وسكەمەندە قاڭتار وقيعاسىنان كەيىن قامالعان ءتورت ادام تەرگەۋ امالدارى ۇزارتىلعاننان كەيىن اشتىق جاريالادى. قاماۋداعىلاردىڭ تۋىستارى جاقىندارى جالعىز ادامدىق كامەرالاردا وتىرعانىن ايتادى.
اشتىق جاريالاعان ازيز جولاتوۆ، مۇحيت تۇگەلبايەۆ، تيمۋر ەرجان ۇلى جانە ايدىن قاتپىشيەۆ "جاپپاي تارتىپسىزدىك" بابى بويىنشا كۇدىككە ىلىنگەن.
— تيمۋردى 7 ساۋىردە تۇندە ۋاقىتشا قاماۋ يزولياتورىنا اكەلدى، 12ء-سى تەرگەۋ بولۋى ءتيىس بولعان، كەيىن ونى 15-ىنە، ودان كەيىن 18-ىنە اۋىستىردى. ءبىراق ونىڭ سەبەبىن بىزگە دە، ادۆوكاتقا دا تۇسىندىرمەدى. 15ء-ى كۇنى ونى قايتادان تەرگەۋ يزولياتورىنا جىبەردى. ولاردى وسىلاي ءتورت اي بويى اۋرەلەپ كەلەدى. 70 ادامدى سۇرايمىز دەيدى – ولاردىڭ ءبارى قايدا؟ تەرگەۋ امالدارى ءجۇرىپ جاتقان جوق، سوزىپ، ۇيلەرىنە جىبەرمەي جاتىر. ادۆوكاتپەن بىرىگىپ، بۇلتارتپاس شاراسىن وزگەرتۋ تۋرالى 12 ءوتىنىش جازدىق. وزگەلەردى ەشقايدا كەتپەۋ تۋرالى قولحاتپەن ءۇيقاماققا بوساتىپ جاتىر – ال نەگە ەكەنى بەلگىسىز جاقىندارىمىزدى جىبەرمەي وتىر، – دەدى تيمۋر ەرجان ۇلىنىڭ اناسى ءسانيا كلەيمەنوۆا.
تۋىستارىنىڭ ايتۋىنشا، اشتىق جاريالاعانداردىڭ دەنساۋلىعى ناشارلاعان.
—ازيز ءالسىز، يممۋنيتەتى مۇلدە ءتۇسىپ كەتكەن، جوتەلىپ ءجۇر، – دەيدى اپكەسى كەربەز ەگىنبايەۆا.
—مۇحيت السىرەپ، باسى اينالىپ ءجۇر. ءتىپتى قۇلاپ تا قالادى. ايدىن قاتپىشيەۆتىڭ باسى اۋىرادى، وعان ءتيىستى مەديسينالىق كومەك كورسەتىلىپ جاتقان جوق، – دەيدى ءسانيا كلەيمەنوۆا.
شىعىس قازاقستان وبلىسى قىلمىستىق-اتقارۋ جۇيەسى دەپارتامەنتىنىڭ رەسمي وكىلى سالتانات وجيكانوۆا ءتورت ادامنىڭ اشتىق جاريالاعانىن راستاعانمەن ەكەۋى 19 ساۋىردەن باستاپ تاماق ىشە باستاعانىن ايتتى. ال قالعان ەكەۋى 20-ىندا اشتىقتان شىققان.
قاج دەپارتامەنتىنىڭ وكىلى قاماۋداعىلاردىڭ جالعىز ادامدىق كامەرادا وتىرعانىن تەرىستەدى. سالتانات وجيكانوۆانىڭ ايتۋىنشا، پروكۋراتۋرا قىزمەتكەرلەرى اشتىق جاريالاعانداردىڭ دەنەسىن تەكسەرگەن. "دەنەلەرى ساۋ، اتالعان تۇلعالاردىڭ مەكەمە اكىمشىلىگى مەن قاماۋ جاعدايىنا شاعىمى جوق" دەدى ول.
قامالعانداردىڭ تۋىستارى قاڭتار ايىنان بەرى بۇلتارتپاس شاراسىن وزگەرتىپ، جاقىندارىن قاماۋدان بوساتۋدى تالاپ ەتىپ كەلەدى.
- قاڭتار وقيعاسى كەزىندە جانە ودان كەيىن مىڭداعان ازامات ۇستالىپ، جۇزدەگەن ادامعا "تەرروريزم"، "جاپپاي تارتىپسىزدىك ۇيىمداستىرۋ"، "زاڭسىز قارۋ-جاراق ساقتاۋ" سەكىلدى ايىپتار تاعىلدى. قاماۋدا بولعانداردىڭ اراسىندا ازاپتالعانىن ايتىپ شاعىمدانعاندار كوپ، ءبىراق ولاردى ازاپتاۋ فاكتىسى بويىنشا ۇستالعاندار نەكەن-ساياق.
- قاڭتاردىڭ باسىندا ەلدە سۇيىتىلعان گاز باعاسىنىڭ قىمباتتاۋىنا بايلانىستى ميتينگ ءوتىپ، نارازىلىقتىڭ سوڭى قانتوگىسكە ۇلاسقان. رەسمي دەرەك بويىنشا، 230 ادام قازا بولدى. قازا تاپقاندار اراسىندا كۇشتىك قۇرىلىمنىڭ 19 قىزمەتكەرى بار. بۇعان قوسا، قاڭتار وقيعاسىنا بايلانىستى ۇستالعان تاعى سەگىز ادامنىڭ تەرگەۋ يزولياتورىندا كوز جۇمعانى حابارلاندى. بيلىك وپات بولعانداردىڭ ەسىمىن جاريالامادى. حالىقارالىق ۇيىمدار قاڭتار وقيعاسىن حالىقارالىق ساراپشىلاردىڭ كومەگىمەن زەرتتەۋگە ۇندەگەنمەن نۇر-سۇلتان ۇسىنىستى كەرى قايتارعان.
