اقتوبە قالاسىندا 22 ءساۋىر، تاڭعى ۋاقىتتا، پىشاق جاراقاتىنان كوز جۇمعان ايەلدىڭ ولىمىنە قاتىستى تىڭ دەرەك ايتىلدى. كورشىلەرى قاندى وقيعاعا قاتىستى كورگەن-بىلگەنىن باياندادى، دەپ حابارلايدى Alash.KZ ۇلتتىق پورتالى KAZ.NUR.KZ-كە سىلتەمە كورسەتە وتىرىپ.
اقتوبە قالالىق پوليسيا دەپارتامەنتىنىڭ وكىلدەرى 22 ءساۋىر كۇنى 34 جاستاعى ايەلدىڭ تانىسى قولىنان كوز جۇمعانىن ءمالىم ەتتى.
قاندى وقيعا تۋرالى پوليسياعا مارقۇمنىڭ كورشىلەرى حابارلاعان. وقيعا بولعان ءۇيدىڭ تۇرعىنى جاتىن كيىمىمەن جۇرگەن قىزدى دالىزدە شاشىنان سۇيرەگەن ەر ادامدى كورگەنىن ايتتى:
"پوليسياعا مەن حابارلاستىم. ول كەزدە ساعات تاڭعى 5:02 ۋاقىتتى كورسەتىپ تۇردى. قىزدىڭ جان داۋىسى شىعىپ جاتتى. قارسى ەسىكتەن دە كورشىمىز شىقتى. پوليسيا 15 مينۋتتان كەيىن، تجد قىزمەتكەرلەرى 40 مينۋت شاماسىندا كەلدى. ءۇيدىڭ ەسىگى ءبىر ساعات اينالاسىندا اشىلدى. ءتىرى دەپ ويلادىم. كومەكتەسۋ ءۇشىن جۇگىرىپ باردىم. ءبىراق قىزدىڭ كەۋدە تۇسى قان ەكەن. جۇقا جاتىن كيىمىمەن جاتتى. ءبارى كوز الدىمدا بولعاندىقتان ءوزىم دە قينالىپ ءجۇرمىن. كومەك ۋاقىتىندا بولسا، قىز امان قالار ما ەدى. وسىعان دەيىن دە ول قىزدىڭ تۇندە دالىزدە جىلاپ وتىرعانىن كورگەنمىن. ءبىراق ول كەزدە ۇيىنە كىرىپ كەتتى. قاسىنداعى كورشىلەرىنە "بىرەۋ گۇل اكەلىپ بەرسە الماڭدار، پوليسياعا ارىز بەرسەم دە قويمايدى، قورقامىن" دەگەن. بارلىق جاعدايدى تەرگەۋشىگە باياندادىم، سوتتا دا ايتىپ بەرەمىن"، - دەيدى مارقۇمنىڭ كورشىسى.
قايتىس بولعان ايەلدىڭ جانە ءبىر كورشىسى ايەلدىڭ قورعانسىز قالعانىن ايتىپ، جانۇشىرا ايعايلاعانىن ەستىگەنىن جەتكىزدى:
"بالكوننان كىرگەن دەپ ەستىدىك. قىز دالىزگە شىعىپ قاشقان. قىز قاتتى ايقايلاعان. مۇنداي جاعداي بۇرىن بولمادى. قورقىنىشتى. ول قىزدى قاتتى تانىمايمىز. ءبىراق اۋلادان كورگەنبىز"، - دەيدى مارقۇمنىڭ كورشىسى ماحاببات جامانتاي قىزى.
ەسكە سالا كەتەيىك، 22 ساۋىردە اقتوبەدە تۇرعىن ۇيلەردىڭ بىرىنەن ايەل ادامنىڭ دەنەسى تابىلدى. مارقۇمنىڭ دەنەسىندە كوپتەگەن پىشاق جاراقاتى مەن زورلىق-زومبىلىقپەن ءولتىرۋ بەلگىلەرى بولعان. كۇدىكتى پوليسيا قىزمەتكەرىن جاراقاتتاپ، وقيعا ورنىنان قاشىپ كەتكەنى،كەيىننەن ۇستالعانى حابارلاندى.
قازا تاپقان ءمولدىر توماروۆا قالاداعى مەديسينا ورتالىقتارىنىڭ بىرىندە دارىگەر بولىپ قىزمەت ەتكەن.
