ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

ءمىرجاقىپ دۋلات ۇلى: حالىققا قىزمەت ەتەمىن دەگەن كىسىگە ءبارىبىر: دەپۋتات بول، گازەت شىعار، بالا وقىت

22 ءساۋىر 2024 237

جالپىقازاق سەزى ۋچرەديتەلنوە سوبرانيەگە تورعاي وبلىسىنان دەپۋتات بەلگىلەنگەندە، سپيسوكتە مەنى ەكىنشى قىلىپ كورسەتكەن ەدى. مەن تومەنگى سەبەپتەرمەن سپيسوكتەن شىعامىن ءھام تالاسقا تۇسپەيمىن.

1) ساياسات جونىندە جۇرتتىڭ بارىنە ۇستاز - ەۋروپا حالقى. ءبىز ورنەكتى ەۋروپا حالقىنان الۋعا ءتيىستىمىز. ءبىراق از ۋاقىتتىڭ ىشىندە قانشا سۇيرەگەنمەن، جالپى جۇرت ەۋروپا بولىپ كەتە المايدى. جۇرە-جۇرە ءتۇزۋ جولعا تۇسپەك. ۋچرەديتەلنوە سوبرانيەگە سايلاناتىن دەپۋتاتتار دا ەۋروپا راسىمىمەن سايلانۋعا ءتيىس ەدى. اناۋ ارعىن، مىناۋ الشىن دەلىنبەسە كەرەك ەدى. تورعاي وبلىسىنىڭ سپيسوگىندە الدىڭعى قاتارداعى ءۇش كىسى - ۇشەۋى دە ارعىن، ۇشەۋى دە ءبىر ۇيەزدەن بولعان سوڭ، ەۋروپا جولىنان تايىپ شىعىپ، ءبىز مۇشەدەن قۇر قالدىق دەگەن قىڭقىل شىقتى. سونىڭ ءۇشىن ارعىندى ازايتۋعا ءھام ارعىن كەمىسە، تورعاي وبلىسىنىڭ سپيسوگى بىرەۋ بولار دەگەن ماقساتپەن شىعامىن.

2) احمەت ءھام مەن ەكەۋمىز دە دەپۋتات بولا قالساق گازەت يەسىز قالار، ويتكەنى ۋچرەديتەلنوە سوبرانيە ءماجىلىسى 2-3 ايدان اسپاس دەپ ويلاساق تا، ۇزاققا سوزىلماسىنا كوز جەتپەس دەپ شىعامىن.

ءبىر كىسى ءبىر ىسكە جارايتىن بولسا دا از ەمەس. حالىققا قىزمەت ەتەمىن دەگەن كىسىگە ءبارىبىر: دەپۋتات بول، گازەت شىعار، بالا وقىت. وزگەمىزدىڭ ءبارى ساي بولىپ، جالعىز دەپۋتاتتىققا قاراپ تۇرعان ءىس جوق. حالقىڭ نادان بولسا، مىڭ دەپۋتاتىڭ بولسىن، ونان پايدا تاعى جوق. دەپۋتاتتىقتى تاڭسىق كورىپ، اتاعىنا قىزىعىپ ياكي باسەكە ءۇشىن باراتىن كىسى بولماسقا كەرەك. ەكى قازاق تالاسىپ ءبىر ورىسقا جەم بولساق، ونان تاپقان پايداعا تۇبىندە يە تابىلماي جۇرمەسىن.

وسىنى اركىم ەسكەرسە ەكەن. مەنى اتاعان جالپىقازاق سەزىنە ءھام باسقالارعا ءىلتيپات ءۇشىن ءتاڭىر جارىلقاسىن ايتامىن.

ءمىرجاقىپ دۋلات ۇلى

«قازاق» گازەتى، 1917 جىل، №248

دەرەككوز: دۋلات ۇلى م.، التى تومدىق شىعارمالار جيناعى.2-توم. - الماتى، 2013 ج.

Alash.kz ۇلتتىق پورتالى

بۇل ماقالا تۋرالى نە ويلايسىز؟