ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

قازاق باۋىرلارىمىزبەن بىرگە بولامىز – ەردوعان (ۆيدەو)

10 مامىر 2022 79



تۇركيا پرەزيدەنتى رەجەپ تايىپ ەردوعان انكارادا قازاقستان پرەزيدەنتى قاسىم-جومارت توقايەۆپەن كەزدەسكەننەن كەيىن مالىمدەمە جاسادى.





بۇل تۋرالى Tengrinews.kz حابارلايدى.





ەردوعان توقايەۆتى باۋىرىم دەپ اتاپ، قازاقستاندى تۇرىكتەردىڭ تاريحي وتانى، ال تۇركيانى قازاقتاردىڭ ەكىنشى وتانى سانايتىنىن ايتتى.





– بيىل قازاقستان مەن تۇركيا ديپلوماتيالىق قارىم-قاتىناسقا 30 جىل تولىپ وتىر. جاڭا عانا قول قويعان ورتاق دەكلاراسيا ارقىلى ءبىز ارىپتەستىك قارىم-قاتىناسىمىزدى ستراتەگيالىق سەرىكتەستىكتىڭ جاڭا دەڭگەيىنە كوتەردىك. تۇركيا مەن قازاقستان ەكى باۋىرلاس ەل. ءبىز تۇركيا قازاقستانداعى تۇراقتىلىق پەن تىنىشتىققا ۇلكەن كوڭىل بولەمىز، – دەدى ەردوعان.





تۇركيا باسشىسى بيىلعى قاڭتاردا قازاقستاندا بولعان قايعىلى وقيعاعا بايلانىستى كوڭىل ايتىپ، جارالىلاردىڭ تەزىرەك ساۋىعىپ كەتۋىن تىلەدى. ونىڭ ايتۋىنشا، قيىندىقتار قازاقستاندى تەك نىعايتتى.





– اسا قۇرمەتتى توقايەۆتىڭ جاڭا قازاقستاننىڭ قالىپتاسۋىنداعى ىنتا-جىگەرى مەن تاباندىلىعى ماقتاۋعا تۇرارلىق. وسى شەڭبەردە جۇرگىزىلىپ جاتقان اۋقىمدى رەفورمالار مەن باعدارلامالاردى قولدايتىنىمدى بىلدىرەمىن. قازاق باۋىرلاستارىمىزدىڭ تۇراقتىلىعى، تىنىشتىعى جانە قاۋىپسىزدىگى ءۇشىن ءبىز جاۋاپكەرشىلىگىمىزدەگى نارسەلەردى جاساۋعا دايىن ەكەنىمىزدى تاعى ءبىر رەت اتاپ كورسەتەمىن. ءارى ساياسي، ءارى ساۋدا جاعىنان، اسكەري، ەكونوميكالىق، مادەني جاعىنان بارلىق سالادا وسى ۇيىمشىلدىعىمىزدى جالعاستىرىپ، بولاشاققا يىقتاسىپ مىقتى قادام باسامىز دەپ ويلايمىن.، – دەدى ەردوعان.





تۇركيا پرەزيدەنتى ەكى ەل اراسىنداعى ءوزارا تاۋار اينالىمىنىڭ 5 ميلليارد دوللاردان اسقانىن جانە جاڭا ماقساتتىڭ تاۋار اينالىمىن 10 ميلليارد دوللارعا جەتكىزۋ ەكەنىن ءتۇسىندىردى.





– ەرتەڭ تۇرىك بيزنەسمەندەرىمەن وتكىزەتىن كەزدەسۋىمىز وسى تۇرعىدا پايدالى بولادى دەپ ۇمىتتەنەمىن. ءبىز تۇرىك كومپانيالارىن قازاقستانعا ينۆەستيسيا سالۋعا ىنتالاندىرۋدى جالعاستىرۋدامىز. كەزدەسۋلەرىمىزدە كولىك، قورعانىس ونەركاسىبى، ءبىلىم جانە مادەنيەت، ەنەرگەتيكا جانە باسقا سالالارداعى ءوزارا ينۆەستيسيا تۋرالى پىكىر الماسىپ كەلىستىك، – دەپ سەندىردى ەردوعان.





