ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"قازاقستان ازاماتتارى ءۇشىن قاجەت جاعدايدىڭ بارىنە بارا الادى": اقوردا ۋكراينادا قاستاندىق جاسالعان قازاقستان ازاماتىنا قاتىستى پىكىر ءبىلدىردى

21 ماۋسىم 2024 307
سوعىس بوپ جاتقان ۋكراينادا، مايدان دالاسىنان الىس استاناسى كييەۆتە قازاقستاندىق جۋرناليست ايدوس سادىقوۆقا قاستاندىق جاسالدى. ءوز ماشينەسىندە ايەلىمەن اڭگىمەلەسىپ وتىرعان ايدوسقا بەلگىسىز ءبىر ەر ادام پيستولەتتەن بىرنەشە رەت وق اتقان دا قاشىپ كەتكەن. وقتىڭ ءبىرى ايدوستىڭ باسىنا ءتيىپ، جۋرناليست ءقازىر اۋرۋحانادا ءومىر ءۇشىن كۇرەسىپ جاتىر. جاقسىلىعى جاقىن بولسىن!
 
مەن بۇل وقيعادان ءبىر سۇلبا كورەمىن - ىسكە ۋكراينا قۇپيا ورگاندارىنىڭ قاتىسى بولماسا مىناداي دارەجەدەگى قاستاندىق وي ىسكە اسا ما؟.. قايدام-اۋ...
 
ەل سوعىس جاعدايىندا. اشەيىندە كوشەدەگى بەيسەۋبەت جۇرگەن ادامدى توقتاتىپ، قۇجاتىن تەكسەرىپ، "سوعىستان قاشىپ جۇرگەن جوقسىڭ با" دەپ ءبىر ءتيىسىپ الاتىن ۋكراين ساقشىلارى تۇمسىعىنىڭ استىندا تاپانشامەن جۇرگەندەردى قالاي "كورمەي قالعانى" تۇسىنىكسىزدەۋ...
 
رەسەيمەن دە، اقشپەن دە، قىتايمەن دە، بۇۇنىڭ بولاشاق باس حاتشىسىمەن دە اماندىق-ساۋلىعى ءتۇزۋ، اڭگىمەسى دۇپ-دۇرىس توقايەۆتىڭ تىرلىگى ۇنامايتىن شىعار، بالكىم.
راسىندا، ءقازىر "قازاقستاندا كىمنىڭ قىزىعۋشىلىعى جوق" دەگەن سۇراققا جاۋاپ بەرگەن وڭايىراق. اراب تا، جۇڭگو دا، امىركەن دە، اعىلشىن دا، فرانسۋز دا، نەمىس تە، قىسقاسى كىم مىقتىنىڭ ءبارى قازاقستانعا ءبىر زاۋىت، كەنورىن نەمەسە ينۆەستيسيا سالىپ قويعان.
 
پرەزيدەنتىمىز دە الەمدى شارلاپ تىنىم تاپپايدى. تاقا بولماسا ەلگە قوناق شاقىرادى، دامىعان ەلدەردىڭ بيزنەس وكىلدەرىن، اقشالى ادامدارىن اكەلىپ قازاقتىڭ ىسكەر جىگىتتەرىمەن تانىستىرادى، بىرگە جۇمىس ىستەپ كەتۋىنە ىرگەتاس قالاپ بەرەدى.
سونىڭ ارقاسىندا قازاقستان كورشىسىندەگى سوعىسقا قاراماستان مىسىقتابانداپ بولسا دا ىلگەرىلەپ بارادى ءام بولاشاعىنىڭ دا جارقىن ەكەنىنە بەك سەنىمدى!
مىنە، بۇل باسقالارعا ۇنامايدى!!!
 
پرەزيدەنت توقايەۆتىڭ ءوزى دە بۇل وقيعا تۋرالى پىكىر بىلدىرگەن بولاتىن:
- ۋكراينادا ءبىر ازاماتىمىزعا قاستاندىق جاسالعانىن ەستىدىم. بۇل بەي-جاي قارايتىن جەڭىل-جەلپى ءىس ەمەس. قازاقستان ازاماتتارى ءۇشىن قاجەت جاعدايدىڭ بارىنە بارا الادى. ءبىز بۇل ءىستى تەرگەۋ كەزىندە ۋكراينانىڭ قۇزىرلى ورگاندارىمەن تىزە قوسا قيمىلداۋعا، قاجەت كومەكتىڭ ءبارىن بەرۋگە دايىنبىز" دەپتى ۇلكەن كىسى.
 
پرەزيدەنت توقايەۆتىڭ بۇل وقيعا تۋرالى ءوزىنىڭ پىكىرىن اشىق بىلدىرگەنى ءارى اقپارات شىققان بويدا شۇعىل تۇسىنىك بەرگەنى ورىندى-اق بولدى. قازاقستاننىڭ الەمدىك ارەناداعى اتىنا قارا كۇيە جاعۋعا تىرىسقاندارعا جاقسى جاۋاپ بولدى.
 
"قازاقستان بيلىگى وزىنە قارسى شىققان جۋرناليستەردىڭ ءوزىن اتىپ تاستايدى ەكەن" دەگەن اقپارات تاراتىپ، الەمنىڭ ءسوز بوستاندىعىن سۇيگىش ادامدارىنىڭ قازاقستانعا دەگەن سەزىم، سەنىمدەرىنە سەلكەۋ تۇسىرمەك بولعانداردىڭ تالابى تاسقا سوعىلعان سىڭايلى!
اقوردانىڭ اشىق اڭگىمە ايتقانى، بۇقپاي، بۇكپەي مالىمدەمە جاساعانى ءجون-اق بولدى!
الماس التاي
بۇل ماقالا تۋرالى نە ويلايسىز؟