ءتىرى بولسام، قازاققا قىزمەت ەتپەي قويمايمىن!

ءاليحان بوكەيحان

مەملەكەت باسشىسى تورەگەلدى شارمانوۆتىڭ وتباسى مەن جاقىن تۋىستارىنا كوڭىل ايتتى

25 مامىر 2024 253
پرەزيدەنت قاسىم-جومارت توقايەۆ مەملەكەت جانە قوعام قايراتكەرى، اكادەميك تورەگەلدى شارمانوۆتىڭ وتباسى مەن جاقىن تۋىستارىنا كوڭىل ايتۋ جەدەلحاتىن جولدادى، دەپ حابارلايدى Alash.KZ ۇلتتىق پورتالى. 

مەملەكەت باسشىسى اسا كورنەكتى عالىم، قازاق تاعامتانۋ اكادەمياسىنىڭ پرەزيدەنتى، قازاقستاننىڭ ەڭبەك ەرى تورەگەلدى شارمانوۆتىڭ دۇنيەدەن وتۋىنە بايلانىستى ونىڭ وتباسى مەن جاقىن تۋىستارىنا كوڭىل ايتتى.

"تورەگەلدى شارمان ۇلى بۇكىل سانالى عۇمىرىن ۇلت دەنساۋلىعىنا ارناعان بىرەگەي تۇلعا، بيىك پاراسات يەسى ەدى. وتاندىق مەديسينانىڭ العا باسۋىنا بار قاجىر-قايراتىن جۇمساپ، كوپتەگەن يگى ىسكە باستاماشى بولدى. قازاق تاعامتانۋ عىلىمىنىڭ كوكجيەگىن كەڭەيتىپ، دۇنيەجۇزىلىك دەنساۋلىق ساقتاۋ ۇيىمى، يۋنيسەف جانە باسقا دا حالىقارالىق ۇيىمدارمەن ىنتىماقتاستىق بايلانىس ورناتا ءبىلدى. ءوزىنىڭ جاڭاشا مەكتەبىن قالىپتاستىرىپ، ۇلاعاتتى ۇرپاق تاربيەلەدى. اينالاسىنا سىيلى، عيبراتتى عۇمىر كەشكەن تورەگەلدى شارمان ۇلىنىڭ جارقىن بەينەسى حالقىمىزدىڭ جۇرەگىندە ماڭگى ساقتالادى. مارقۇمنىڭ يمانى سالامات، جانى ءجانناتتا بولسىن"، - دەپ جازىلعان جەدەلحاتتا.

ەسكە سالايىق، بۇعان دەيىن ەل ىشىندە ۇلت ارىستارىنىڭ ءىزباسارى، تۇلپاردىڭ تۇياعى، اسىلدىڭ سىنىعى سانالاتىن وراسان زور قۇرمەتكە يە اقساقال، مەديسينا عىلىمدارىنىڭ دوكتورى، پروفەسسور، گيگيەنيست-نۋتريسيولوگ عالىم، قازاقستاننىڭ ەڭبەك سىڭىرگەن قايراتكەرى، اكادەميك تورەگەلدى شارمانوۆ 94 جاسقا قاراعان شاعىندا ومىردەن وتكەنىن حابارلاعان ەدىك.

بۇل ماقالا تۋرالى نە ويلايسىز؟