ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ساياسات نۇربەك «بولاشاق» باعدارلاماسى قاتىستى جانجالعا پىكىر ءبىلدىردى

30 مامىر 2024 299

عىلىم جانە جوعارى ءبىلىم ءمينيسترى ساياسات نۇربەك «بولاشاق» باعدارلاماسى قاتىستى جانجالعا پىكىر ءبىلدىردى. بۇل تۋرالى Alash.kz Kursiv.media سايتىنا سىلتەمە جاساپ. 

بۇعان دەيىن ناتاليا ۆوروبيەۆا مەن ماقپال دارىبايەۆا پرەزيدەنتكە ۇندەۋ جولداعان ەدى. ولار «بولاشاق» حالىقارالىق باعدارلاماسى بويىنشا وقىپ، ارتىنشا وقۋىن تاستاپ كەتكەن ستيپەنديات ۆالەريا گاۆريلەنكوعا كەپىلگەر بولعان. شاعىمدانۋشىلار ستيپەنديات كەسىرىنەن باسپاناسىز قالۋ ءقاۋىپى تۋىنداعانىن ايتادى.  

2019 جىلى ۆالەريا گاۆريلەنكو «بولاشاق» ورتالىعىنىڭ قىزمەتكەرلەرىمەن ءسوز بايلاسىپ، 2 پاتەردى كەپىلدەن زاڭسىز شىعارىپ ساتىپ جىبەرگەن. سودان كەيىن ۇلىبريتانياعا قونىس اۋدارعان. ەندى «بولاشاق» ورتالىعى ەكى جۋرناليستەن وقۋدىڭ اقشاسىن قايتارۋدى تالاپ ەتۋدە.  ياعني كەپىلگەر بولعان قوس جۋرناليست شامامەن 30 ملن تەڭگە اقشا تولەۋگە ءماجبۇر.

 «بولاشاق» ورتالىعىنداعى داۋعا بايلانىستى عىلىم جانە جوعارى ءبىلىم ءمينيسترى ساياسات نۇربەك تۇسىنىكتەمە جاساپ، ماسەلەنىڭ قالاي شەشىلىپ جاتقانىن بايانداپ بەردى. 

«زاڭ بويىنشا ەكى كەپىلگەر-ۆوروبيەۆ پەن دارىبايەۆا-ورتاق جاۋاپكەرشىلىكتە. ياعني ولار كەلىسىمگە قول قويۋ ارقىلى بۇل جاۋاپكەرشىلىكتى ءوز ەركىمەن الدى. ءبىز جاعدايدىڭ ادىلەتسىز ەكەنىن تۇسىنەمىز. 2-3 كۇن بۇرىن گاۆريلەنكو تولىق ءوز كىناسىن مويىنداپ، ەكى جاقتى كەلىسىمشارتقا قول قويىلدى. سول كەلىسىمشارتتىڭ ارقاسىندا ول بۇكىل اقشانى قايتارامىن دەپ وزىنە مىندەت الدى. ەندى جاۋاپتى تۇلعالارعا دا باس پروكۋراتۋرا ارقىلى ءتيىستى زاڭناما اياسىندا ماسەلەسىن باستاپ كەتتىك»، – دەدى مينيستر سەنات كۋلۋارىندا.

مينيستر ماسەلە زاڭ اياسىندا شەشىلەتىنىن، كەپىل يەلەرىنە تالاپ قويىلمايتىنىن ايتتى. گاۆريلەنكو بولسا اقشانى تولەۋدى باستاعان.

«سونداي-اق جاۋاپ بەرۋشى 3 تاراپقا شاعىم تۇسىرۋگە ءماجبۇر بولدىق. سەبەبى زاڭ اياسىندا ولار دا جاۋاپتى. وسىلاي ىستەۋگە ءماجبۇر بولدىق. گاۆريلەنكو بارلىق اقشانى تولەسە، گارانت يەلەرىنە شاعىم بولمايدى. مەنىڭ ويىمشا، ولارعا دۇرىس كەڭەس بەرىلمەگەن. ولار ءقاۋىپتى سەزىپ، زالالدى تولىق وتەيمىز دەپ ويلانعان. بۇگىندە بارلىق شاعىم ۆالەريا گاۆريلەنكوعا قاتىستى بولادى»، – دەدى ۆەدومستۆو باسشىسى.

سونىمەن قاتار مينيستر «بولاشاق» حالىقارالىق باعدارلامالار ورتالىعىنىڭ بۇرىنعى باسشىلارى مەن قىزمەتكەرلەرىن جاۋاپكەرشىلىككە تارتۋ بويىنشا شارالاردى جەدەلدەتۋ ماقساتىندا باس پروكۋرورعا حات جولداعانىن ايتتى.

