ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

قازاقستان تالىبتەر رەجيمىن تەررورلىق ۇيىمدار تىزىمىنەن الىپ تاستادى - توقايەۆ

03 ماۋسىم 2024 265

پرەزيدەنت قاسىم-جومارت توقايەۆ الماتىدا ۇجىمدىق قاۋىپسىزدىك تۋرالى شارت ۇيىمى پارلامەنتتىك اسسامبلەيا كەڭەسىنىڭ وتىرىسىنا قاتىسۋشىلارمەن كەزدەسۋ وتكىزدى.

قاسىم-جومارت توقايەۆ جيىندا اۋعانستانداعى جاعدايعا ايرىقشا توقتالدى دەپ، حابارلايدى Alash.kz سايتى "اقوردانىڭ" تەلەگرام ارناسىنا سىلتەمە جاساپ.

پرەزيدەنتتىڭ پىكىرىنشە، قازىرگى كەزەڭدەگى ستراتەگيالىق مىندەتتەردىڭ ءبىرى – اۋعانستاندى ءوڭىرارالىق بايلانىستارعا بەلسەندى تارتۋ.

– قازاقستان تالىبتەر رەجيمىن تەررورلىق ۇيىمدار تىزىمىنەن الىپ تاستادى. ويتكەنى قازىرگى اۋعانستانمەن ساۋدا-ەكونوميكالىق ىنتىماقتاستىقتى دامىتۋ ماڭىزدى ءارى بۇگىنگى رەجيم ۇزاقمەرزىمدى فاكتور بولادى دەپ ويلايمىز، – دەدى مەملەكەت باسشىسى.


پرەزيدەنت بۇل ماسەلەدە ۇقشۇ-عا مۇشە ەلدەردىڭ ءوزارا كەلىسىلگەن ۇستانىمى بولۋى كەرەك ەكەنىنە نازار اۋدارىپ، الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى ايماقتىق ورتالىق قۇرۋ تۋرالى قازاقستاننىڭ باستاماسىن قولداۋعا شاقىردى.

قاسىم-جومارت توقايەۆ قازىرگى زاماننىڭ سىن-قاتەرلەرىنە قارسى ارەكەت ەتۋ جۇيەسىن جەتىلدىرۋ قاجەت ەكەنىن ەسكەرە وتىرىپ، ۇقشۇ كۇش-جىگەرىن ۇيىم جارعىسىنا سايكەس مۇشە-مەملەكەتتەر ءۇشىن بارىنشا وزەكتى ءارى ءتيىستى جۇمىس باعىتتارىنا جۇمىلدىرۋدى ۇسىندى. قازاقستان اتالعان مىندەتتەردى ۇيىمعا ءتوراعالىق ەتۋ كەزەڭىندە باسىم باعىت رەتىندە بەلگىلەدى.

اتاپ ايتقاندا، پرەزيدەنت تەرررورلىق قاۋىپ-قاتەرمەن كۇرەسۋ جانە ۇقشۇ-عا مۇشە ەلدەر ازاماتتارىنىڭ قاۋىپسىزدىگىن قامتاماسىز ەتۋ ءۇشىن پارمەندى شارالار قابىلداۋ قاجەت دەپ سانايدى.

بۇل ماقالا تۋرالى نە ويلايسىز؟