ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

قىسقا شولۋ. قىزىل سۋ ەلدى باسقاندا "قۇزىرلى قىزمەت قايدا ءجۇر؟"

06 ءساۋىر 2024 260

قازاقستاننىڭ ورتالىق، شىعىس-باتىس جانە سولتۇگى قارعىن سۋدان كەلگەن قيىندىقتى كورىپ وتىر. اۋىلداعى اعايىن مەن اتالعان ايماقتاردىڭ جاعدايى قانشالىقتى باقىلاۋدا ەكەندىگىنە قاتىستى شاعىن جولۋ جاساپ كوردىك. 

بۇگىن قازاقستان پرەمەر-مينيسترى ولجاس بەكتەنوۆتىڭ تاپسىرماسى بويىنشا توتەنشە جاعدايلار ءمينيسترى چينگيس ارينوۆ تاڭەرتەڭ قوستاناي وبلىسىنا كەلدى. اقپاراتتا: 

مىندەتى - سۋ تاسقىنى جاعدايىن تۇراقتاندىرۋ بويىنشا جۇمىستى ۇيلەستىرۋ. كەشە تابول وزەنى دەڭگەيىنىڭ قارقىندى كوتەرىلۋىنە بايلانىستى توبىل جانە قوستاناي قالالارىنىڭ ەلدى مەكەندەرىن سۋ باسۋ ءقاۋپى تۋىندادى. جۇمىس ساپارى بارىسىندا ۆەدومستۆو باسشىسى وبلىس اكىمى قۇمار اقساقالوۆپەن بىرلەسىپ ەۆاكۋاسيالىق پۋنكتتەردى، سۋ باسقان اۋلا ۋچاسكەلەرىن جانە قوستاناي اۋدانىنداعى كورەي كوپىرىندەگى بوگەتتەردى ارالادى، - دەپ حابارلانعان. 

ال جەتىسۋ وبلىسىنىڭ قۇتقارۋشىلارى اباي وبلىسىندا جۇمىسىن جالعاستىرىپ جاتىر. جەتىسۋلىقتار اباي وبلىسى، اياگوز اۋدانى، بوزاي اۋىلىنىڭ تۇرعىندارىنا جاردەمدەسىپ،اياگوز وزەنى ارقىلى ولاردى تاسىمالدادى. سوڭعى ءۇش كۇندە 155 ادام ورتالىققا جەتكىزىلىپ، ازىق-تۇلىك پەن دارى-دارمەك جەتكىزىلگەن.

سونىمەن قاتار، بۇگىن تاڭەرتەڭ اتىراۋ وبلىسىنىڭ قۇلسارى ەلدى مەكەنىنە اۆاريالىق-قۇتقارۋ جانە شۇعىل جۇمىستاردى جۇرگىزۋ ءۇشىن ۇلتتىق ۇلاننىڭ تىكۇشاعىمەن تجم ورتكە قارسى قىزمەت كوميتەتى ءتوراعاسىنىڭ ورىنباسارى پولكوۆنيك امانبايەۆ مارعۇلاننىڭ باسشىلىعىمەن 20982 اسكەري ءبولىمىنىڭ جيىنتىق-قۇتقارۋ توبىنىڭ 20 اسكەري قىزمەتشىسى ۇشىپ كەتتى.

اتىراۋ قالاسىنداعى قىزىل سۋدىڭ بەتىن قايتارۋ ءۇشىن الماتى وبلىسى تجد 33 قۇتقارۋشى جانە 13 بىرلىك تەحنيكاسى قۇرامىنداعى كۇشتەر مەن قۇرالدار توپتاماسى ارنايى باردى.

اقتوبە وبلىسىنا جايىلعان قارعىن سۋدىڭ دا قارقىنى قاتتى. ق ر قارۋلى كۇشتەرىنىڭ پونتوندىق كوپىر پاركى تۇندە اقتوبە وبلىسىنا جەتكىزىلدى. كوپىر جاقىن ارادا ويىل اۋدانى كولىك قاتىناسىن قالپىنا كەلتىرۋ ءۇشىن ورناتىلادى.

ماڭعىستاۋ وبلىسىنىڭ 50 جەكە قۇرامى ورال قالاسى ساياجاي-2 مەكەنجايىندا تۇراتىن تۇرعىندارمەن تىلدەسىپ، سۋ تاسقىنى بولعان جاعدايدا كوشۋ جانە الدىن الۋ ماقساتىندا دايىن بولۋعا شاقىردى.جەرگىلىكتى تۇرعىندارعا ۇگىت ناسيحات جۇمىستارىن جۇرگىزدى.

ايتا كەتەرلىگى، اتىراۋ وبلىسىنداعى قۇلسارى قالاسى قارعىن سۋدان قاتتى زارداپ شەگىپ جاتىر. 

"5 ءساۋىر ساعات 17:00-دەگى جاعداي بويىنشا سۋ تاسقىنى سالدارىنان 500-گە جۋىق نىسان مەن ينفراقۇرىلىمدىق عيماراتتار سۋ استىندا قالدى. سونداي-اق، الەۋمەتتىك نىساندار، ورتالىق ستاديون، قۇلسارى اكىمدىگى جانە ساۋدا نۇكتەلەرىن سۋ باستى"، – دەپ حابارلادى اتىراۋ وبلىسىنىڭ اكىمدىگى.

الەۋمەتتىك جەلىلەردە توتەنشە جاعداي قىزمەتىنىڭ دارمەنسىزدىگىن، قولىن مەرزىمىنەن كەيىن كەش سەرمەگەنىن، باسشىلىقتىڭ سەبەبىمەن ەمەس،قيىندىقتىڭ سالدارىمەن كۇرەسۋگە داعدىلانعانىن ايىپتاپ جاتقانداردىڭ قاراسى قالىڭ. ساراپشىلار كوكتەم سۋىنىڭ الداعى ۋاقىتتاردا كۇرت كوتەرىلىپ، ءدۇيىم جۇرتتى سارساڭعا سالاتىنىن ايتىپ وتىر. 

داستان قاستاي

 

 

بۇل ماقالا تۋرالى نە ويلايسىز؟