قازاقستاندا قاڭتار وقيعاسىنا بايلانىستى 331 ادامعا سوت شەشىمى شىققان، 500-دەن استام ادام كۇدىكتى رەتىندە قاماۋدا وتىر. باس پروكۋراتۋرا وكىلى ەلدوس قيلىمجانوۆ 1 ماۋسىم كۇنگى بريفينگ كەزىندە وسىلاي دەپ مالىمدەدى.
"جالپى ەلدە قاڭتار وقيعاسىنا بايلانىستى 5 065 سوتقا دەيىنگى تەرگەۋ امالى تىركەلگەن. 514 كۇدىكتى سوت سانكسياسىمەن قاماۋدا وتىر" دەدى ەلدوس قيلىمجانوۆ.
ونىڭ سوزىنە قاراعاندا، 337 قىلمىستىق ءىس سوتقا جىبەرىلگەن.
باس پروكۋراتۋرا وكىلى سارسەنبىلىك بريفينگ كەزىندە 4 قاڭتاردا الماتىدا بولعان وقيعاعا توقتالدى. ونىڭ سوزىنە قاراعاندا، سول كۇنى كەشكى ساعات 6 مەن 8 ارالىعىندا ازاماتتار قالانىڭ باتىسىندا – "الماتى ارەنا" سپورت كەشەنىنە، شىعىسىندا "حالىق ارەنا" ستاديونى ماڭىنا جينالعان. قيلىمجانوۆتىڭ ايتۋىنشا، كەشكى 9-دار شاماسىندا "ۇيىمداسقان" ەكى توپ ءبىر مەزەتتە "قالا اكىمدىگىنە قاراي جىلجي باستاعان".
"اباي، تولە بي كوشەلەرى بويىمەن جۇرگەن توپ ءجۇرىپ كەلە جاتىپ وزدەرىنە ادامداردى تارتقان، تاياق، تاس، ارماتۋرامەن قارۋلانعان. WhatsApp جانە Telegram ارقىلى توپتار باعىتىن ۇيلەستىرىپ، جىلجىپ وتىرعان. ساناۋلى ساعاتتىڭ وزىندە ءبىر مەسسەنجەر توبىنداعى ادامدار سانى 140-تان 5 500-گە دەيىن كوبەيدى. ناتيجەسىندە ءتۇن جارىمىندا اكىمدىك الدىنداعى ورتالىق الاڭعا جاڭا ايتىلعان ورىنداردان ونداعان مىڭ ادام جينالدى" دەدى قيلىمجانوۆ.
ونىڭ ايتۋىنشا، "اشۋلى توپ الاڭداعى عيماراتتار مەن مۇلىكتەردى، تۇراقتاعى كولىكتەردى دە تالقانداپ، ورتەي باستاعان. بۇلىككە قاتىسقاندار پوليسيا قىزمەتكەرلەرى، اسكەريلەرگە شابۋىل جاساپ، جولدى جاپقان، كولىك قۇرالدارىن ورتەپ، ادامداردى تارتىپسىزدىككە، توناۋعا بەيىمدەگەن". قيلىمجانوۆ سونىمەن بىرگە قارۋ-جاراق دۇكەندەرىنىڭ تونالعانىن، باقىلاۋ كامەرالارىنىڭ جويىلعانىن ايتتى.
- قاڭتاردىڭ باسىندا ەلدە سۇيىتىلعان گاز باعاسىنىڭ قىمباتتاۋىنا بايلانىستى ميتينگ ءوتىپ، نارازىلىقتىڭ سوڭى قانتوگىسكە ۇلاسقان. بيلىك شەتەلدە دايىندىقتان وتكەن "تەرروريستەر شابۋىلى" تۋرالى ايتتى، ءبىراق وعان دالەل-ايعاق كەلتىرگەن جوق. پرەزيدەنت قاسىم-جومارت توقايەۆ كۇشتىك قۇرىلىمعا ەسكەرتۋسىز وق اتۋعا بۇيرىق بەرگەنىن مالىمدەدى. ول سونىمەن بىرگە ەلدە بيلىكتى كۇشپەن باسىپ الۋ تالپىنىسى بولعانىن ايتىپ، الايدا ونى كىم ۇيىمداستىرعانىن ناقتىلامادى.
- رەسمي دەرەك بويىنشا، قاڭتار وقيعاسىندا 230 ادام قازا بولدى. بۇعان قوسا، وقيعا كەزىندە ۇستالعان تاعى سەگىز ادامنىڭ تەرگەۋ يزولياتورىندا كوز جۇمعانى بەلگىلى بولدى. بيلىك قوعام تالابىنا قاراماستان وپات بولعانداردىڭ ەسىمىن جانە ولاردىڭ قانداي جاعدايدا قازا بولعانى جايلى اقپاراتتى جاريالامادى.
- قاڭتار وقيعاسى كەزىندە جانە ودان كەيىن مىڭداعان ازامات ۇستالىپ، جۇزدەگەن ادامعا "تەرروريزم"، "جاپپاي تارتىپسىزدىك ۇيىمداستىرۋ"، "زاڭسىز قارۋ-جاراق ساقتاۋ" سەكىلدى ايىپتار تاعىلدى. قاماۋدا بولعانداردىڭ اراسىندا ازاپتالعانىن ايتىپ شاعىمدانعاندار كوپ، ءبىراق ولاردى ازاپتاۋ فاكتىسى بويىنشا ۇستالعاندار نەكەن-ساياق.
- قاڭتار وقيعاسىنان كەيىن قاماۋدا بولعان جۇزدەگەن ادام وزدەرىنىڭ ازاپتالعانى جايلى ايتىپ، 234 ءىس قوزعالعان. الايدا، ازىرگە كۇشتىك قۇرىلىمنىڭ تەك 11 وكىلى كۇدىكتى دەپ تانىلعان.
