ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"قىرۋار قارجىنىڭ قايدا كەتكەنى بەلگىسىز". جەر سىلكىنىسىنە قاتىستى ەسكەرتۋ بولماعانى ءۇشىن قىلمىستىق ءىس قوزعالدى

05 ماۋسىم 2024 257

الماتى پروكۋراتۋراسى قاڭتار ايىندا بولعان جەر سىلكىنىسى كەزىندە بەيعامدىق تانىتقانداردىڭ ارەكەتىنە، ياعني سەيسميكالىق ەسكەرتۋ جۇيەسىنىڭ ۋاقىتىندا قوسىلماعانىنا قاتىستى قىلمىستىق ءىس قوزعادى. سونىمەن قاتار، جەر سىلكىنىسى كەزىندە دابىل قاعۋ، الدىن الا ەسكەرتۋ جۇيەسىنە ميلليارد تەڭگەدەن استام قارجى بولىنگەنى ايتىلدى، دەپ حابارلايدى Alash.KZ ۇلتتىق پورتالى. 

ەستەرىڭىزگە سالا كەتەيىك، الماتى قالاسى مەن قازاقستاننىڭ وڭتۇستىك شىعىسىندا 23 قاڭتار مەن 4 ناۋرىز كۇندەرى جەر ءدۇمپۋى تىركەلدى. قالا تۇرعىندارى بولعان تابيعات قۇبىلىسىنان سەكەم الىپ، شوشىنعانى بەلگىلى. ولار ەسكەرتۋ جۇيەسىنىڭ جۇمىس ىستەمەگەنىنە نارازى. سوعان وراي، سوتقا دەيىنگى تەرگەۋ ابايسىزدىق بابى بويىنشا جۇرگىزىلىپ جاتىر:

“الماتى قالالىق پروكۋراتۋراسى قىلمىستىق كودەكستىڭ 371-بابىنىڭ 2-بولىگى "ابايسىزدىق" بويىنشا قىلمىستىق ءىس قوزعادى. سوتقا دەيىنگى تەرگەپ-تەكسەرۋدى الماتى قالاسىنىڭ ارنايى پروكۋرورلار باسقارماسى جۇرگىزىپ جاتىر. قىلمىستىق ءىس جۇرگىزۋ كودەكسىنىڭ 201-بابىنا سايكەس سوتقا دەيىنگى تەرگەپ-تەكسەرۋدىڭ بارىسى تۋرالى وزگە دە مالىمەتتەر جاريا ەتىلمەيدى”، – دەدى الماتى قالالىق پروكۋراتۋراسىنىڭ اعا پروكۋرورى رايىمبەك شارىبايەۆ.

ورايى كەلگەندە ايتا كەتەيىك، پرەزيدەنت تە ءوز سوزىندە جەر سىلكىنىسى كەزىندە جايباراق قالعانداردىڭ ارەكەتىن سىناعان ەدى. "ادىلدىك جولى" رەسپۋبليكالىق قوعامدىق بىرلەستىگىنىڭ وكىلدەرى دە بۇل كىلتيپانعا قاتىستى ءوز بەتىنشە تەكسەرۋ جۇرگىزىپ جاتىر. ولاردىڭ ايتۋىنشا، ەسكەرتۋ جۇيەسىن ىسكە قوسۋ، قىزمەتىن جۇرگىسۋ ءىسىنىڭ ءوزى بيۋدجەتكە ءبىر ميلليارد تەڭگەدەن استام شىعىن اكەلگەن. قوعام بىرلەستىگى وكىلدەرىنىڭ ايتۋىنشا، قارجى دۇرىس جۇسالماعان جانە قاجەتتى تالاپتارعا ساي ەمەس. 

“مەردىگەردىڭ ايتۋىنشا، ءبىر شۆەيساريالىق سەيسميكالىق داچيك قۇنى 11 ميلليون تەڭگەدەن ءسال اسادى، وعان قوسا شاعىن سەرۆەرلىك قوراپ، كوممۋنيكاسيالىق قۇرال-جابدىقتار شامامەن 2-3 ميلليون. قۇرىلىسقا 7-9 ميلليون كەتتى دەلىك. بولجامىمىز بويىنشا ونىڭ قۇنى 20 ميلليوننان اسپايدى. دەگەنمەن قۇجات بويىنشا 40 ميلليون دەلىنگەن”، – دەپ مالىمدەدى "ادىلدىك جولى" رقب اتقارۋشى ديرەكتورى ديدار سماعۇلوۆ.

قازىرگى ۋاقىتتا شاش_ەتەكتەن شىعىن اكەلگەن ەسكەرتۋ جۇيەسىنىڭ ەسەبى سۇرالىپ جاتىر. قوعام بەلسەندىلەرى ىشكى مەملەكەتتىك اۋديت دەپارتامەنتىنەن اقشانىڭ نە ءۇشىن جۇمسالعانى تۋرالى ەسەپ بەرۋدى تالاپ ەتتى. 

بۇل ماقالا تۋرالى نە ويلايسىز؟