شاعىن قۇرامدا پرەزيدەنتتەر ۋكرايناداعى جاعدايدى تالقىلادى.





– ۋكراينانىڭ ەگەمەندىگى مەن اۋماقتىق تۇتاستىعىنا نەگىزدەلگەن داعدارىستى بەيبىت جولمەن شەشۋگە قاتىستى ءبىزدىڭ كوزقاراستارىمىز سايكەس كەلەدى. ءسىز سونداي-اق ۋكرايناداعى سوعىستى توقتاتۋ ءۇشىن باسىنان بەرى تىعىز جۇمىس ىستەپ كەلە جاتقانىمىزدى بىلەسىز. ارينە، بۇل سوعىس تاعى ءبىر مارتە تۇركى مەملەكەتتەرىنىڭ ەكىجاقتى دەڭگەيدە جانە تۇركى مەملەكەتتەرىنىڭ شاڭىراعى استىندا ىنتىماقتاستىعى مەن ىنتىماقتاستىعى ماڭىزدىلىعىن اتاپ ءوتتى. ءبىز قۇرمەتتى باۋىرىم توقايەۆپەن بۇۇ، يىۇ جانە ەكونوميكالىق ىنتىماقتاستىق ۇيىمى سەكىلدى حالىقارالىق پلاتفورمالاردا ۇيىمشىلدىعىمىزدى جالعاستىراتىنىمىزعا كەلىستىك.

اتامەكەنىمىز قازاقستاننان ءبىزدىڭ ەلىمىزگە كەلىپ وتىرعان پرەزيدەنت، اسا مارتەبەلى توقايەۆ جانە ونىڭ قۇرمەتتى دەلەگاسياسىن ءوز جەكە اتىمنان جانە دەلەگاسيامنىڭ اتىنان تاعى دا العىس بىلدىرەمىن، – دەدى ەردوعان.









پرەزيدەنت توقايەۆ ەردوعانعا تۇركياعا شاقىرۋ جانە قوناقجايلىلىق ءۇشىن العىسىن ءبىلدىردى.





– بۇگىن ءبىز ەڭ ماڭىزدى ماسەلەلەر بويىنشا جان-جاقتى كەلىسسوزدەر جۇرگىزدىك. پرەزيدەنت رەجەپ تايىپ ەردوعان دانا ءارى قۇرمەتتى ساياساتكەر، سوندىقتان ونىڭ پىكىرى وتە ماڭىزدى. تۇركيا – ءبىزدىڭ تاۋەلسىزدىگىمىزدى العاشقى بولىپ مويىنداعان ەل. ونى قازاق حالقى ەشقاشان ۇمىتپايدى. قازاقستان –تۇركيادان ەشقاشان دا، ەشقانداي دا زيان شەكپەگەن ەل. ءالى دە سولاي جالعاسىپ كەلەدى. قازاقستان مەن تۇركيا – تامىرلاس، باۋىرلاس، دوستاس مەملەكەتتەر، – دەدى قازاقستان پرەزيدەنتى.





قاسىم-جومارت توقايەۆ قازاق قونىستانۋشىلارىنىڭ تۇرىك جەرىنەن پانا تاپقانىنا بيىل 70 جىل تولعانىن ەسكە سالدى. ولارعا سول كەزدە تۇركيانىڭ پرەمەر-مينيسترى بولعان ادنان مەندەرەس كوپ كومەكتەستى. مەملەكەت باسشىسى جۋىردا الماتىداعى كوشەلەردىڭ بىرىنە وسى كورنەكتى ساياساتكەردىڭ ەسىمى بەرىلگەنىن اتاپ ءوتتى.





ەردوعان وسى جىلدىڭ قازان ايىندا قازاقستانعا كەلەدى جانە قازاقستان مەن تۇركيا اراسىنداعى ءتورتىنشى جوعارى دەڭگەيدەگى ستراتەگيالىق ىنتىماقتاستىق كەڭەسىنىڭ وتىرىسىنا قاتىسادى دەپ كۇتىلۋدە.






دەرەككوز
بۇل ماقالا تۋرالى نە ويلايسىز؟