شاعىمدانۋشىلاردىڭ ايتۋىنا قاراعاندا، بۇل زاڭسىزدىق «بولاشاق» حالىقارالىق باعدارلامالار ورتالىعىنىڭ پرەزيدەنتى جانبولات مەلدەشوۆتىڭ كەزىندە بولعان. ول ورتالىقتى 2016 جىلدىڭ قىركۇيەگى مەن 2019 جىلدىڭ تامىزىنا دەيىن باسقارعان.

«حالىقارالىق باعدارلامالار ورتالىعى» اق باسپا ءسوز قىزمەتى بۇل جاعدايعا قاتىستى مالىمدەمە جاساپ، شەتەلدە زاڭسىز جۇرگەن ستيپەندياتتارعا قاتىستى اۋقىمدى تەكسەرىس ءجۇرىپ جاتقانىن حابارلادى.

«شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ 2015 جىلعى 14 جەلتوقسانداعى No 34-4.10 شەشىمى نەگىزىندە گاۆريلەنكو ۆ.ۆ. ۇلىبريتانيانىڭ ليۆەرپۋل ۋنيۆەرسيتەتىندە «ستراتەگيالىق كوممۋنيكاسيا» ماماندىعىنا ماگيستراتۋرا باعدارلاماسى بويىنشا وقۋ ءۇشىن ق ر پرەزيدەنتىنىڭ «بولاشاق» حالىقارالىق ستيپەندياسىنىڭ يەگەرى اتاندى، 2016-2017 وقۋ جىلىندا اكادەميالىق وقۋدان ءوتتى. جاسالعان كەلىسىمشارتتىڭ تالاپتارىنا سايكەس، ستيپەنديات وقۋىن اياقتاعاننان كەيىن ديپلومىن تاپسىرۋ، وقۋىن اياقتاعاننان كەيىن قازاقستان رەسپۋبليكاسىنا ورالۋ جانە قازاقستان رەسپۋبليكاسى اۋماعىندا ماماندىعى بويىنشا جۇمىس ىستەۋ مىندەتتەمەلەرىن الدى»،- دەلىنگەن حابارلامادا.

ورتالىقتىڭ حابارلاۋىنشا، كەلىسىمشارت اياسىندا ستيپەنديات وقۋ قۇنىنىڭ جالپى سوماسىنان كەم ەمەس باعالاناتىن جىلجىمايتىن مۇلىكتى كەپىلگە قويۋعا مىندەتتى. كەپىلگە قويىلعان جىلجىمايتىن مۇلىك اكادەميالىق وقۋدىڭ جالپى قۇنىن وتەمەگەن جاعدايدا، قامتاماسىز ەتىلمەگەن قالعان سوما بويىنشا ستيپەنديات وقۋىن اياقتاعاننان كەيىن مىندەتتەمەلەردى قامتاماسىز ەتەتىن جۇمىسقا قابىلەتتى كەپىلگەرلەردى ۇسىنادى.

گاۆريلەنكو ەكى جىلجىمايتىن مۇلىك نىسانىن كەپىل رەتىندە ۇسىنعان. الايدا ولاردىڭ قۇنى وقۋ قۇنىن تولىق وتەمەگەندىكتەن، ستيپەنديات ءۇشىن رەسمي تۇردە ەكى «كەپىلگەر» – م.ا.داريبايەۆا، ن.ا. ۆوروبيەۆا كەپىلدىك بەردى، ولاردىڭ ارقايسىمەن ورتالىق كەپىلدىك شارتتارىن جاساسقان.

«كەپىلدىك شارتىنىڭ 2.1 جانە 2.2 تارماقتارىنا سايكەس م.ا.داريبايەۆا مەن ن.ا. ۆوروبيەۆا وقۋدى ۇيىمداستىرۋ شارتى بويىنشا بارلىق مىندەتتەمەنى تولىق ورىنداۋعا بىرلەسىپ جاۋاپكەرشىلىكتى موينىنا العان. سونىمەن قاتار كەپىلدىك شارتىنىڭ 2.4 تارماعىنا سايكەس، ستيپەندياتتىڭ ورتالىق الدىنداعى مىندەتتەمەلەرىن ورىنداماۋى نەمەسە ءتيىستى تۇردە ورىنداماۋى جاعدايىندا مىندەتتەمەلەردى ورىنداۋ تۋرالى تالاپتى قاناعاتتاندىرماعان جاعدايدا، ورتالىق ورىندالماعان بولىكتەگى اتالعان تالاپتى كەپىلگەرگە قويۋعا قۇقىلى»، – دەلىنگەن ورتالىق مالىمدەمەسىندە.

بۇل ماقالا تۋرالى نە ويلايسىز؟