قازاقستاننىڭ بۇرىنعى پرەزيدەنتى نۇرسۇلتان نازاربايەۆ ءوزى تۋرالى قازاقستان كونستيتۋسياسىنا ەنگىزىلەتىن وزگەرىستەردى قولدايتىنىن، الداعى جەكسەنبىدە وتەتىن رەفەرەندۋمعا باراتىنىن مالىمدەدى.
"يءا، 5 مامىردا كونستيتۋسيالىق قۇقىعىمدى مىندەتتى تۇردە پايدالانىپ، رەفەرەندۋمعا بارىپ داۋىس بەرەمىن"، — دەيدى نۇرسۇلتان نازاربايەۆ ساياساتتانۋشى دانيار اشىمبايەۆقا بەرگەن، 30 مامىردى جاريالانعان سۇقباتىندا. سۇقباتتا دانيار اشىمبايەۆ بۇرىنعى پرەزيدەنتكە "وزىڭىزگە بايلانىستى كونستيتۋسياداعى ستاتۋستى وزگەرتۋدى قولدايسىز با" دەپ سۇراعان.
نازاربايەۆ سۇقباتتا وسىدان ءۇش جىل بۇرىن پرەزيدەنت وكىلەتىن ءوز ەركىمەن تاپسىرعانىن مالىمدەگەن جانە "ساراپشىلار ەلدەگى بيلىك ءترانزيتى قاتاڭ باقىلاۋدا ەكەنىن ءبىلسىن دەپ وزىنە ءبىرقاتار وكىلەت الىپ قالعانىن" ايتقان.
- 2019 جىلى كوپشىلىكتىڭ قارسىلىعىنا قاراماستان مەملەكەت باسشىلىعىنان سانالى تۇردە كەتتىم. حالىق مەنىڭ ساياساتىمدى قولداپ تۇرعان كەز بولاتىن. وعان 2015 جىلى پرەزيدەنت سايلاۋىندا 97،7 پايىز داۋىس العانىم دالەل"، — دەيدى نازاربايەۆ.
"يءا، بەلگىلى ءبىر وكىلەتتەر مەندە قالدى. ءبىراق ونى ساياسي ءترانزيتتى بىرتىندەپ جۇزەگە اسىرىپ، قوعام مەن بيلىك ەليتاسىنداعى قايشىلىقتى جۇمسارتۋ ءۇشىن جاسادىم"، — دەيدى ول.
باتىس باقىلاۋشىلارى قازاقستانداعى بىردە — ءبىر سايلاۋدى ەركىن جانە ادىلەتتى سايلاۋ دەپ باعالاعان ەمەس. قۇقىق قورعاۋشىلار نۇرسۇلتان نازاربايەۆتى دا، قاسىم — جومارت توقايەۆتى دا "وزگەشە ويلايتىندارعا قىسىم جاسادى، ادام قۇقىعىنا نۇقسان كەلتىردى" دەپ ايىپتايدى.
بيىل قازاقستان پرەزيدەنتى قاسىم — جومارت توقايەۆ قازاقستان كونستيتۋسياسىنا وزگەرىستەر مەن تولىقتىرۋلار ەنگىزۋ جونىندە رەفەرەندۋم وتكىزۋ تۋرالى جارلىق شىعارعان. تاۋەلسىز ساراپشىلار بيلىك ۇسىنعان وزگەرىستەر اۆتوريتارلىق جۇيە تابيعاتىن وزگەرتپەيدى، ساياسي جۇيەدە پرەزيدەنت ءرولى بۇرىنعىشا قالا بەرەدى دەپ سانايدى.
رەفەرەندۋم جاريالانار قارساڭدا بۇرىنعى پرەزيدەنتتىڭ "تاۋەلسىز قازاقستاننىڭ نەگىزىن سالۋشى" دەگەن مارتەبەسى داۋ تۋدىرعان ەدى. قوعام اۋانىنان كەيىن بيلىك "ەلباسىن" ەسكە تۇسىرەتىن بارلىق نورمالاردى الىپ تاستايتىنىن، كونستيتۋسياعا وزگەرىس ەنگەن سوڭ تۇڭعىش پرەزيدەنت تۋرالى زاڭنىڭ كۇشىن جويۋ ماسەلەسىن كوتەرەتىنىن مالىمدەگەن.
نازاربايەۆ سۇقباتىندا "قاڭتار ايىندا توقايەۆقا قاۋىپسىزدىك كەڭەسىنىڭ ءتوراعاسى وكىلەتىن بەرگەنىن ايتقان". "پرەزيدەنتتىڭ سول كەزدەگى شەشىمتال ارەكەتى وقيعانى ودان ءارى ۋشىقتىرمادى"، — دەيدى نازاربايەۆ.
قاڭتار وقيعاسى كەزىندە نۇرسۇلتان نازاربايەۆ قاۋىپسىزدىك كەڭەسىنىڭ ءتوراعاسى قىزمەتىنەن ايىرىلىپ، ودان سوڭ جاقىن تۋىستارى مەن سەرىكتەرى ىقپالدى ءىرى قىزمەتتەردەن كەتكەن سوڭ توقايەۆ بيلىكتى ءوز قولىنا شوعرلاندى دەگەن بولجام ءجيى ءسوز بولعان.
قاڭتار وقيعاسى كەزىندە قاسىم — جومارت توقايەۆ قاۋىپسىزدىك كەڭەسىنىڭ ءتوراعاسى قىزمەتىن اتقارۋدى ءوز موينىنا العانىن مالىمدەگەن ەدى. ول كەزدە توقايەۆ پەن نازاربايەۆ اراسىندا بيلىك ءۇشىن كۇرەس بولىپ جاتىر دەگەن بولجامدار ايتىلعان، ءبىراق ەكەۋى دە تەرىسكە شىعارعان.
