ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

«قازاقتاردىڭ سانى 80 ملن بولاتىن ەدى»: ەلوردادا Respublica پارتياسى ساياسي قۋعىن-سۇرگىن جانە اشارشىلىق قۇرباندارىن ەسكە الدى

31 مامىر 2024 636

ەلوردادا 31 مامىر - ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنىنە وراي «اشارشىلىق قۇرباندارىنا ەسكەرتكىش» مونۋمەنتىنە گۇل شوقتارىن قويۋ ءراسىمى ءوتتى، دەپ جازادى Alash.kz ۇلتتىق پورتالى.

ءىس-شاراعا Respublica پارتياسىنىڭ ءماجىلىس دەپۋتاتتارى مەن ورتالىق اپپاراتىنىڭ وكىلدەرى، الاشتانۋشى عالىمدار جانە بەلسەندى جاستار قاتىستى.

قاتىسۋشىلار قوعام قايراتكەرلەرىنىڭ، ساياسي قۋعىن-سۇرگىن قۇرباندارىنىڭ رۋحىنا تاعزىم ەتىپ، گۇل شوقتارىن قويدى.

يستوچنيك: https://mangystaumedia.kz/kk/zhanalyktar/mangystau-zhanalyktary/aktauda_sayasi_kugin-surgin_kurbandarin_eske_alu_kunine_oray_eskertkishterge_gul_shoktarin_koyu_rasimi_otti

راسىمگە قاتىسۋشىلار ساياسي قۋعىن-سۇرگىن جانە اشارشىلىق قۇرباندارىن ءبىر مينۋت ۇنسىزدىكپەن ەسكە الدى. 

تاريحي ادىلەتتىلىكتى ورناتۋ تۇرعىسىنان ماڭىزدى كۇن

«قازاقستاندا جىل سايىن 31 مامىر ساياسي قۋعىن-سۇرگىن جانە اشارشىلىق قۇرباندارىن ەسكە الۋ كۇنى رەتىندە اتالىپ وتەدى جانە تاريحي ادىلەتتىلىكتى ورناتۋ تۇرعىسىنان ماڭىزدى كۇن دەپ سانايمىن. بۇل كۇن بىزگە قازاق حالقىنىڭ وتكەنىن، قازا تاپقان باتىرلاردى ەسكە الۋعا جانە ءوز تاۋەلسىزدىگىمىزدى باعالاۋعا كومەكتەسەدى»،- دەپ اتاپ ءوتتى Respublica پارتياسىنىڭ ءتوراعاسى، ءماجىلىس دەپۋتاتى ايداربەك قوجانازاروۆ.

سونداي-اق Respublica پارتياسىنىڭ ءتوراعاسى ءوز سوزىندە اشارشىلىق بولماسا، بۇگىندە قازاقتاردىڭ سانى ەداۋىر كوپ بولار ەدى دەپ جەتكىزدى.

اشارشىلىق بولماسا، ءقازىر قازاقتار 80 ملن حالىق بولاتىن ەدى

«مىناۋ جۇتتىڭ الدىندا ءبىر دەرەكتەر بويىنشا ءبىز 4 ملن، ال ەندى باسقا اقپاراتتار بويىنشا ءبىز 5 ملن حالىق بولعانبىز. ەندى سول ستاتيستيكاعا قايتا ورالساق، قالاي كوبەيەر ەدىك؟ ەگەر اشارشىلىق بولماسا، وسىنداي ءبىر قيىنشىلىقتار بولماسا، ءقازىر قازاقتار 80 ملن حالىق بولاتىن ەدى. وزىمىزدەگى باسقا ۇلتتاردى قوسساق، 90-100 ملن-عا دەيىن جەتەتىن ەدىك. تۇركيادان كەم بولماس ەدىك. ەلىمىز ءۇشىن، اتا-بابالارىمىز ءۇشىن جانىڭ اشيدى، قانشاما قيىندىقتان وتكەنىن تۇسىنەسىڭ. ءبىراق ەكىنشى جاعىنان بۇل ءبىز ءۇشىن ۇلكەن جاۋاپكەرشىلىك! ەلدى، جەردى ساقتاپ قالدى. ۇلت ازاتتىعى جولىندا قۇربان بولعان وسى كىسىلەردىڭ الدىندا بۇگىن ودان دا ۇلكەن جاۋاپكەرشىلىك تۇر»، - دەدى ايداربەك قوجانازاروۆ.

ساياسي قۋعىن-سۇرگىن قۇرباندارىن ەسكە الۋعا ارنالعان ءىس-شارا «الجير»-دە جالعاستى. پارتيا مۇشەلەرى «الجير» مەموريالدىق-مۇراجاي كەشەنىندەگى ەسكە الۋ قابىرعاسىنا گۇل شوقتارىن قويىپ، بابالار رۋحىنا تاعزىم ەتىپ، قۇران باعىشتادى.

