«بىرگە جۇمىس ىستەيتىن ارىپتەسىم «سايتتى اعىلشىن تىلىندە تولتىرۋعا كومەكتەسىپ جىبەرشى» دەپ ءوتىنىش ءبىلدىردى. سوعان كومەكتەسىپ وتىرىپ، ويلاماعان جەردەن ءوزىم دە كەتىپ قالدىم. 2022 جىلدىڭ جەلتوقسانىنان ءوتىنىش بەردىم. ءوتىنىشىم قابىلدانىپ، 2023 جىلى 1 مامىردان ۆيزا الدىم. ۆيزا مەرزىمى 1 قاراشاعا دەيىن التى ايلىق بولاتىن. ءبىراق 12 ايلىق بولىپ ەسەپتەلەدى. التى اي عانا سول جەردە بولۋ كەرەك. سوندا 1 مامىردا بارساق، ودان كەيىن كەلەسى جىلدىڭ 1 مامىرىندا بارا الامىز. وعان دەيىن ۆيزا المايمىز. ءبىزدىڭ ماۋسىمدىق جۇمىسقا ارنالعان ۆيزا Tier5 دەپ اتالادى. نەگىزى ءبىزدىڭ اگەنتتىكتىڭ ءوزى ۆيزا تولتىرۋعا كومەكتەستى. بارلىعى تەگىن بولدى. شىعىنعا كەلسەك، بيلەت، كونسۋلدىق الىمعا تولەدىك. ال جۇمىسقا تۇرۋ، اگەنتتىكتىڭ قىزمەتى تەگىن بولدى»، – دەيدى ميراج ويشييەۆا ايقىن گازەتىنە بەرگەن سۇحباتىندا.
وسىلايشا، كەيىپكەرىمىز ءتورت بالاسىن اناسىنا قالدىرىپ، انگلياعا اتتانادى. كىشكەنتايى نەبارى ەكى جاستا بولاتىن. ءسويتىپ، ول جاقتا قۇلپىناي مەن تاڭقۋراي وسىرەتىن جىلىجايعا جۇمىس ىستەۋگە بارادى. نەگىزگى جۇمىس – قۇلپىنايدى جاپىراعىنان اجىراتىپ وتىرۋ. كەيىپكەرىمىز ايىنا 1،5 ميلليونعا جۋىق تابىس تاپقانىن ايتادى. ميراج ويشييەۆانىڭ ءوزى شەت ءتىلىن بىلەتىندىكتەن اۋدارماشى دا بولعان اراسىندا. ال جالپى، وزىمەن بىرگە بارعان وتانداستارىمىزدىڭ كوبى جوعارى ءبىلىم الىپ، ماگيستراتۋرا بىتىرگەن، ءتىل بىلەتىن جاستار. شەتەلدىكتەر وسىعان قىزىعا قاراعان.
«بىزبەن بىرگە بارعان وتانداستارىمىزدىڭ سانى 8 مىڭعا جۋىق بولدى. بارلىعىنىڭ موينىندا نەسيەسى بار، ۇلكەنى، كىشىسى بولسىن. ءبىر جاس وتباسىنى بىلەمىن. جاسى 25-تە. ولار ءۇي الۋ ءۇشىن باردى. ەكەۋى اقشاسىن جيناپ، استانادان ءۇي ساتىپ الدى. ونداي دا جاعداي بار»، – دەيدى ميراج ويشييەۆا.
كەيىپكەرىمىز انگليادا تەك جۇمىس ىستەپ قانا قويماي، PR-مەنەدجەر مامانداعى ءبىلىم الىپ كەلگەن. ەندى انگليا، اقش، ەۋروپاعا وقۋعا تۇسۋگە نيەت بىلدىرگەن جاندارعا كومەكتەسۋدى جوسپارلاپ وتىر.
