ۋكراينا پرەزيدەنتى قىتايدى بەيبىتشىلىك سامميتىنە قاتىستى ايىپتادى، دەپ حابارلايدى Alash.kz سايتى "ادىرناعا" سىلتەمە جاساپ.
Gazeta.ru حابارلاۋىنشا ۆلاديمير زەلەنسكيي قىتايدىڭ بەيبىتشىلىك سامميتىنە كوپتەگەن ەلدەردىڭ وكىلدەرىنىڭ كەلۋىنە جول بەرمەۋگە تىرىسىپ جاتقانىن سينگاپۋردە وتكەن كونفەرەنسيادا ايتتى.
«رەسەي بۇگىندە الەمنىڭ كوپتەگەن ەلدەرىن ارالاپ، ازىق-تۇلىك ونىمدەرىن، اۋىل شارۋاشىلىق ونىمدەرىن نەمەسە حيميكاتتارىن شەكتەپ، ەنەرگيا باعاسىنا ءقاۋىپ توندىرىتەنىمەن قورقىتۋدا. رەسەي الەمنىڭ باسقا مەملەكەتتەرىنە سامميتكە كەلمەۋ ءۇشىن قىسىم كورسەتىپ جاتىر. ودان بولەك، بەيبىتشىلىك ءسامميتىن ديپلوماتيالىق جولمەن بۇزۋدا كەيبىر مەملەكەتتەردىڭ رەسەيگە كومەكتەسە باستاعانى تۋرالى دا اقپارات بار»، - دەدى ۋكراينا پرەزيدەنتى زەلەنسكيي.
پرەزيدەنت جۇڭگو ەلىنىڭ دە مۇنداي ارەكەتكە بارعانىن اتاپ ءوتتى.
"جۇڭگو وكىنىشكە قاراي، كەرىسىنشە – ەلدەردىڭ بەيبىتشىلىك سامميتىنە كەلۋىنە جول بەرمەۋ ءۇشىن جۇمىس ىستەپ جاتىر. بۇل تەك رەسەيدى قولداۋ ەمەس، شىن مانىندە سوعىستى قولداۋ»، - دەپ ءتۇسىندىردى زەلەنسكيي.
ايتا كەتەيىك، 31 مامىر كۇنى قىتايدىڭ بەيبىتشىلىك سامميتىنە قاتىسپايتىنى بەلگىلى بولعان.