الاش ارداقتىلارىنا، ۇلت زيالىلارىنا ماڭگى قارىزدارمىز

«ءاليحان بوكەيحان ءمىرجاقىپ دۋلات ۇلى مەن احمەت بايتۇرسىنۇلىنا تۇرمەدەن جولداعان حاتىندا، «الدا ءالى كۇندى كورەتىن ۇرپاق كەلەدى. سول ۇرپاق سەندەردى ۇلكەن ريزاشىلىقپەن، ۇلكەن قۇرمەتپەن ەسكە الاتىن بولادى. كۇرەس جولىنا تۇسكەندەرىڭە وكىنبەڭدەر...» دەپ جازعانىن بىلەمىز. وسى سوزدەردى ەش ۇمىتپاۋىمىز كەرەك جانە ۇلكەن وي تۇيۋگە ءتيىسپىز. ءبىز، بۇگىنگى ازات تاڭ ءۇشىن، ەگەمەن كۇن ءۇشىن الاش ارداقتىلارىنا، ۇلت زيالىلارىنا ماڭگى قارىزدارمىز. ءبىز سولاردىڭ ارقاسىندا «كۇندى» كورگەن ۇرپاقپىز! قازاقتا «ءولى رازى بولماي، ءتىرى بايىماس» دەگەن ءسوز بار. اياۋلى ارىستار ازاتتىق ءۇشىن، ەل مەن جەر ءۇشىن، ءتىل ءۇشىن، بۇگىنگى ۇرپاق - ءبىزدىڭ بولاشاعىمىز ءۇشىن جانىن قيدى، جولىندا نە بار ءبارىن قيدى. ءبىز سولاردان قالعان ەل مەن جەرگە تولىق يەلىك ەتىپ، اماناتتاعان ءتىلىن قاستەرلەپ، تۇتاس مەڭگەرگەن كەزدە، ياعني ۇلتتىق قۇندىلىقتارىمىزدىڭ قادىر-قاسيەتىن تۇسىنگەن كۇنى دامۋدىڭ جاڭا جولىنا تۇسەمىز. مىنە، ۇلتتىق تۇرعىدان قاراعاندا ءارۋاقتىڭ رازىلىعى دەگەن وسى دەپ ەسەپتەيمىن،- دەدى Respublica پارتياسى ورتالىق اپپاراتىنىڭ باس مەنەدجەرى ەرجان ەڭسەباي.

الاش مۇراسىن ناسيحاتتاۋشى ەرجان ەڭسەباي 31 مامىردى «جالپىۇلتتىق ازا تۇتۋ كۇنى» رەتىندە بەكىتۋدى ۇسىنىپ، بۇگىنگى جاس بۋىنعا شىنايى تاريحتى ءتۇسىندىرۋ قانشالىقتى ماڭىزدى ەكەنىن اتاپ ءوتتى.

31 مامىر - «جالپىۇلتتىق ازا تۇتۋ كۇنى» رەتىندە بەكىتىلۋى كەرەك

«بۇگىن، زۇلمات جىلداردىڭ قۇربانى بولعان، ساياسي قۋعىن-سۇرگىنگە ۇشىراپ، جازىقسىز، ادىلەتسىز جاپا شەككەن تۇلعالاردى، بالاسىنان ايىرىلىپ ەڭىرەپ جىلاعان انالاردى، اتا-انا مەيىرىمىنە مۇقتاج بولعان بالالاردى، توز-توز بولىپ قولدان جاسالعان اشتىقتان قىرىلعان جانداردى ەسكە الاتىن، رۋحىنا تاعزىم ەتەتىن ازالى كۇن، جارالى كۇن. بولاشاقتا وسىنداي جاعداي قايتالانباي، حالقىمىز ءاردايىم بەيبىت ءارى باقىتتى كۇن كەشسىن دەپ تىلەيمىن! بۇگىنگى بۋىن ءبىلىمدى، رۋحتى، نامىسشىل، ەڭبەكقور، جان-جاقتى بولىپ ءوسۋى ءتيىس. سوندا ءبىزدى جاۋ دا، داۋ دا الا المايدى جانە مەملەكەتتىلىگىمىز ومىرشەڭ بولادى. بابالاردىڭ دا ارمان-مۇراتى وسى ەدى. 31 مامىر - «جالپىۇلتتىق ازا تۇتۋ كۇنى» رەتىندە بەكىتىلۋ كەرەك دەپ ەسەپتەيمىن. وسى كۇنى ويىن-ساۋىق، توي-دۋمان جانە وزگە دە شارالارعا شەكتەۋ قويىلۋى ءتيىس. تۇتاس ەل بولىپ، وسى كۇندە توتاليتارلىق جۇيەنىڭ قۇربانى بولعان مارقۇمداردى ەسكە الىپ، رۋحتارىنا تاعزىم ەتۋىمىز كەرەك. تاريحتان ساباق الىپ، سونىڭ باعاسىن بىلگەن ۇرپاق قانا بولاشاققا اشىق ءارى شىنايى كوزبەن قاراي الادى. سونىمەن قاتار، بۇل تاقىرىپتا ءالى دە زەرتتەلمەگەن، تولىق اشىلماعان دەرەكتەر مەن فاكتىلەر بار. وعان دا اسا ءمان بەرۋ كەرەك. جاستارعا شىنايى تاريحتى ءتۇسىندىرۋ ارقىلى ولاردىڭ بويىنا وتانشىلدىق، ەلجاندىلىق سەزىمدەردى سىڭىرە الامىز. قاسىرەتتى جىلدار كەلمەسكە كەتىپ، الاش ۇرپاقتارى باقىتتى-باياندى عۇمىر كەشسە ەكەن دەيمىن»، - دەپ پىكىر ءبىلدىردى ەرجان ەڭسەباي.

زارينا اشىربەك،

Alash.kz ۇلتتىق پورتالى

بۇل ماقالا تۋرالى نە ويلايسىز؟