرى، سپورت الاڭدارى جانە ساۋدا پاۆيلوندارى بار كوپبەيىندى ورتالىققا اينالدىرۋعا مىندەتتى. ءبىر سوزبەن ايتقاندا، بۇل جەر "تۋريستىك-ينۆەستيسيالىق حاب" بولۋعا ءتيىس دەپ جازىلعان اقپاراتتا. بۇعان قوسا كەمىندە 25 ادامدى جۇمىسپەن قامتۋ تالابى دا بار.

جەرگىلىكتى "ۋك-نيۋس" سايتىنىڭ مالىمەتىنشە، بۇرىنعى پرەزيدەنت نۇرسۇلتان نازاربايەۆ شىعىس قازاقستانعا ساپارلاپ كەلگەنىندە وسىندا توقتاپ ءجۇرۋى مۇمكىن. كەيىنگى جىلدارى بلوگەرلەر بۇل جەر وبلىستىڭ بۇرىنعى اكىمى دانيال احمەتوۆتىڭ "جەكە دەمالىس ورىنىنا اينالدى" دەپ تە دابىل قاققانىن جازادى باسىلىم. ءبىراق مۇنى احمەتوۆتىڭ ءوزى جوققا شىعارىپ، نىساندا بالالار دەمالادى دەگەن.

بۇل جەردى Arbat media باسىلىمى دا "نازاربايەۆ رەزيدەنسياسى" دەپ اتايدى. ال "راتەل" سايتى "پرەزيدەنت رەزيدەنسياسى" دەيدى. الايدا وبلىس اكىمدىگى نىسان "پرەزيدەنت رەزيدەنسياسى" ەمەس، "سول جاعالاۋ پروفيلاكتورييى" دەپ مالىمدەگەن دەيدى ازاتتىق.

ال شىن مانىندە بۇل "ساۋىقتىرۋ كەشەنىنە" كىمدەر بارعانىن تاۋەلسىز دەرەكتەر ارقىلى انىقتاۋ مۇمكىن ەمەس. 2022 جىلى شىعىس قازاقستان وبلىسى اكىمدىگى اتالمىش نىسانعا اەروماسساج، گيدروماسساجى بار SPA-باسسەين سالۋ جونىندە تەندەر جاريالاعان بولاتىن. بۇل باستاما قوعام بەلسەندىلەرى تاراپىنان سىنعا قالعان. جۋرناليست دەنيس دانيليەۆسكيي سول جىلى نىساندى حالىقتى ەمدەيتىن شيپاجايعا اينالدىرۋ جونىندە تالاپ قويىپ، وبلىس اكىمدىگىنە حات جولداعان. ءبىراق ونىڭ تالابى ورىندالعان جوق.

2022 جىلعى قاڭتار وقيعاسىنان كەيىن قازاقستاندا "پرەزيدەنت رەزيدەنسياسى" دەپ اتالىپ كەلگەن نىساندار قوعام يەلىگىنە بەرىلە باستادى. ماسەلەن، پرەزيدەنت قاسىم-جومارت توقايەۆ بىلتىر قوستاناي، اقتاۋ، تاراز، اتىراۋ جانە اقتوبەدەگى رەزيدەنسيالارىن بالاباقشا نەمەسە بالالار لاگەرىنە اينالدىرۋدى تاپسىرعان.

بۇل ماقالا تۋرالى نە ويلايسىز؟