ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ساعادات نۇرماعامبەتوۆتىڭ 100 جىلدىنا وراي ەسكەرتكىش پەن ارنايى الاڭ اشىلدى

25 مامىر 2024 518

ساعادات نۇرماعامبەتوۆتىڭ 100 جىلدىعىنا وراي اقكول قالاسىندا قاھارمان تۇلعاسىن ەرەكشەلەيتىن ەسكەرتكىش پەن الاڭ اشىلدى، دەپ حابارلايدى Alash.KZ ۇلتتىق پورتالى. 

كەڭەس وداعىنىڭ باتىرى، حالىق قاھارمانى، ق ر ءبىرىنشى قورعانىس ءمينيسترى، ارميا گەنەرالى ساعادات نۇرماعامبەتوۆتىڭ عاسىرلىق مەرەيتويىنا وراي تۋعان جەرىندە سالتاناتتى جيىن ءوتتى. وعان پارلامەنت سەناتىنىڭ سپيكەرى ماۋلەن اشىمبايەۆ، قورعانىس ءمينيسترى، گەنەرال-پولكوۆنيك رۋسلان جاقسىلىقوۆ، اقمولا وبلىسىنىڭ اكىمى مارات احمەتجانوۆ، ارداگەرلەر، كۋرسانتتار، جەرگىلىكتى تۇرعىندار، سونداي – اق باتىردىڭ نەمەرەسى مەن شوبەرەسى-ايجان نۇرمانامبەتوۆا مەن ساتاي ماقسات قاتىستى.

ساعادات نۇرماعامبەتوۆ 18 جاسىنان ەل قورعاۋ قىزمەتىنە ارالاستى، 1943 جىلى سولتۇستىك كاۆكاز مايدانىندا جاس وفيسەر رەتىندە جاۋعا قارسى كۇرەستى. 

سوعىس جىلدارىندا ساعادات نۇرماعامبەتوۆ كراسنودار ولكەسىن، ۋكراينانى، مولدوۆانى، باتىس بەلارۋس پەن پولشانى ازات ەتۋگە قاتىستى. 1945 جىلى 27 اقپاندا «پولشا اۋماعىندا جاۋدىڭ مىقتى بەكىنىسىن بۇزىپ ءوتىپ، قولباسشىلىقتىڭ جاۋىنگەرلىك تاپسىرمالارىن ۇلگىلى ورىنداعانى ءۇشىن، سونىمەن قاتار كورسەتكەن باتىرلىعى مەن ەرلىگى ءۇشىن» قازاق حالقىنىڭ ۇلىنا كەڭەس وداعىنىڭ باتىرى اتاعى بەرىلدى.

ساعادات نۇرماعامبەتوۆ باسقارعان باتالون گيتلەردىڭ رەيحسكەڭسەسىنىڭ عيماراتىنا شابۋىل جاسادى. 

سوعىستان كەيىنگى 1946–1989 جىلدارى ساعادات قوجاحمەت ۇلى تۇركىستان اسكەري وكرۋگى شتابىنىڭ جەدەل باسقارۋ وفيسەرىنەن باستاپ ورتا ازيا اسكەري وكرۋگى اسكەرلەرى قولباسشىسىنىڭ ورىنباسارى لاۋازىمدارىن اتقاردى.

1992 جىلى 7 مامىردا گەنەرال نۇرماعامبەتوۆ تاۋەلسىز قازاقستاننىڭ قورعانىس ءمينيسترى بولىپ تاعايىندالدى.

1992 جىلدان 1995 جىلعا دەيىن مينيسترلىكتى باسقارعان ساعادات قوجاحمەت ۇلى ارميامىزدىڭ قالىپتاسۋى جولىندا ەرەن ەڭبەك ەتتى. قازاقستان رەسپۋبليكاسى پرەزيدەنتىنىڭ جارلىعىمەن 1994 جىلعى 23 مامىردا وعان № 1 «التىن جۇلدىز» تابىس ەتىلە وتىرىپ، حالىق قاھارمانى اتاعى بەرىلدى.

قىزمەتىن اياقتاعاننان كەيىن ساعادات قوجاحمەت ۇلى قازاقستان رەسپۋبليكاسى پرەزيدەنتىنىڭ كەڭەسشىسى بولىپ،ءومىرىنىڭ سوڭىنا دەيىن ەل يگىلىگىنە جۇمىس ىستەدى. 

بۇل ماقالا تۋرالى نە ويلايسىز؟