ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

قازاقستانداعى قۇندى قولجازبالار جويىلۋدىڭ الدىندا تۇر

28 ناۋرىز 2024 161

«عىلىم ورداسى» عىلىمي كىتاپحاناسىنداعى قۇندى قولجازبالار جويىلۋدىڭ الدىندا تۇر. بۇل تۋرالى ءماجىلىس دەپۋتاتتارى مالىمدەدى. 

دەپۋتات ارداق نازاروۆتىڭ ايتۋىنشا، كىتاپحانا قورىنداعى ءحىى-حVءىىى عاسىرلارعا تيەسىلى قۇندى جادىگەرلەر ءالى باسىلىپ شىقپاعان.

كىتاپحانا قورىنداعى ءحىى-حVءىىى عاسىرلار اراسىن قامتيتىن قۇندى مۇرالار، ءال-فارابي، الىشەر ناۋاي، اباي قۇنانباي ۇلى، ءماشھۇر ءجۇسىپ كوپەي ۇلى، شوقان ءۋاليحانوۆ، مۇحتار اۋەزوۆ، ابۋباكىر ديۆايەۆ، الكەي مارعۇلان سىندى ءىرى تۇلعالاردىڭ قولجازبالارى، ابىلاي حاننىڭ حاتى، 3 مەترلىك وراما ماتادا جازىلعان «قازاق حاندارىنىڭ شەجىرەسى»، 12-عاسىردا بۇزاۋ تەرىسىنە جازىلعان 26 مەتىرلىك «ءتاۋرات» كىتابىنىڭ قولجازباسى ساقتالعان. ودان بولەك، 20 مىڭنان اسا قۇندى قولجازبا بار. ولاردىڭ كوبى ءالى كىتاپ بولىپ باسىلىپ شىقپاعان، دەدى نازاروۆ.

سونىمەن قاتار ول، كىتاپحاناعا قارجى بولىنبەيتىنىن، سالدارىنان مامان تاپشى ەكەنىن العا تارتتى. 

وسىدان 30 جىل بۇرىن ورتالىق عىلىمي كىتاپحانادا 305 قىزمەتكەر جۇمىس ىستەگەن بولسا، ءقازىر 32 مامان عانا قىزمەت ەتەدى. مامان تۇراقتامايدى، ماردىمسىز جالاقىعا ەشكىم كەلمەيدى. 30-40 جىلدان بەرى قىزمەت ەتىپ كەلە جاتقان وتە تاجىريبەلى كىتاپحاناشىلاردىڭ ءوزى 100 مىڭ تەڭگەنىڭ توڭىرەگىندە عانا ايلىق الادى!.. ال كىتاپحانادا اتقارىلاتىن جۇمىستار شاش ەتەكتەن. كەزىندە 300-دەن استام مامان ىستەگەن جۇمىستى باس-اياعى 30-عا دا جەتپەيتىن قىزمەتكەرلەر قالاي اتقارسىن؟!. مامان تاپشىلىعىنا بايلانىستى كىتاپحانانىڭ ەلەكتروندى كاتالوگى تولىق جاسالماي وتىر. ءقازىر 30% قور ەلەكتروندى كاتالوگقا ەندى، 70% قوردى وقىرماندار قاعاز جاشىكتەردەن كىتاپحاناعا كەلىپ قانا قاراي الادى، دەدى نازاروۆ. 

بۇل ماقالا تۋرالى نە ويلايسىز؟