ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

قازاقستاننىڭ انگلياداعى ەلشىسى سالىق تولەمەگەن بە؟ ءسىم وكىلى جاۋاپ بەردى

03 ماۋسىم 2024 399

سىرتقى ىستەر مينيسترلىگىنىڭ رەسمي وكىلى ايبەك سمادياروۆ لوندون قالاسىندا اقىلى جولدارمەن جۇرگەنى ءۇشىن اقشا تولەمەگەن قارىز ەلشىلىكتەردىڭ تىزىمىندە نە سەبەپتى قازاقستان ەلشىلىگىنىڭ ەنگەنىن ءتۇسىندىردى، دەپ حابارلادى Alash.kz سايتى  Halyq Uni-نە سىلتەپ.

Transport for London كورپوراسياسىنىڭ مالىمەتىنشە، ۇلىبريتانيالىق باق-تا شەتەلدىك ەلشىلىك قىزمەتكەرلەرىنىڭ لوندوننىڭ ورتالىعىنا كولىكپەن كىرگەنى ءۇشىن الىم تولەمەگەنى تۋرالى اقپارات جاريالانعان. ونداعى دەرەكتەر 2003-2023 جىلدار ارالىعىنداعى قاراجاتتى قامتيدى.

2003 جىلدان باستاپ ۇلىبريتانيا استاناسىنىڭ ورتالىعىنا (كولىكپەن) كىرۋ ءۇشىن تولەم ەنگىزىلگەن. قازاقستاننىڭ ۇلىبريتانياداعى ەلشىلىگىنىڭ عيماراتى لوندوننىڭ ورتالىعىندا ورنالاسقان. وندا جۇرگىزۋشىلەر جۇمىس كۇندەرى ساعات 7:00-دەن 18:00-گە دەيىن، ال دەمالىس ءارى مەرەكە كۇندەرى ساعات 12:00-دەن 18:00-گە دەيىن كىرۋ ءۇشىن 15 فۋنت (8537،40 تەڭگە، 1 تەڭگە – 569،16 تەڭگە) تولەۋى كەرەك. دەمەك ەلشىلىك قىزمەتكەرلەرىنىڭ ءوز اۋماعىنا بارۋىنا تولەم سالىنىپ وتىر. لوندونداعى شەتەلدىك ديپلوماتيالىق كورپۋستىڭ – سول اۋماقتاعى ەلشىلىكتەردىڭ جالپى پىكىرى بويىنشا، بۇل تولەم جەرگىلىكتى سالىق رەتىندە سانالادى، - دەدى ايبەك سمادياروۆ سىم-دە وتكەن باسپا ءسوز ءماسليحاتىندا. 

رەسمي وكىل 1961 جىلعى ديپلوماتيالىق قارىم-قاتىناس تۋرالى ۆەنا كونۆەنسياسىنا سايكەس، ديپلوماتتاردىڭ جەرگىلىكتى سالىقتان بوساتىلعانىن اتاپ ءوتتى. سوندىقتان Transport for London جاريالاعان اقپاراتقا سايكەس، ول جول ەرەجەسىن بۇزعانى ءۇشىن تولەنەتىن ايىپپۇلعا جاتپايدى.

باسقا دا ەلشىلىكتەر ونى تولەيمىز دەپ شەشسە، وندا ءبىز دە وسى جاعىن قاراستىرامىز. جالپى اتالعان كونۆەنسياعا سايكەس، ديپلوماتتار سالىق تولەمەۋى كەرەك. بۇل ءوز كەزەگىندە ايىپپۇل ەمەس، سالىق رەتىندە قاراستىرىلعان. وسى رەتتە قازاقستان عانا ەمەس، ءبىرقاتار ەلدىڭ ەلشىلىگى سول اۋماقتا ورنالاسقان. باسقا دا ەلشىلىكتەر بۇل الىمنىڭ زاڭسىز ەكەنىن ايتىپ وتىر، - دەدى ول.

بۇعان دەيىن باق-تا لوندون مەرياسىنا قاراستى Transport for London مەملەكەتتىك كومپانياسى 20 جىل بويى اقىلى جولدارمەن جۇرگەنى ءۇشىن اقشا تولەمەگەن قارىز ەلشىلىكتەردىڭ ءتىزىمىن جاريالاعان بولاتىن. ەلشىلىكتەردىڭ جالپى قارىزى – 145 ملن فۋنت. 

ءتىزىمنىڭ كوشباسىندا اقش (14،6 ملن فۋنت) تۇر. ودان كەيىن جاپونيا – 10 ملن فۋنت، ءۇندىستان – 8،5 ملن فۋنت، نيگەريا – 8،4 ملن فۋنت، جۇڭگو – 7،9 ملن فۋنت، رەسەي – 6 ملن فۋنت، قازاقستان 4،7 ملن فۋنت (شامامەن 5،9 ملن دوللار) تولەمەگەن.

بۇل ماقالا تۋرالى نە ويلايسىز؟