ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

قورعاۋشىلار بيشىمبايەۆتىڭ "ابايسىزدا كىسى ءولتىرىپ العانىن" ايتىپ، ءتورت اپەللياسيالىق شاعىم تۇسىرمەك

29 مامىر 2024 654
قۋاندىق بيشىمبايەۆتىڭ ادۆوكاتتارى تۇتاس ەلگە ءمالىم بولعان ۇكىمگە قاتىستى ءتورت اپەللياسيالىق شاعىم تۇسىرمەكشى. ولار بيشىمبايەۆ ابايسىزدا كىسى ءولتىرىپ الدى دەپ سانايدى، دەپ حابارلايدى Alash.KZ ۇلتتىق پورتالى.

كتك ارناسى 28 مامىر كۇنى بيشىمبايەۆتىڭ قورعاۋشىلارى قالاي قارسىلىق تانىتىپ جاتۇانىن باياندادى. اقپاراتقا سايكەس، ءۇش ادۆوكاتتىڭ ىشىندە العاش شاعىم تۇسىرگەن ەرلان عازىمجانوۆ بولعان. ول ۇكىمنىڭ "كىسى ءولتىرۋ" بابىنا قاتىستى تۇسىن "ابايسىزدا ادام ولىمىنە اكەپ سوققان دەنساۋلىققا اۋىر زيان كەلتىرۋ" بابىنا اۋىستىرۋدى سۇراپ وتىر. ال ۇكىمنىڭ "قورلاۋ" بابىنا قاتىستى بولىگىن مۇلدە الىپ تاستاۋ كەرەك دەگەن پىكىردى ۇستانادى. 

"ەرتەڭ ەكى ارىپتەسىم مەن بيشىمبايەۆتىڭ ءوزى دە يزولياتوردان اپەللياسيالىق شاعىمىن جىبەرەدى" - دەيدى ادۆوكات.

29 مامىر كۇنى تەرگەۋ يزولياتورىنان بيشىمبايەۆتىڭ ءوزى اپەللياسيالىق شاعىم جىبەرەدى دەپ جوسپارلانىپ وتىرعانى دا ءمالىم بولدى. 

"اپەللياسيالىق شاعىمدا سوت تالقىسى كەزىندە سۋديا جول بەرگەن 20-عا جۋىق پروسەسسۋالدىق زاڭ بۇزۋشىلىقتى كورسەتتىك. بۇل، ءبىزدىڭ ويىمىزشا، القابيلەر شەشىمى مەن ۇكىمنىڭ زاڭسىزدىعىنا سەبەپ بولدى. بۇگىن تەرگەۋ يزولياتورىندا بولدىم، قورعاۋىمداعى ازامات قۋاندىق بيشىمبايەۆقا ءوتىنىش ءماتىنىن كورسەتتىم، ول كەلىسىپ وتىر. ەرتەڭ ول دا ءوز شاعىمىن جىبەرمەك" - دەدى ەرلان عازىمجانوۆ.

ەسكە سالساق، بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ جۇبايى سالتانات نۇكەنوۆانى اسقان قاتىگەزدىكپەن ولتىرگەنى ءۇشىن كىنالى دەپ تانىلدى. ول 24 جىلعا باس بوستاندىعىنان ايىرىلدى. بيشىمبايەۆپەن بىرگە اۋىز جالاسىپ،  قاندى قىلمىستى جاسىرعانى ءۇشىن ءىنىسى باقىتجان بايجانوۆ 4 جىلعا سوتتالدى. ول دا كۇنى كەشە ۇكىممەن كەلىسپەي، اپەللياسيالىق شاعىم تۇسىرگەن ەدى. 

بۇل ماقالا تۋرالى نە ويلايسىز؟