وزبەكستان ساۋدا جولىن ىزدەپ وڭتۇستىككە بەت بۇرىپ جاتىر

ناۋرىز ايىندا ءۇندى ترەيدەرى ءبىرىنشى رەت پاكىستان مەن اۋعانستان ارقىلى وزبەكستانعا تاۋار جولدادى. وسىلاي دەپ The Diplomat باسىلىمى جازدى.

باسىلىم مالىمەتىنشە، جۇكتە نەگىزىنەن ءۇندىستاندا وندىرىلگەن قانت بولعان.

جۇك الدىمەن ءۇندىستاننان پاكىستاندىق كاراچي پورتىنا، ودان اۋعانستانعا بارعان. كەيىن كابۋلدان مازاري-شاريفكە، ودان وزبەكستاننىڭ تەرمەز قالاسىنا جەتكىزىلگەن.

ءۇندىستاننان جەتكىزىلگەن تاۋار وزبەكستاننىڭ رەسەي مەن يران تاۋارلارىنا تاۋەلدىلىگىن ازايتۋى مۇمكىن.

وزبەكستان ءۇشىن رەسەي الەم نارىعىندا باستى ارىپتەس بولىپ كەلگەن. بۇگىنگى كۇندە ەكى ەل اراسىنداعى تاۋار اينالىمى 7،5 ملرد دوللار. وزبەكستان – الەمدەگى تەڭىزگە شىعاتىن ەلدەرمەن شەكاراسى جوق ەكى ەلدىڭ ءبىرى. سول سەبەپتەن وزبەكستان ءىرى الەمدىك نارىقتان تىسقارى قالىپ كەلەدى.

ءبىراق شاۆكات ميرزيايەۆ بيلىككە كەلگەلى بۇل ماسەلە شەشىلە باستاعان.

باسىلىمنىڭ جازۋىنشا، كەيىنگى كەزدە رەسمي تاشكەنت وڭتۇستىك كورشىلەرگە كوبىرەك كوڭىل بولە باستاعان. تاشكەنتە اسىرەسە پاكىستان تەڭىزىنە قول جەتكىزۋ ماڭىزدى. بيىل ناۋرىز ايىندا ەكى ەل ساۋدا بايلانىسى جونىندە كەلىسىمگە كەلگەن. كەلىسىمگە سايكەس، ەكى ەل 34 تاۋاردىڭ تۇرىنە كەدەن سالىعىن 20-دان 100 پايىزعا تۇسىرەدى.

بىلتىر وزبەكستان مەن پاكىستان ترانزيتتىك تاۋار جونىندە كەلىسسوزگە قول قويعان. تاۋار تاسىمالداۋدا ەكى ەلدىڭ اراسىندا اۋعانستان تۇر.

وسىعان دەيىن تەرمەز - مازاري-شاريف - كابۋل - پەشاۆار تەمىر جولىن سالۋ بويىنشا ەلدەر ءوزارا ۋاعدالاسقان. ءقازىر بۇل جوبانىڭ جۇزەگە اسۋىنا اۋعانستان بيلىگىنە كەلگەن تالىپتەر كەدەرگى كەلتىرىپ تۇر.

Diplomat باسىلىمى وزبەكستاننىڭ پاكىستان تەڭىزىنە شىعا باستاۋىنا تاعى باسقا سىرتقا فاكتورلار سەبەپ بولدى، قازاقستانداعى قاڭتار وقيعاسى، ۋكراينادا ءجۇرىپ جاتقان سوعىس تا تاشكەنتتى الاڭداتىپ وتىر دەپ جازادى.