ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

"ورتا ءجۇز". بەلگيادان اتا-اناسىن ىزدەپ كەلگەن جانىبەكتىڭ رۋى انىقتالدى

20 ماۋسىم 2024 312

بەلگيادان قازاقستانعا اتا-اناسىن ىزدەپ كەلگەن جانىبەكتىڭ رۋى انىقتالدى. بۇل جايلى Alash.KZ ۇلتتىق پورتالى "Inbusiness.kz"-كە سىلتەي وتىرىپ حابارلايدى.

بىرنەشە ۋاقىت بۇرىن TreeGene زەرتحاناسىنىڭ مامانى ۇلدانا كوككوزوۆا بەلگيادان قازاقستانعا اتا-اناسىن ىزدەپ كەلگەن جانىبەككە قاتىستى تاعى ءبىر دەرەك ءبولىستى. مامان "اتا-تەگىن انىقتاۋ" سىناماسىنا جۇگىنە وتىرىپ جانىبەكتىڭ قاي رۋدان ەكەنىن حابارلادى.

شەتەلدەن كەلگەن قازاق بالاسىنىڭ رۋى نايمان ەكەنى انىقتالعان.

"بۇل سىنامانىڭ اتى "اتا-تەگىن انىقتاۋ"  دەپ اتالادى. قازىرگى كەزدە سۇرانىسقا يە بولىپ جۇرگەن سىنامالاردىڭ ءبىرى. سەبەبى ءبىز گەنەتيكالىق پروفيل ارقىلى ادامنىڭ گاپلوتوبىن انىقتايمىز. گاپلوتوبىنىڭ پوپۋلياسياسى ارقىلى رۋىن انىقتاپ بەرەمىز. اسىرەسە رۋىن بىلگىسى كەلەتىن، انىقتاعىسى كەلەتىندەر، اسىرەسە قانداي توپقا جاتاتىنىن، اتا-تەگىنىڭ ەرەكشەلىگىن بىلگىسى كەلسە وسى تەستكە جۇگىنەدى. بۇل سىناما 14 كۇندە جاسالادى. ءتىپتى كىتاپ قىلىپ شىعارىپ بەرەمىز. ماسەلەن، بەلگيادان كەلىپ، اتا-اناسىن ىزدەگەن جانىبەكتىڭ رۋىن انىقتاۋ ءۇشىن ءبىز ونىڭ گاپلوتوبى قانشا ەلدە كەزدەسەدى دەپ تەكسەردىك. Y حروموسوما تەك قانا ەرلەردە عانا كەزدەسەدى. ايەلدەردىكى ح حروموسوما ەكەنى بەلگىلى. ياعني، اكەنىڭ Y حروموسوماسى ۇلدارىنا وزگەرىسسىز بەرىلەدى. اتاسى، بالاسى، تۋعان باۋىرلارى  جانە نەمەرە ۇلدارىنا بەرىلەتىن ارنايى ارىپتەر مەن ساندار بار. ءبىز جانىبەكتىڭ توبىنىڭ سانى R1b-M478 ەكەنىن انىقتادىق. ياعني 27 str ماركەرى ارقىلى انىقتادىق. گاپلوتيپ ارقىلى گاپلوتوپ انىقتالادى. سول ارقىلى ونىڭ پوپۋلياسياسىنا بايلانىستى رۋى بەلگىلى بولادى. جانىبەكتىڭ گاپلوتوبىندا ەكى رۋدىڭ بەلگىسى شىقتى. بىرەۋى - نايمان، ەكىنشىسى - قىپشاق. زەرتتەي كەلە نايمانعا 2 مۋتاسيادان ايىرماشىلىق كورىندى. ال قىپشاق دەيىن دەسەك 7 مۋتاسيادان ايىرماشىلىق بايقالدى. Y حروموسوماسى نايماندارعا سايكەس كەلگەن سوڭ ءبىز ونى ورتا ءجۇز، نايمان رۋى، باعانالى تەگىنەن دەپ كىتاپقا جازىپ بەردىك. ارعىنداردىكى G توبى بولىپ اتالادى، باسقا رۋلاردا S دەگەن توپ بار"، - دەيدى ول.

بۇل ماقالا تۋرالى نە ويلايسىز؟