ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

«قازاقستان ماسكەۋدەگى تەراكتىدەن ساباق الۋى كەرەك» – ايدوس سارىم

27 ناۋرىز 2024 280

ەلىمىز ماسكەۋدە بولعان لاڭكەستىك شابۋىلدان ساباق الۋى ءتيىس. بۇل تۋرالى بۇگىن ءماجىلىس دەپۋتاتى ايدوس سارىم ايتتى.

ول ماسكەۋ ماڭىنداعى «كروكۋس سيتي حولل» كونسەرت زالىندا بولعان تەراكتى تۋرالى ايتاپ كەلىپ، پرەمەر-مينيستر ولجاس بەكتەنوۆكە دەپۋتاتتىق ساۋال جولدادى.

«وتكەن اپتادا رەسەي فەدەراسياسى ماسكەۋ ماڭىندا ورنالاسقان كراسنوگورسك قالاسىنداعى «كروكۋس سيتي حولل» كونسەرت زالىندا تەرروريستىك اكت بولدى. سالدارىنان جازىعى جوق كوپتەگەن بەيبىت تۇرعىن قازا تاپتى. پارلامەنت ءماجىلىسىنىڭ دەپۋتاتتارى قازا تاپقاندار مەن جارالانعانداردىڭ وتباسىنا كوڭىل ايتىپ، زارداپ شەككەندەردىڭ تەزىرەك ساۋىعىپ كەتۋىن تىلەيدى. ءبىز، مەملەكەت باسشىسى قاسىم-جومارت توقايەۆپەن تىلەكتەسپىز»، - دەدى ءماجىلىس دەپۋتاتى.

ونىڭ پايىمداۋىنشا قازاقستان ماسكەۋدەگى تەراكتىدەن ساباق الۋى كەرەك.

«ولجاس اباي ۇلى، ءبىز، قازاقستان بولعان وقيعانى جان-جاقتى زەردەلەپ، ساباق الۋى كەرەك دەپ سانايمىز. وقيعالاردى تالداۋ بارىسىندا تراگەديا قۇرباندارىنىڭ ۇشتەن ءبىرى تىكەلەي تەرروريستىك شابۋىلدان قايتىس بولعان، ال قالعان ادام شىعىنى وقيعا ورنىندا بولعان ءورت پەن دۇربەلەڭگە، كۇش قۇرىلىمدارى مەن ءىس-شارانى ۇيىمداستىرۋشىلاردىڭ بىرلەسىپ ارەكەت ەتپەۋىنەن بولدى. ورتالىق جانە جەرگىلىكتى اتقارۋشى ورگاندار قاۋىپسىزدىك كەڭەسىنىڭ جەدەل كەڭەسىندە مەملەكەت باسشىسى بەرگەن تاپسىرمالاردى ءسوزسىز ورىندايدى دەپ سەنەمىز»، - دەدى ايدوس سارىم.

ءتىپتى ۇكىمەتتىڭ قانداي ماسەلەلەرگە نازار اۋدارۋى كەرەكتىگىن ايتتى:

بىرىنشىدەن، سالىنىپ جاتقان مادەني-بۇقارالىق جانە سپورت عيماراتتارىن سالۋ جانە مىندەتتى تۇردە مەملەكەتتىك قابىلداۋ ماسەلەسىنە مەملەكەتتىك باقىلاۋدى كۇشەيتۋگە نازار اۋدارۋىمىز كەرەك.

ەكىنشىدەن، ءقازىر ەلىمىز بويىنشا مادەني-بۇقارالىق، سپورتتىق ءىس-شارالاردى وتكىزۋ مەن رەگلامەنتتەۋ الگوريتمدەرىن قايتا قاراۋ، ولاردى ۇيىمداستىرۋشىلاردىڭ قۇقىق قورعاۋ ورگاندارىمەن جانە شۇعىل كومەك كورسەتۋ قىزمەتىمەن ءوزارا ءىس-قيمىل تەتىكتەرىن نەعۇرلىم ناقتى بەلگىلەۋ قاجەت. تۋىنداعان جاعدايدا ناقتى جوسپارلار بولۋعا ءتيىس.

ۇشىنشىدەن، ادامدار ءجيى باراتىن مادەني-سپورتتىق عيماراتتار مەن زالدارعا ولاردىڭ تەرروريزمگە قارسى، ورتكە قارسى جانە وزگە دە قاۋىپسىزدىگى، ولاردىڭ قاجەت سيگنالدىق جانە ورتكە قارسى جابدىقتارمەن قامتاماسىز ەتىلۋى تۇرعىسىنان اۋديت جۇرگىزۋ، ولاردىڭ جۇمىس كۇيىندە بولۋىن تەكسەرۋ كەرەك.

ەسكە سالساق، بيىل 22 ناۋرىز ءتۇنى ماسكەۋ ماڭىنداعى «كروكۋس سيتي حولل» كونسەرت زالىندا كامۋفلياج كيگەن بىرنەشە ادام جۇرتقا وق جاۋدىرعان بولاتىن. رەسەي تەرگەۋ كوميتەتىنىڭ مالىمەتىنشە، تەراكتىدەن 139 ادام قازا تاۋىپ، 180 ادام زاپا شەككەن.

بۇل ماقالا تۋرالى نە ويلايسىز؟